II Timôthê 1:3-5
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: ‘Blŏk Ling Lang kiơ̆ kơ sơ̆p hla bơar ‘Bok Kei-Dei II Timôthê 1:3-5.
3 Inh lui kơ ‘Bok Kei-Dei trŏ thoi Sư wă, na inh ưh kơ hli. Lu ‘bok kơdră inh lui sơ̆ thoi noh mơ̆n. Na inh krao khan kơ ‘Bok Kei-Dei ling lang wă kơ Sư tơgŭm ih păng inh kư̆m bơnê kơ Sư yua kơ ih lui kơjăp. 4 Inh oei ‘blŏk mơ̆n kơ ih hmoi kơ inh hơtai ba wă tơklah dih băl sơ̆, na dang ei inh rơnguơ̆ dêh, inh wă kơ ba tơ’bơ̆p băl dơ̆ng na jơhngơ̆m inh hiôk. 5 Inh băt kơ ih lui kơjăp tơpă, kư̆m lei-lăi thoi yă ih Lôih păng mĕ ih Eunik lui sơ̆ mơ̆n. Na dang ei inh băt kơ ih lui kơjăp thoi sư sơ̆ tơpă.
Trong tơm ‘bai pơhrăm ‘nâu:
“Na inh krao khan kơ ‘Bok Kei-Dei ling lang wă kơ Sư tơgŭm ih păng inh kư̆m bơnê kơ Sư yua kơ ih lui kơjăp.” (II Timôthê 1:3b)
Nơ̆r jet tơchĕng pơwao:
– Lăm nơ̆r bơnê kơ Kră Yang gah Timôthê, ‘bok Pôl khan sư ‘blŏk kơ Timôthê kơplah hơyơ păng ‘blŏk lu tơdrong kiơ?
– Nơ̆r Kră Yang bơtho kơ bơ̆n thoi yơ gah tơdrong hiơ̆k tơgŭm, bơwei bơngai nai?
Kơkuh kơ đĭ đăng,
Rŏ lăng yua kơ jơhngơ̆m tơchĕng dêh lơ tơdrong lu bơngai bơtho ưh kơ trŏ mơ̆t tơ khul bơngai lui pơm pơrăm lơ kơ kon Kră Yang, thoi noh lăm kơthơ ITimôthê, đơ̆ng rŏng kơ nơ̆r pơma pơih blŭng a, ‘bok Pôl pơma hloi kơ “nơ̆r tơtă athei” sư ‘măn kơ Timôthê noh athei oei tơ pơlei Êphêsô dơ̆ng. Mă khan lei ră, lăm kơthơ mă’bar, sư ‘măn jơnăr wă bơnê kơ Kră Yang gah kon mă sư ‘mêm kơeng tơpă, đơ̆ng tơdrong noh bơ̆n pơhrăm iŏk tơdrong tơ’bưh bơwei rong, pơjing tơiung kăl kơ đei tơdrong kiơ?
Hăm trong kơđeh, ‘bok Pôl pêng ‘măng sư “’blŏk” kơ Timôthê. Adrol hloh sư ‘blŏk kơ Timôthê “ling lang” na krao khan tơgŭm sư. Tơdrong ‘lơ̆ng hloh bơngai ‘bă gah bơhngol tơgŭm kon lăm đon lui noh pơyơ̆r bơngai kon noh kơ ‘Bă kơpal plĕnh ti. Tơdrong “ling lang” ‘blŏk tơ’bôh tơpă tơdrong dŏng tơgŭm Timôthê. Thoi kon sư pơjng kơdih, yua kơ mĕ ‘bă ưh kơ đei layơ ưh tơchĕng ‘blŏk kơ kon hơ’lơ̆p. Tơdrong ‘nâu kư̆m tơ’bôh, ‘bok Pôl krao Timôthê noh “kon mă ‘mêm kơeng”, “kon lăm tơdrong lui”noh tơpă, ưh kơsĭ krao ngôi đĕch ôh.
Mă ‘bar, ‘bok Pôl ‘blŏk kơ “hmoi kơ ih” (trong 4). Yua kơ kiơ ‘bok bơtho Timôthê nhơ̆m hmoi na bơ̆n ưh kơ băt, mălei tơdrong mă bơ̆n băt noh mă khan yua kơ đơ̆ng tơdrong kiơ ‘bok Pôl oei băt kơ tơdrong sơ’ngon dah tơchĕng hơnơ̆ng mă bơngai kon gô hlôi tơ’bơ̆p. Hiơ̆k tơgŭm, pơjing tơiung kơ đe noh mơ̆ng, băt păng lu tơdrong pŭ trăp, dôm tơdrong tơchĕng đơ̆ng ‘nhŏng oh bơ̆n. Phŏ phŏ bơ̆n mơ̆ng đe roi tơdrong anat lu sư, bơ̆n khan lê̆ inh ‘blŏk krao khan tơgŭm kơ ‘nhŏng, mŏ, mălei bơ̆n ưh kơ đei krao khan na hiơt lê̆ tơdrong trăp lu sư noh đơ̆ng rŏng kơ bơ̆n wih brŏk, păng đơ̆ng noh, bơ̆n ưh kơ đei layơ ‘blŏk wă apinh jet dơ̆ng tơdrong mă lu sư roi kơ bơ̆n noh thoi yơ bơih.
Mă pêng, ‘bok Pôl “’blŏk” tơdrong lui Timôthê kơjăp tơpă (trong 5). Sư ưh kơ sĭ ‘blŏk kơ sư nhơ̆m hmoi, tơdrong pŭ trăp, na sư kư̆m băt hơđăl, krao anăn păng pơdrŭt tơdrong pran lăm bơngai noh. Bơngai bơwei, tơ iung gah bơhngol kăl kơ hiơ̆k tơgŭm wă kơ buăl juăt bơngai bơ̆n bơwei đei tơdrong pran kiơ, đon lui bơngai noh dang ei thoi yơ, lu bơngai lăm hnam dơnŏ bơngai noh đei đon lui thoi yơ, đei ‘bơm kiơ dih băl ưh. Dah ưh kơ ‘mêm tơpăt tơpă, ưh kơ tơguăt băl tơpă lei na anat dêh wă bơwei rong băl đei yua.
Lu bơ̆n pôm đon lăm tơdrong krao khan,
Ơ Kră Yang, inh bơnê kơ Ih yua inh băt Kră Yang păng kơjăp yua kơ đơ̆ng bơngai năm adrol ‘blŏk kơ inh đơ̆ng tơdrong krao khan, mơ̆ng dôm tơdrong tơchĕng păng pơdrŭt inh. Apinh tơgŭm rai ‘lơ̆ng hloh păng pơm kiơ̆ dôm tơdrong inh đei pơhrăm iŏk wă kơ inh wơ̆ ‘lŏ, pơ̆n nuih bơ̆jang lăm hnam Kră Yang rai hloh. Krao khan yua Anăn Kră Yang Yêsu Krist, Amen.
Ơ đĭ đăng lu bơngai mơ̆ng mă ‘mêm kơeng,
Lăm giĕng ‘nâu, bu mă bơ̆n gô pơm tơ’bôh lăm tơdrong hiơ̆k tơgŭm? Bơ̆n ‘bôh bơ̆n kăl kơ rai ‘lơ̆ng hloh tơdrong kiơ wă kơ gơh bơwei, hơ tŏk bơngai nai ‘lơ̆ng hloh?
Hiơ̆k tơgŭm, hơ tŏk ‘nhŏng oh
Lăm nơ̆r krao khan, ưh kơ achăng
Krao khan kơ Kră Yang ling lang
Wang hơdai pơdrŭt, đon lui rai ‘lơ̆ng hloh.
Đŏk Sơ̆p Hla bơar ‘Bok Kei-Dei lăm pêng sơnăm: Êsơtê 2
Kênh Youtube BHKTHN:
