Blŭng a 10:1-4, 6-7, 21, 32
“Noh lu adrĕch adrung pêng ‘nu kon drŏ-nglo Nôê, kiơ̆ kơ chăl păng kon pơlei sư; păng yua kơ lu sư noh na đĭ-đăng adrĕch adrung klah asong băl jơ̆p kơpal teh đơ̆ng rŏng kơ đak lơ̆p.” (Blŭng a 10:32)
Nơ̆r jet tơchĕng pơwao:
– Đe chih hơrĭ hơrĭ anăn lu ‘bok kơdră lăm Hla bơar, lăm noh đe kư̆m chih anăn ‘bok Nimrôt, đe roi tơdrong sư noh sele hloh kơ anăn lu bơngai nai, yua kơ kiơ?
– Bơ̆n hŏk iŏk tơdrong kiơ đơ̆ng tơdrong ‘noh hei păng hŏk iŏk tơdrong kiơ đơ̆ng anăn lu ‘bok kơdră gah lu adrĕch adrung kơpal teh lĕch đơ̆ng ‘bok Nôê?
Bơ̆n kăl kơ ‘măn jơ đŏk đĭ lăm Hla bơar Blŭng a chăl 10, noh đe chih hơrĭ hơrĭ anăn lu ‘bok kơdră adrĕch adrung Nôê. Akŭm pơđĭ anăn lu ‘bok kơdră mă đei pao lăm noh đei 70 ‘nu, đơ̆ng lu sư noh bơih na đei hĭ đĭ-đăng adrĕch adrung kon bơngai kơpal teh âu.
Anăn lu ‘bok kơdră noh lơ truh tơ 70 ‘nu, lăm noh đei anăn ‘bok Nimrôt, đe chih roi tơdrong arih ‘bok Nimrôt ‘nâu sele dêh (trong 8-12). ‘Bok Nimrôt ‘nâu “sư bơih bơngai mă nuih blŭng-a kơpal teh âu.” (trong 8). Sư pơjing lu dêh char, lăm noh đei Babel (noh wă khan Babilôn). Sư pơdơ̆ng pơjing pơlei tih Niniwe, pơlei tih noh đe ư hơnhang ang hơnhông, wơ̆ tŏk pran kơtang, đơ̆ng rŏng kơ ‘noh đunh, pơlei tih noh jing pơlei tơm lăm dêh char Asiri. Đunh đơ̆ng rŏng kơ ‘noh jing dêh char Asiri păng dêh char Babilôn, ‘bar tŏ dêh char noh tih să pran kơtang blah kon pơlei Kră Yang păng pơm lơ tơdrong kơnê̆ hơlĕnh pơdăr. Đơ̆ng tơdrong đe chih roi sele, roi pơdeh tơdrong arih ‘bok Nimrôt, sư noh dang tang măt kơ minh adrĕch rơgei mă-lei kư̆m ‘bĕnh kơ tơdrong pơang. Hla bơar Nơ̆r ‘Bok Kei-Dei mă bơ̆n lăng ‘nâu roi pơdah tơdrong arih kon bơngai đơ̆ng rŏng kơ đak lơ̆p noh pha ra kơ adrol sơ̆. Tơ noh đei minh adrĕch rơgei mă-lei arih ưh kơ hli yom kơ Kră Yang. Đơ̆ng ‘bok Ađam yă Ewơ noh, bơ̆n lăng ‘bôh ‘bar adrĕch adrung, minh pah noh lui yom kơkuh kơ Kră Yang, bơngai tang măt noh Abel, na đơ̆ng rŏng kơ ‘noh đunh đei hĭ ‘bok Sêt. Oei pă minh pah dơ̆ng noh adrĕch mă ưh kơ hli yom, ưh kơ lui kơkuh kơ Kră Yang, ‘bok Kain bơih tang măt adrĕch ‘nei. Ngeh kơ tơdrong hơ’mon kơ ‘bar adrĕch adrung noh tôch đĭ ‘bơ̆t đak lơ̆p noh bơih, mă-lei tă tơ ưh! Oei pơtrơp, khŏm lah khŏm lah hloi đĕch.
‘Bok Nimrôt sư kon sâu ‘bok Cham,’bok Cham noh bơngai mă ưh kơ chu yom kơ ‘bă sư ‘bok Nôê. Đĭ-đăng adrĕch kon bơngai jơ̆p kơ teh đak âu tă kơ lĕch đơ̆ng ‘bok Nôê ngăl, mă-lei lăm noh đei adrĕch adrung hli yom kơ Kră Yang, kư̆m đei adrĕch adrung blah Kră Yang. Nimrôt ‘nâu anăn sư pha ra kơ đe, mă-lei ưh minh anăn sư ‘nâu đĕch ôh pha ra kơ đe. Lăm trong 21 roi hơlen minh ‘nu bơngai nai dơ̆ng kư̆m kon ‘bok Nôê mơ̆n, anăn sư Sem. Bơ̆n mơ̆ng iă dêh ‘bơ̆t dâu, ‘bok Sem ‘nâu Nơ̆r ‘Bok Kei-Dei chih roi anăn sư tơgep hăm anăn adrĕch adrung sư hloi, thoi âu: “Sem pơjing adrĕch Hêbrơ.” (Sem ‘bok kơdră adrĕch Hêbe). Đơ̆ng rŏng kơ ‘nei,‘bơ̆t chăl ‘bok Abraham noh bơngai Hêbrơ; Hêbrơ ‘noh đe krao kiơ̆ kơ anăn ‘bok Hêbe ‘nâu hei, ‘bok Abraham ‘nâu bơih‘bok kơdră adrĕch Hêbrơ, bơngai Hêbrơ noh bơih kon sâu ‘bok Hêbe ‘nâu. Thoi noh bơih, kơtă lăm anăn lu ‘bok kơdră ‘nâu bơ̆n ‘bôh kon bơngai bơ̆n yoch tơpă, mă-lei kư̆m ‘bôh Kră Yang ‘Bok Kei-Dei Tơngla pơkă sĭt, Sư kư̆m Tơngla ‘mêm mơnat tih. Đơ̆ng adrĕch adrung ‘bok Sem noh, Kră Yang rơih iŏk ‘bok Abraham wă pơjing minh adrĕch minh khul kon pơlei oei lăm Sư pơgơ̆r.Kư̆m đơ̆ng adrĕch ‘nâu mơ̆n, ‘Bok Krist jur bơih tơ ala teh, jang keh bơih tơdrong tơdă dŏng pơklaih đĭ-đăng kon bơngai. Tơpă, rim ‘nu lăm anăn lu ‘bok kơdră noh tă kơ đei minh tơdrong kăl lăm tơdrong hơ’mon tih să ‘Bok Kei-Dei noh.
Ơ Kră Yang, inh bơnê kơ Ih yua kơ Ih ‘Bok Kei-Dei Tơ’ngla wei pơgơ̆r đĭ-đăng adrĕch adrung kon bơngai lăm teh đak âu. Mă khan kon bơngai ayăt kơ Ih, blah Ih ră, mă-lei tơdrong tơdă Ih wă dŏng pơklaih kon bơngai đĭ hơmet lê̆ đơ̆ng blŭng a sơ̆ bơih.Apinh Ih tơgŭm inh băt wang dŏng hơdai lăm tơdrong tơdă tih Ih hơmet wă dŏng pơklaih kon bơngai noh, inh dŏng hơdai ră roi kơ đe tơdrong Ih‘mêm mơnat dŏng pơklaih noh. Inh krao khan yua anăn Kră Yang Yêsu Krist, Amen!
Bơ̆n hăm băt ưh tơdă ‘Bok Kei-Dei hơmet ‘lơ̆ng dêh ‘măn kơ đĭ-đăng adrĕch adrung kon bơngai lăm teh đak âu,lăm noh đei bơ̆n kơdih hai mơ̆n?
Đŏk Sơ̆p Hla bơar ‘Bok Kei-Dei lăm pêng sơnăm: Nêhêmi 8
Kênh Youtube BHKTHN:
