Klei Aê Diê Blŭ: Klei Bi Hriêng 27:11
Êlan kliăng: “Ơ anak kâo, brei ih mâo klei thâo mĭn, leh anăn bi mơak kơ ai tiê kâo, snăn kâo dưi lŏ wĭt lač kơ hlei pô ƀuah kâo” (Klei Bi Hriêng 27:11)
Klei êmuh ksiêm mĭn: Si Mtao Salômôn mtrŭt brei tui duah klei thâo mĭn? Si bruă ngă hŏng klei thâo mĭn bi hmăi kơ pô mkăn? Ya klei hriăm drei mâo mơ̆ng klei hriăm anei?
Êlan klei bi hriêng anei klah čŭn êlam kơ klei bi djŏ plah wah klei thâo mĭn, klei mơak, leh anăn klei drei ngă hŏng pô mkăn. Mtao Salômôn mtrŭt brei anak ksiêm mĭn kơ klei anak ruah leh anăn knuih anak amâo djŏ bi hmăi prŏng knŏng kơ klei hdĭp anak pô ôh ƀiădah bi hmăi wăt kơ phung riêng gah msĕ mơh. Klei thâo mĭn ba hriê klei mơak leh anăn bi mlih klei bi mguôp anak.
Hlăm pruê̆ blŭ “brei ih mâo klei thâo mĭn”, Mtao Salômôn mtrŭt drei tui duah klei thâo mĭn hŏng klei hur har, kyuadah hlăm klei thâo mĭn amâo djŏ mâo knŏng hjăn klei thâo ôh ƀiădah mâo wăt klei thâo săng brei mơh, thâo săng leh anăn thâo yua klei hriăm leh djŏ tui si klei Aê Diê čiăng leh anăn ba klei tŭ dưn kơ pô mkăn. Klei Bi Hriêng 4:7 kñăm snei: “Klei knhâo jing klei yuôm hĭn; snăn mă bĕ klei knhâo.” Klei mtrŭt ktang anei čiăng kñăm kơ klei brei tui duah klei thâo mĭn, leh anăn anei jing sa hlăm dŭm mta bruă yuôm hĭn drei dưi ngă.
Pruê̆ blŭ “bi mơak kơ ai tiê kâo” čiăng kñăm kơ klei mơak hlăm jih jang klei bi mguôp. Klei mtrŭt anei bi êdah kơ klei bi kčŭt ktang djŏ kơ klei bi mguôp hlăm gŏ sang leh anăn klei đru bi hơ̆k hdơ̆ng phung ama hŏng phung anak. Tơdah ngă bruă hŏng klei thâo mĭn, drei mjing klei mơak amâo djŏ knŏng kơ drei pô ôh ƀiădah bi mơak wăt kơ phung khăp leh anăn uêñ mĭn kơ drei msĕ mơh. Jih jang klei drei ruah ngă srăng bi mđĭ ai pô mkăn, bi kjăp jih jang klei bi mguôp leh anăn bi êdah klei Khua Yang khăp hŏng klei hdĭp drei.
Drei dôk hdĭp hlăm ênuk bŏ hŏng klei mrâo, klei tui duah klei đru kčĕ brei ênưih snăk. Ƀiădah lĕ, amâo djŏ ôh jih jang klei kčĕ brei mâo klei tŭ sơăi. Klei ksiêm mĭn kơ êlan drei pô tui duah klei thâo mĭn hlăm klei wah lač, hriăm Klei Aê Diê Blŭ leh anăn duah klei bi hriăm mơ̆ng phung kčĕ jing yuôm snăk hlăm klei mkra hdră kơ klei hdĭp drei leh anăn mdơ̆ng atur kjăp kơ klei drei čuăn ngă hŏng klei thâo mĭn kơ drei pô, kơ gŏ sang drei leh anăn bi guh kơang kơ Anăn Khua Yang.
Tơdah ksiêm kơ klei drei ngă grăp hruê, brei drei êmuh drei pô si klei drei blŭ leh anăn klei drei ngă bi mơak kơ phung riêng gah mơ̆ amâodah hơăi. Sa klei blŭ bi mni hŏng klei sĭt, sa bruă ngă jăk, amâodah knŏng klei dôk mđing hmư̆ đuč ăt bi hmăi prŏng mơh kơ pô mkăn. Brei drei bi đru leh anăn bi mđĭ ai hdơ̆ng drei, drei srăng bi êdah klei khăp Khua Yang, jing Pô bŏ hŏng klei khăp. Thâo kral boh yuôm kơ klei thâo mĭn hlăm klei mkŏ mjing klei bi mguôp srăng đru drei hdĭp mâo boh tŭ dưn kơ gŏ sang drei, kơ phung mah jiăng leh anăn kơ phung ƀuôn sang Khua Yang.
Si drei srăng bi mlih knhuah drei hdĭp hlăm klei dôk dơ̆ng ƀơ̆ng huă hdơ̆ng drei čiăng kơ Anăn Khua Yang mâo klei mpŭ mni?
Wah lač: Ơ Ama Pô bŏ hŏng klei khăp, đru kâo thâo mpŭ leh anăn mkŏ mjing klei bi mguôp hŏng jih jang mnuih hlăm klei thâo mĭn Ih čiăng kơ kâo bi guh kơang kơ Ih leh anăn ba klei tŭ dưn kơ pô mkăn. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Nêhêmi 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
