Tơdrong Pơđơ̆k 27:11
“Ơ dăm, mă gơh hơgei, lei na pơm pơhiôk jơhngơ̆m inh, Wă kơ gơh tơl tơwih kơ bơngai mă pơm kơ inh mơlâu.” (Tơdrong Pơđơ̆k 27:11)
Nơ̆r jet tơchĕng pơwao:
– Pơtao Sôlômôn pơlung pơdrŭt thoi yơ wă kơ druh kiơ̆ tơdrong gơh hơgei?
– Bơngai mă jang, pơm gơh hơgei đei ‘bơm kơ bơngai nai liơ?
– Bơ̆n hŏk iŏk tơdrong kiơ đơ̆ng ‘bai pơhrăm ‘nâu?
Nơ̆r pơđơ̆k ‘nâu pơma pơyum kơ tơdrong pơgơ̆p tơ’bưh hơgei păng tơdrong hiôk đơ̆ng bơ̆n noh‘bơm kơ bơngai nai. Pơtao Sôlômôn pơlung pơdrŭt kon sư tơchĕng hơlen gah tơdrong rơih iŏk tơdrong wă mă ‘lơ̆ng trŏ, păng wă kơ jơhngơ̆m kon sư noh thoi yơ hăm Kră Yang, thoi yơ hăm bơngai jih ‘ma, yua kơ dôm tơdrong noh hei ưh kơ pôm ‘bơm tih kơ kơdih akâu kon sư ‘noh đĕch ôh, kư̆m ‘bơm tih kơ bơngai jih ‘ma hai dơ̆ng.
Tơdrong hơgei ba truh tơ tơdrong hiôk chơt păng hơtŭt tơplih jơhngơ̆m mĕ ‘bă, ‘nhŏng, mai, oh, bôl buăl jih ‘ma jing hiôk, jing ‘lơ̆ng.
Lăm lu nơ̆r “athei mă hơgei bĕ”, nơ̆r ‘nâu bơih Pơtao Salômôn pơlung pơdrŭt bơ̆n druh kiơ̆ tơdrong hơgei, druh kiơ̆ noh wă khan pơnam chơchă yua kơ tơdrong noh ưh kơ hơgei lăm kơ̆l’ngok đĕch ôh, tơdrong hơgei ‘nâu pơtôm đơ̆ng hlôh băt hơđăl, kơnăl nhen păng kĕ yua iŏk pơm kiơ̆ hloi dôm đêl kơ̆l ‘ngok bơ̆n hlôh wao tơdrong trŏ lăp hăm tơdrong Kră Yang wă noh, păng pơyua ăn kơ lu bơngai jih ‘ma dơ̆ng. Lăm Hla bơar Pơđơ̆k 4:7 pơma pran thoi âu: “Tơdrong gơh hơgei gĭt kăl hloh; lei iŏk bĕ tơdrong gơh hơgei”. Nơ̆r krao đĭ jơhngơ̆m, krao wă jah tĕnh ‘nâu tơ’bôh rơđah khan athei pơpôi đĭ tôm tơdrong wă kơ đei gơh hơgei,păng đei lơ tơdrong jang kăl nai Kră Yang pơjao athei bơ̆n pơm; tơdrong jang chơchă apinh wă kơ đei gơh hơgei ‘nâu kăl dêh thoi tơdrong jang Kră Yang noh nai ‘noh mơ̆n , Kră Yang kư̆m pơjao, bơ̆n kư̆m gơh pơm. Lu nơ̆r “pơhiôk jơhngơ̆m ‘bă” ‘nâu pơma rơđah hơđăl kơ tơdrong hiôk chơt đơ̆ng mĕ ‘bă truh tơ lu ‘nhŏng, mai, oh, lu bôl buăl bơngai jih ‘ma. Nơ̆r bơtho khan,bơtho pơlung ‘nâu pran dêh pơchrang tơ’bôh jơhngơ̆m ‘mêm băl, pôm đon lăm hnam dơnŏ, mĕ ‘bă yă ‘bok hăm lu kon sâu se đei tơdrong chhôk ngă ‘nă ‘nap dih băl. Mưh bơ̆n jang, pơm gơh hơgei, noh pơm ăn đei tơdrong hiôk, ưh kơ kơdih akâu bơ̆n đĕch ôh hiôk, kư̆m pơm ăn kơ lu bơngai jih ‘ma kư̆m hiôk kơ bơ̆n, ‘mêm kơ bơ̆n, tơchĕng ‘blŏk hiơ̆k kơ bơ̆n. Dôm tơdrong mă bơ̆n rơih iŏk trŏ lăp hăm tơdrong Kră Yang wă na pơm kiơ̆ hloi noh gơh pơlung tơiung bơngai nai, pơdơ̆ng tơiung ming tơdrong pơgơ̆p tơ’bưh hăm mĕ ‘bă yă ‘bok, ‘nhŏng, oh, lu bơngai jih ‘ma dơ̆ng, păng đơ̆ng tơdrong arih bơ̆n noh bơih pơchrang hơdah tơdrong ‘mêm Kră Yang.
Dang ei bơ̆n hơtai arih lăm teh đak mă ‘bĕnh ‘bang kơ tơdrong wă gơh pơma dơnuh, gơh mơ̆ng kơtơ̆ng thoi kơ điên thoăi, kơmăi tinh, tivi …. dôm tơmam ‘nâu hei bơih anih mă bơ̆n chă ‘bônh tĕnh wă kơ đei nơ̆r tơgŭm tơgop,wă kơ đei nơ̆r pơlung pơdrŭt bơ̆n. Mă khan lei ră, ưh kơ trŏ kơ đĭ-đăng tôm tơdrong hlôh băt đơ̆ng điên thoăi, kơmăi tinh noh đei yua ngăl ôh.Tơdrong tơchĕng pơwao đei trong mă bơ̆n kơdih gơh chơchă wă kơ đei tơdrong hơgei noh hăm tơdrong bơ̆n krao khan, pơnam pơhrăm Nơ̆r ‘Bok Kei-Dei păng chơchă tơdrong chông tơ’bôh đơ̆ng lu bơngai mă năm adrol, lu sư tơgŭm tơgop tơdrong tơchĕng, tơnôm thim kơ bơ̆n nơ̆r, ‘noh jing kăl dêh lăm tơdrong bơ̆n tơdă hơmet wă kơ arih thoi yơ tơ anăp noh, păng pơjing ăn đei hơnă kơjăp hơgei gơh rơih iŏk tơdrong kiơ ăn kơ kơdih bơ̆n wă pơm, gơh rơih iŏk tơdrong kiơ ăn kơ hnam dơnŏ bơ̆n pơm na pơm kơ anăn Kră Yang đei ư-ang.
Mưh rim năr bơ̆n tơchĕng hơlen lăng tơdrong pơgơ̆p tơ’bưh bơ̆n hăm lu bơngai jih ‘ma, lei bơ̆n kăl kơ jet kơdih akâu thoi âu: Năr ‘nâu nơ̆r inh pơma, tơdrong inh pơm, inh jang hăm đei ba ăn tơdrong hiôk chơt kơ lu bơngai jum dăr ưh? Pơtih thoi âu: bơ̆n đei nơ̆r bơnê pơư kơ đe tơpă hăm đĭ jơhngơ̆m, dah mă bơ̆n pơm ‘lơ̆ng kơ đe tơdrong kiơ ei, dah mă bơ̆n lăp đon mơ̆ng đe pơma, phŏ dôm tơdrong noh hei ‘bơm jrŭ hlom lăm jơhngơ̆m lu bơngai jih ‘ma pơm kơ lu sư hiôk tơpă. Arih băt pơlung tơiung dih băl, noh bơih bơ̆n pơchrang hơdah tơdrong ‘mêm Kră Yang. Mưh băt kơnăl kơ tơdrong hơgei noh kăl dêh lăm tơdrong pơdơ̆ng tơiung tơdrong pơgơ̆p tơ’bưh bơ̆n hăm lu bơngai jih ‘ma lei ‘noh tơgŭm bơ̆n arih đei yua ăn kơ hnam donŏ, đei yua ăn kơ lu kon pơlei Kră Yang.
Kơkuh kơ Ih ‘Bă Dim găt Băt mơmơnat, apinh Ih bơtho inh băt gĭt kơ tơdrong pơgơ̆p tơ’bưh hăm lu bơngai jih ‘ma, păng apinh Ih tơgŭm inh pơdơ̆ng tơiung tơdrong pơgơ̆p tơ’bưh noh hăm tơdrong gơh hơgei đơ̆ng Ih ăn wă kơ inh ling-lang ư-ang kơ anăn Ih păng arih pơyua ăn kơ lơ bơngai. Inh krao khan yua anăn Kră Yang Yêsu Krist, Amen!
Bơ̆n kăl kơ tơplih tơdrong arih sa thoi yơ lăm tơdrong pơgơ̆p tơ’bưh hăm lu bơngai jih ‘ma wă kơ Anăn Kră Yang đei ư-ang?
Đŏk Sơ̆p Hla bơar’Bok Kei-Dei lăm pêng sơnăm: Nêhêmi 7
Kênh Youtube BHKTHN:
