I Yôhan 4:16-18
“…bơ̆n ‘mêm kơ Sư tơpă wă kơ bơ̆n huay kơ hli kơplah năr Sư wă sek tơlang ning-mônh.”
(I Yôhan 4:17a)
Nơ̆r jet tơchĕng pơwao:
– ‘Bok Yôhan bơtho khan ‘Bok Kei-Dei Sư gah tơdrong ‘mêm mơnat thoi yơ?
– Sư tơbăt ăn tơdrong ‘Bok Kei-Dei ‘mêm mơnat tơpă lăm năr sek tơlang thoi yơ?
– Kơlih kơ kiơ bơ̆n huay kơ hli lăm năr sek tơlang?
‘Bok Yôhan pơma ‘bơm gah tơdrong ‘Bok Kei-Dei ‘mêm mơnat tơpă lăm năr sek tơlang. ‘Nâu bơih jing tơm ăn kơ lu bơngai lui kơ Kră Yang gơnang chang hơmĕng. Tơdrong ‘mêm mơnat ‘Bok Kei-Dei bơih tơgŭm lu bơngai lui hơđơ̆ng huay kơ hli lăm năr tôch kơnh. Sư pơma jăng: “’Bok Kei-Dei Sư gah tơdrong ‘mêm mơnat đĕch.” (trong 16). Dôm tơdrong ‘Bok Kei-Dei pơm, mă đơ̆ng tơdrong sek tơlang tơpăt, kư̆m trŏ lăp hăm tơdrong ‘mêm mơnat Sư. Tơdrong ‘lơ̆ng rơgoh ưh kơ đei tơplơ̆ hăm tơdrong ‘mêm Kră Yang, păng tơdrong ‘mêm ưh kơ pơm tơhiong tơdrong ‘lơ̆ng rơgoh Sư. Tơplih kơ noh, ‘bar tơdrong ‘noh pơgơ̆p băl jing ‘lơ̆ng tôm tơdrong lăm Kră Yang păng đei tơ’bôh tôm mah lăm tơdrong Kon Sư chu lôch huai iŏk kon bơngai bơ̆n.
Yua kơ ‘Bok Kei-Dei Sư gah tơdrong ‘mêm mơnat đĕch, na bơ̆n athei “arih lăm tơdrong ‘mêm mơnt” păng “oei lăm Sư”. ‘Nâu bơih tơdrong tơ’bưh kơjăp hăm ‘Bok Kei-Dei lăm Kră Yang Yêsu Krist. Mưh bơ̆n bơwei tơdrong tơ’bưh hăm Kră Yang, lei bơ̆n gơh oei lăm ‘Bok Kei-Dei, păng ‘Bok Kei-Dei oei lăm bơ̆n (trong 16).
‘Bok Yôhan pơma dơ̆ng: “’Bok Kei-Dei wă kơ bơ̆n ‘mêm kơ Sư tơpă wă kơ bơ̆n huay kơ hli kơplah năr Sư wă sek tơlang ning mônh” (trong 17). Đơ̆ng tơdrong Kră Yang oei hơdai lăm tơdrong arih lu bơ̆n pơm kơ bơ̆n ‘mêm kơ Sư tơpă păng tơgŭm bơ̆n hơđơ̆ng huay kơ hli dơ̆ng ‘bơ̆t anăp Kră Yang lăm năr sek tơlang. Bơ̆n ưh kơ hơđơ̆ng yua kơ đơ̆ng tơdrong pơm ‘lơ̆ng kơdih ôh, mălei hơđơ̆ng yua kơ bơ̆n gah Kră Yang Yêsu păng tơdrong ‘lơ̆ng tơpăt sư krôp gom bơ̆n. Đơ̆ng tơdrong ‘mêm Sư huai iŏk bơ̆n bơih, kư̆m hơmet ăn kơ bơ̆n lăm năr tôch kơnh. Tơdrong ‘mêm mơnat ‘Bok Kei-Dei lăm tơdrong dŏng pơklaih jing tơdrong ‘lơ̆ng tơpăt Kră Yang lăm tơdrong sek tơlang. Mưh ‘Bok Kei-Dei lăng lu bơ̆n. Sư lăng ‘bôh tơdrong ‘lơ̆ng tơpăt Kon Sư krôp gom bơ̆n.
Năr sek tơlang jơ̆ năr chơt hiôk hăm lu bơngai mă oei lăm ‘Bok Krist. ‘Noh bơih jơ năr mă tơdrong jang Kră Yang lăm bơ̆n đei tơ’bôh tôm, păng tơdrong ‘mêm Sư lăm bơ̆n jing ‘lơ̆ng tôm tơdrong. Jơhngơ̆m bơ̆n hơđơ̆ng kơkuh kơ Kră Yang. Lui ngeh kơ ‘Bok Krist pơm keh tơdrong dŏng pơklaih bơih păng bơ̆n đei bơwei lăm tơdrong ‘mêm Sư. Ưh kơ đei kiơ wă tơklah bơ̆n dơ̆ng. Mă khan tơdrong sek tơlang năr tôch kơnh. Thoi noh, bơ̆n tơchĕng kơ năr sek tơlang ning mônh hăm jơhngơ̆m chang hơmĕng, băt kơ ‘Bok Kei-Dei sek tơlang kư̆m băt kơ ‘Bok Kei-Dei huai iŏk bơ̆n bơih hăm tơdrong ‘mêm Sư tơpă.
Ơ Kră Yang, apinh Ih tơgŭm inh ling lang arih lăm tơdrong ‘mêm păng tơ’bưh hăm Kră Yang wă kơ inh huay kơ hli kơplah tơchĕng kơ năr sek tơlang. Apinh Ih wei inh lui gơnang kơ Kră Yang truh tôch wă kơ inh hơđơ̆ng dơ̆ng ‘bơ̆t anăp Kră Yang. Krao khan yua anăn Kră Yang Yêsu Krist, Amen.
Bơ̆n hli tơtăm dah hơđơ̆ng kơplah tơchĕng kơ năr sek tơlang?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 107
Kênh Youtube BHKTHN:
