Klei Aê Diê Blŭ: Klei Mphŭn Dơ̆ng 9:18-28
Êlan kliăng: “Đăm kpiê ruă ôh, kyuadah klei anăn bi mbŭk diih; ƀiădah brei diih bŏ hŏng Yang Mngăt Jăk” (Êphêsô 5:18).
Klei êmuh ksiêm mĭn: Ya klei soh Y-Nôê ngă leh? Si klei phung anak ñu ngă leh? Si jing boh knhal tuč kơ klei ngă anăn? Ya klei bi hriăm drei mâo mơ̆ng klei yăl dliê anei?
Êa lip prŏng ruê̆ leh, klei bi mguôp kơ klei êđăp ênang ngă leh, sa klei hdĭp mrâo dơ̆ng leh. Gŏ sang Y-Nôê mă bruă mkŏ mjing klei hdĭp. Ñu ngă hma, pla ana boh kriăk ƀâo leh anăn dưn yua boh mơ̆ng ai ñu mă bruă. Leh pĕ boh kriăk ƀâo, ñu djiêt êa boh kriăk ƀâo mjing kpiê. Leh anăn tinei, Y-Nôê ngă sa klei soh prŏng: “Ñu mnăm kpiê leh anăn ñu kpiê ruă; ñu đih lưng mlŭn hlăm sang čhiăm ñu” (êlan 21). Mnăm kpiê ngă kơ mnuih mâo lu klei mơak, klei bi kčŭt ai tiê êjai bhiâo, ƀiădah ñu ăt jing klei mplư huĭ mơh kyuadah ñu srăng atăt mnuih kơ anôk kpiê ruă, amâo dưi krơ̆ng pô ôh, ngă bruă hŏng klei tă tăn. Klei Aê Diê Blŭ lač: “Đăm kpiê ruă ôh, kyuadah klei anăn bi mbŭk diih; ƀiădah brei diih bŏ hŏng Yang Mngăt Jăk” (Êphêsô 5:18).
Tơdah jih lăn ala ngă soh leh anăn ngă klei măk ƀai, Y-Nôê ăt dôk kjăp hlăm klei djŏ hnơ̆ng. Ƀiădah tơdah dôk hjăn, bi tlă anăp hŏng klei kđeh tluh, ñu ngă tui si klei kđeh čiăng. Msĕ si Y-Ađam leh anăn H’Êwơ mphŭn dô, klei soh brei diñu ƀuh kơ diñu pô dôk lưng mlŭn leh anăn mâo klei hêñ snăk, snăn mơh klei Y-Nôê kpiê ruă atăt ñu kơ klei dôk lưng mlŭn leh anăn mâo klei hêñ.
Tơdah ƀuh ama dôk lưng mlŭn, phung anak Y-Nôê mâo klei ngă mdê mdê. Y-Čam jing ama kơ Y-Kanaan, ƀuh ama ñu dôk lưng mlŭn amâo mâo đru guôm ôh ƀiădah lĕ lŏ nao hưn kơ pô mkăn, bi êdah klei ama pô dôk lưng mlŭn, lŏ thiăm klei hêñ kơ ama (êlan 22). Ƀiădah lĕ, dua čô anak mkăn, jing Y-Sem leh anăn Y-Japhet duah êlan guôm hĕ klei lưng mlŭn ama diñu (êlan 23). Dua klei ngă anăn atăt truh kơ dua boh knhal tuč mdê mdê. Phung anak čô Y-Čam tŭ klei tăm pah, bi phung anak čô Y-Sem leh anăn Y-Japhet lĕ mâo klei hơêč hmưi (êlan 24-27). Boh knhal tuč kơ klei soh jing ktrŏ snăk, amâo djŏ knŏng truh hlăm mmông anăn mtam ôh, ƀiădah ñu srăng dôk sui.
Klei Y-Nôê kpiê ruă ngă kơ ñu dôk lưng mlŭn, mâo klei hêñ, mơ̆ng anăn ktŭng Y-Čam ngă soh tơdah amâo mâo mpŭ ôh kơ ama ñu, brei ƀuh phung mnuih Aê Diê mtlaih leh mơ̆ng êa lip amâo djŏ jing phung mnuih jăk kluôm ênŭm ôh. Aê Diê bi mtlaih diñu amâo djŏ kyuadah diñu jing jăk klă ôh ƀiădah kyua klei pap Aê Diê. Leh anăn lăn ala leh êa lip kăn djŏ lăn ala jăk klă rei. Tinăn, mnuih ăt bi blah hŏng klei kđeh tluh, ăt srăng gui boh jhat mơ̆ng klei soh. Kyuanăn brei drei knang nanao kơ klei pap Aê Diê čiăng dưi hŏng klei soh leh anăn êbat mbĭt hŏng Khua Yang grăp hruê
Bi mĭn kơ boh jhat mơ̆ng klei Y-Nôê kpiê ruă, si drei čuăn ngă hŏng klei mnăm kpiê biêr leh anăn mnơ̆ng bi rañ?
Wah lač: Ơ Khua Yang, kâo thâo kơ kâo jing mnuih awăt, amâo jing mnuih jăk klă ôh, lu blư̆ ngă tui si klei kđeh tluh, ngă soh brei kâo tlă anăp hŏng boh jhat amâo mâo čiăng ôh. Bi mni kơ Khua Yang kyuadah Ih ăt khăp, leh anăn pap brei klei soh kâo. Akâo klei pap Khua Yang đru kâo dưi hŏng klei soh, leh anăn mă tŭ klei hdĭp êbeh dlai hlăm Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Mika 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
