Blŭng a 8:1-19
“Thoi noh Nôê hăm akăn sư, lu kon sư, lu mŏ mai sư lĕch đơ̆ng duk.” (Blŭng a 8:18)
Nơ̆r jet tơchĕng pơwao:
– Tơdrong “Kră Yang ‘Bok Kei-Dei ‘blŏk kơ Nôê” (trong 1) đei gĭt kăl thoi yơ?
– ‘Bok Nôê đei pơm kiơ lăm jơ mă răp gô đak hrơ̆?
– Lu bơ̆n đei pơhrăm iŏk tơdrong kiơ đơ̆ng tơdrong jang ‘bok Nôê păng hnam dơnŏ lĕch đơ̆ng duk?
Kơplah oei lăm duk wă weh đơ̆ng đak lip tih, na “Kră Yang ‘Bok Kei-Dei ‘blŏk kơ Nôê păng dôm lu sem brem mă mơ̆t hơdai sư lăm duk, na Kră Yang ‘Bok Kei-Dei ăn kial tih tơthu bah tơ kơpal teh, na đak sư dơ̆ng.” (trong 1). Jơ noh đak lơ̆p đĭ tơ kơpal teh đunh tơpă. Nơ̆r “Kră Yang ‘Bok Kei-Dei ‘blŏk dơ̆ng”. Ưh kơ sĭ đĭ hiơt bơih, mălei wă pơma kơ trŏ kơ jơ Kră Yang wă pơm tơ’bôh dŏng pơklaih ‘bok Nôê hăm hnam dơnŏ sư. ‘Noh bơih tơdrong lăm Kră Yang păng Sư pơm tơ’bôh đei roi hơ’mon đơ̆ng sơ̆. Kơplah, yă Rachel akăn ‘bok Jakôp hơwŏng ưh kơ đei kon. Mălei ‘Bok Kei-Dei tơ’bôh tơdrong ‘mêm Sư “Kră Yang ‘Bok Kei-Dei ‘blŏk dơ̆ng kơ Rachel, na Sư mơ̆ng nơ̆r sư apinh păng ăn kơ sư đei hơ’lơ̆p.” (Blŭng a 30:22). Kơplah kon pơlei nhơ̆m hmoi lăm jơ pơm đĭch, “Kră Yang ‘Bok Kei-Dei kơtơ̆ng tơdrong ơh sơ’ngon pơmat-tat lu sư, ‘blŏk hơdơ̆r tơdrong pơgơ̆p hăm Abraham, Isăk păng Jakôp.” (LĐ Êyiptơ 2:24). Kră Yang ‘Bok Kei-Dei bơih Yang tơpăt sĭt ưh kơ đei layơ hiơt nơ̆r Sư pơkă, păng Sư pơm tơ’bôh trŏ kơ jơ năr lăm tơdrong tơdă hơmet.
Lăm jơ năr Kră Yang ‘blŏk kơ Nôê jơ noh Nôê oei hrĕng chang gô đĕch. Tơdrong chang gô sư ưh kơ hrĕng đĕch ưh kơ jang kiơ. Mălei sư oei chơ chă wă kơ băt tơ gah ‘nguaih thoi yơ na sư achăng minh pôm ak păng minh pôm sem kơtơp wă kơ băt đak tam hrơ̆ tơ teh (trong 6-9). Mălei sư ưh kơ đei pơm kiơ̆ kơdih ôh. Mă khan sem kơtơp ưh pă brŏk tơ sư dơ̆ng, wă khan băt hơđăl sư dai chă anih tơ teh hrĕng ‘lơ̆ng, ‘bok Nôê ưh tam mă lĕch đơ̆ng duk ôh mălei sư oei chang gô Kră Yang khan kơ sư ‘mơ̆i (trong 12).
Đơ̆ng rŏng sư kơtơ̆ng nơ̆r Kră Yang khan: “Thoi noh Nôê hăm akăn sư, lu kon sư, lu mŏ mai sư lĕch đơ̆ng duk.” (trong 18). Trŏ kơ jơ năr Kră Yang, đĭ đăng hnam dơnŏ Nôê lĕch đơ̆ng duk, kơplah đak đĭ hrơ̆ bơih, đak lip noh wă pơma kơ tơdrong Kră Yang wă phak, duk noh anih bơ̆n kơ’nơp. Mălei oei lăm duk noh ưh kơ sot ôh, yua kơ anih mă bơ̆n oei ling lang păng oei chang gô noh tơ anih teh hrĕng kro. Kư̆m thoi noh mơ̆n, mă khan lu bơ̆n, bơngai mă dan đon lui kơ Kră Yang Yêsu Krist, đei gơh “mơ̆t lăm duk” ưh pă tơtăm bơih gah tơdrong phak yoch kơnê̆, păng đei Kră Yang ăn jơhngơ̆m pran kĕ jei đơ̆ng tơdrong pran yang kơnê̆. Mălei tơdrong mă lu bơ̆n oei chang gô noh ưh kơ trŏ kơ kư̆ kơ arih tơ ala teh âu, mălei noh bơih trŏ kơ pă đei tơdrong yoch bơih. ‘Noh trŏ kơ jơ bơ̆n tơplih akâu ‘nao păng oei hơdai Kră Yang ling lang tơ dêh char ‘lơ̆ng rŏ Sư.
Ơ Kră Yang, inh bơnê kơ Ih yua kơ Ih đei dŏng pơklaih inh đơ̆ng tơdrong phak yoch, kơplah inh lui kơ Kră Yang Yêsu. Ih kư̆m ăn kơ inh mơsêh pran kĕ jei đơ̆ng tơdrong pran yang kơnê̆ lăm chăl arih inh rim năr. Jơhngơ̆m inh chang gô jơ năr tơ’bơ̆p Ih păng oei hơdai Ih ling lang. Anih mă ưh pă đei tơdrong yoch bơih. Krao khan yua anăn Kră Yang Yêsu Krist, Amen.
Lu bơ̆n hăm chang gô jơ năr “Lĕch đơ̆ng duk” wă năm tơ anih ‘lơ̆ng rŏ ling lang, ưh pă ‘bôh tơdrong yoch bơih ưh?
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Tơ’bôh 16
Kênh Youtube BHKTHN:
