I Timôthê 5:3-16
“Bơngai adro tơpă ưh kơ đei bu wă ‘me sư na sư lui kơ ‘Bok Kei-Dei gô tơgŭm sư. Sư krao khan kơ ‘Bok Kei-Dei ling lang apinh Sư tơgŭm.” (I Timôthê 5:5)
Nơ̆r jet tơchĕng pơwao:
- Đei dôm trong lăm tơdrong arih bơngai adro, păng dôm lu trong ‘noh arih thoi yơ?
- Tơ’blŏk kơ bơ̆n tơdrong kiơ đơ̆ng trong arih ‘noh?
Tơdrong arih bơngai adro sơ̆ ưh kơ ‘bônh ôh. Lăm Sơ̆p hla bơar ‘Bok Kei-Dei lơwơ̆t pơma kơ khul bơngai athei hiơ̆k tơgŭm, wei lăng kơ bơngai adro (Bơtho Khôi Juăt 10:18; 14:29; 24:21,…) Lăm chăl trong nơ̆r ‘Bok Kei-Dei năr ‘nâu ưh kơ sĭ khan nơ̆r tơ’blŏk đơ̆ng jơ̆ng ‘bang Pôl ‘măn kơ bơngai wei chông anhăk gah tơdrong jang athei hiơ̆k wei rong lu bơngai adro noh mă arih lăm tơdrong pơmat tat gah sĕch akâu akar truh tơ tơmam.
Đei ‘bar trong arih bơngai adro đei pơma ‘bơm lăm trong 3-16. Mă mônh, lu bơngai adro ‘lu sư jing yoch yua kơ lu sư ưh kơ pơm kiơ̆ thoi lu sư pơkă kơ Yêsu adrol’ (trong 11-15). ‘Nâu lu bơngai adro oei hơmuh hơmŏng, păng kư̆m đei pơma ‘bơm kơ bơngai ưh pă ‘lơ̆p hơmuh hơmŏng. Tơdrong lu bơngai ‘nâu ưh kơ wă jang păng “chă pơma plĕch kơ đe”, “pơma tơdrong ưh kơ trŏ kơ nơ̆r pơma” (trong 13). Lu bơngai adro mă rơhơi wă thoi ‘nâu yua jơnăr huach kư̆ kă, rai pơrăm lê̆ tăm, chă pơma roi tơdrong đe, pơma kơnê̆ bâu roi sa đe. Lu sư jơ̆ bơngai adro oei moh “chă tơdrong wă kơ chơt”, lu bơngai thoi noh “hŭt lê̆ tơdrong jang Yêsu Krist” (trong 11) păng “a-chăng lê̆ tơdrong lui sư na jing kiơ̆ yang Sa-tan” (trong 15). Đei tơdrong thoi noh tơm sư noh lu bơngai mă adro ‘nâu lu sư juăt kơ chă pơm tơklah bătl tơduă bơngai păng pơm kơ lu sư achăng lê̆ Kră Yang.
Mă ‘bar ‘noh lu bơngai adro mă “lui kơ ‘Bok Kei-Dei’. ‘nâu lu bơngai adro mă ‘măn jơnăr lăm tơdrong “krao khan kơ ‘Bok Kei-Dei apinh Sư tơgŭm” (trong 5) “sư tơgŭm lu bơngai đei tơdrong gleh pơmat tat” (trong 9-10). Pơma pha biơ̆, lu sư jơ̆ bơngai mă ưh kơ hrăt hrot gah tơdrong wei rong kơ hơ’lơ̆p thoi noh đei yua jơnăr lăm tơdrong arih gah bơhngol hăm Kră Yang păng jing bơngai đei yua ăn kơ bơngai nai. Lu sư ưh kơ “nơ̆k tu nơ̆k bơbah” ôh, na yua iŏk jơnăr kơ dôm tơdrong tơgŭm kơ bơ̆n kơdih jê̆ Kră Yang păng đei yua kơ Kră Yang lơ hloh.
‘Bok Bơtho Warren W. Wiersbe khan, đei hlôi mơn tơ’bôh lu bơngai adro mă lui yom noh “hnam kơmăi điên thoăi gah bơhngol Khul Bơngai Lui”. Lu sư bơih tơdrong pran đơ̆ng dôm tơdrong pơgơ̆p krao khan. Lu sư pơyơ̆r akâu lăm tơdrong năm ngôi, pơlung, mơ̆ng đe roi pơma. Tơplơ̆ dơ̆ng, lu bơngai adro mă ưh kơ lui yom, noh tơdrong anat kơ Khul Bơngai Lui, yua kơ lu bơngai ‘nohwă dêh kơ Khul Bơngai Lui lăng sư, jing “hnam kơmăi pơm ngar ŭnh”, nŏng kơ jŏk, tơtok chrih, pơma kơ bơngai nai.
Mă khan bơ̆n bơngai adro dah ưh, apinh Kră Yang ‘nĕ ăn kơ bơ̆n alah ngôi đĕch nơ̆k tu nơ̆k bơbah, ưh kơ pơma tơdrong ưh kơ kăl kơ pơma, mă lei athei yua iŏk dôm jơnăr rơhơi kơ dôm tơdrong jang đei yua, rai lui kơ Kră Yang wơ̆ tŏk păng “măng năr hơdrin krao khan”
Ơ Kră Yang, inh oei yua iŏk jơnăr inh kơdih brah brư păng pơrăm lê̆. Apinh Kră Yang ling lang krăng kơchăng wă yua iŏk jơnăr thim jơ-hngơ̆m lui gơnang kơ Kră Yang, hơdrin krao khan păng pơm dôm tơdrong jang đei yua kơ Kră Yang. Krao khan yua anăn Kră Yang Yêsu Krist, Amen.
Bơ̆n athei yua iŏk jơnăr wăn rơhơi bơ̆n thoi yơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Đaniel 3
Kênh Youtube BHKTHN:
