Klei Aê Diê Blŭ: Y-Êsai 58:11
Êlan kliăng: “Yêhôwa srăng atăt ih nanao; Ñu srăng bi trei ih hlăm anôk lăn yang hruê hơr, leh anăn Ñu srăng brei klang ih jing ktang. Ih srăng jing msĕ si sa boh war djam arăng krih êa, msĕ si sa akŏ êa amâo thâo khuôt ôh” (Y-Êsai 58:11)
Klei êmuh ksiêm mĭn: Khua pô hưn êlâo Y-Êsai brei thâo ya klei Aê Diê ƀuăn kơ phung ƀuôn sang Ñu? Si srăng ngă čiăng digơ̆ dưi mă tŭ klei ƀuăn anăn? Si ngă drei mă tŭ klei ƀuăn anei čiăng mâo klei êđăp ênang hlăm thŭn mrâo?
Hlăm Y-Êsai kdrêč 58, Aê Diê ƀuah phung ƀuôn sang Ñu hdĭp hŏng klei mgưt, amâo mâo kpă leh anăn kƀah klei khăp wăt tơdah diñu djă pioh klei bhiăn klei đăo dưn. Êlan 11 jing klei Aê Diê ƀuăn srăng brei klei jăk jĭn mơ̆ng mnơ̆ng ƀơ̆ng huă hlŏng kơ mngăt kơ hlei pô thâo kmhal kơ klei soh, lŏ wĭt kơ klei hdĭp kpă ênô.
Tal sa, Aê Diê srăng atăt phung anak Ñu. Pruê̆ blŭ “srăng atăt ih nanao” čiăng lač kơ klei Aê Diê kiă kriê nanao amâo mdei ôh. Ñu atăt ba leh anăn dôk mbĭt hŏng drei nanao hlăm grăp knhuang êbat ktuê êlan êbat myang. Dưi dôk ti gŭ klei Khua Yang kiă kriê drei amâo huĭ kơ klei srăng wơr dliê ôh. Tal dua, Aê Diê srăng čiêm rông drei, boh blŭ “bi trei” lŏ mblang jing êbeh dlai, drei srăng ƀuh klei Aê Diê tuh brei êbeh dlai wăt tơdah dôk hlăm “anôk lăn yang hrue hlơr”. Anei jing klei ƀuăn rơ̆ng đru drei tui hlue Khua Yang hŏng klei hơĭt wăt tơah amâo thâo ôh si klei hdĭp ti anăp srăng jing. Tal tlâo, Aê Diê srăng bi ktang drei čiăng drei dưi găn klei dleh dlan. Pruê̆ blŭ “brei klang ih jing ktang” lŏ mblang jing bi ktang, thiăm ai ktang. Klei Aê Diê đru krơ̆ng srăng đru drei dưi găn klei êmăn, êlan dleh dlan čiăng kơ drei lŏ êbat nao phă anăp tơl tuč êlan êbat myang. Tal pă, Aê Diê ăt răng kriê nanao. Pruê̆ blŭ “sa boh war djam arăng krih êa” jing rup sa boh war djam krih djăp êa, ana kyâo mtah mda leh anăn mboh lu. Klei hdĭp mngăt phung mâo Aê Diê răng kriê jing msĕ si sa hnoh êa êđăp đoh nanao amâo tuôm khuôt ôh.
Tơdah dlăng kơ jih jang klei rŭng răng truh kơ lăn ala, drei amâo thâo ôh ya srăng truh hlăm 365 hruê ti anăp, ƀiădah klei drei thâo sĭt nik jing drei dôk kkuh mpŭ kơ Aê Diê Pô sĭt suôr, Pô amâo tuôm mlih ôh, leh anăn klei Ñu ƀuăn dôk nanao hlŏng lar. Drei thâo tơdah drei hdĭp hŏng klei kpă ênô leh anăn hŏng klei khăp hŏng jih ai tiê, sĭt nik Khua Yang srăng êbat mbĭt hŏng drei nanao jih thŭn mrâo anei leh anăn hlŏng kơ hruê Ñu lŏ hriê. Drei đăo sĭt nik Ñu srăng brei kơ drei mnơ̆ng ƀơ̆ng huă bi djăp kơ grăp hruê (Y-Mathiơ 6:11). Drei đăo Ñu ăt brei klei jăk jĭn, leh anăn bi ktang drei čiăng kơ drei êbat mbĭt hŏng Ñu ktuê êlan myang hŏng ai ktang mrâo Ñu brei. Drei đăo sĭt nik Khua Yang ăt dôk răng kriê, khăt mkra čiăng kơ drei ƀrư̆ hruê ƀrư̆ mboh lu hĭn, klei hdĭp drei ba klei tŭ dưn leh anăn bi guh kơang kơ Anăn Khua Yang hĭn. Akâo Khua Yang đru drei duah Ñu hlăm Klei Ñu Blŭ, hdĭp hŏng klei khăp leh anăn mă bruă kơ mnuih mkăn, čiăng kơ drei mâo klei hơ̆k mơak leh anăn klei êđăp ênang hlăm thŭn mrâo.
Adôk mâo mơ̆ klei ngă kơ drei rŭng răng tơdah mŭt hlăm thŭn mrâo anei?
Wah lač: Ơ Khua Yang Pô Mâo Jih Klei Myang, kâo thâo kơ Ih kiă kriê jih jang klei leh anăn Ih dôk mbĭt hŏng kâo ară anei hin leh anăn truh kơ êdei anăp. Đru kâo êbat hŏng Ih hŏng klei hơĭt hlŏng kơ jih thŭn mrâo anei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
