Klei Aê Diê Blŭ: Klei Mmuñ Hđăp 116:12-14
Êlan kliăng: “Ya dŏ kâo srăng bi wĭt kơ Yêhôwa, kyua jih klei jăk Ñu ngă leh kơ kâo?” (Klei Mmuñ Hđăp 116:12)
Klei êmuh ksiêm mĭn: Si pô čih Klei Mmuñ Hđăp 116 thâo kral klei jăk Aê Diê? Ya klei ñu ƀuăn srăng bi wĭt kơ klei jăk Aê Diê? Sa thŭn leh êgao, si ih thâo kral klei jăk Aê Diê? Ya klei drei ƀuăn hŏng Khua Yang hlăm thŭn mrâo?
Êlâo kơ thŭn hđăp êgao thŭn mrâo truh, lŏ dlăng wĭt kơ sa thŭn leh êgao, sĭt nik grăp čô drei bŏ hŏng klei bi kčŭt kyuadah ƀuh klei jăk jĭn Aê Diê ăt tuh êbeh dlai kơ klei hdĭp drei. Pô čih Klei Mmuñ Hđăp 116 yua pruê̆ blŭ “jih klei jăk” hlăm êlan 12 čiăng lač kơ klei jăk êbeh dlai Aê Diê brei leh kơ ñu pô. Ñu thâo jih jang klei jăk Aê Diê brei leh kơ ñu kdlưn êgao hĭn kơ klei ñu tuôm akâo amâodah mĭn. Kyuanăn ñu đăo sĭt nik “jih klei jăk” Aê Diê ăt srăng tuh nanao kơ klei hdĭp ñu. Ñu đăo sĭt nik “jih klei jăk” Aê Diê brei leh kơ ñu hlăm hruê êgao leh, srăng dôk hlŏng kơ ară anei, leh anăn ăt srăng brei nanao truh kơ êdei ênăp.
Kyuadah jing pô mă tŭ leh klei jăk Aê Diê kyuanăn ñu mñă kơ ñu pô hdơr nanao kơ jih klei jăk Aê Diê ngă leh. Boh blŭ “bi wĭt” hlăm êlan 12 čiăng lač kơ klei lŏ bi wĭt, lŏ myơr wĭt, pô čih Klei Mmuñ Hđăp blŭ kñăm kơ klei lŏ bi wĭt hŏng klei čŏng čiăng kyuadah ñu mă tŭ leh lu klei jăk jĭn mơ̆ng Aê Diê. Biădah ñu lač ya dŏ ñu mă srăng lŏ bi wĭt kơ klei jăk prŏng Aê Diê? Ñu knŏng dưi lač kơ Khua Yang ñu ƀuăn srăng dôk sĭt suôr hŏng Khua Yang nanao leh anăn knŏng iêô wah lač kơ Anăn Khua Yang đuč (êlan 13), kyuadah êngao kơ Aê Diê “kâo amâo mâo klei jăk mơ̆ng pô mkăn ôh” (Klei Mmuñ Hđăp 16:2). Lŏ čuê hlăm êlan 14, ñu ƀuăn srăng bi wĭt kơ klei jăk Aê Diê hŏng klei ñu srăng bi sĭt klei ñu ƀuăn “ti anăp jih jang phung ƀuôn sang” Aê Diê. Boh blŭ “bi sĭt” čiăng lač kơ klei bi sĭt kluôm ênŭm klei ƀuăn leh hŏng Aê Diê. Klei ñu bi êdah klei ñu bi sĭt klei ƀuăn ti anăp jih jang mnuih anăn amâo djŏ ñu čiăng hưn ktưn ôh, ƀiădah jing bruă ngă klă hŏng klei lŭ gŭ, bi luă gŭ ñu pô kyua thâo kral klei jăk Aê Diê. Klei anei mtrŭt lu mnuih bi mni kơ Aê Diê msĕ mơh tơdah ƀuh klei pô čih Klei Mmuñ Hđăp dôk sĭt suôr.
Dlăng wĭt kơ sa thŭn hđăp êgao leh, brei drei yap jih klei jăk Aê Diê brei leh kơ drei pô leh anăn kơ gŏ sang drei čiăng drei ƀuh Aê Diê brei leh kơ drei klei jăk lu êbeh. Bi mni lač jăk kơ Khua Yang kyuadah Ñu brei klei jăk kơ drei nanao, klei jăk Ñu amâo tuôm hrŏ ôh, drei knŏng dưi lač kơ Ñu snei: “Ya dŏ kâo srăng bi wĭt kơ Yêhôwa, kyua jih klei jăk Ñu ngă leh kơ kâo?” (êlan 12). Akâo Khua Yang đru drei grăp thŭn găn gao, drei thâo lač jăk kơ Ñu lu hĭn, dôk kjăp hŏng Ñu hĭn, leh anăn bi êdah klei dôk sĭt suôr hŏng Ñu hĭn. Yap bĕ jih klei jăk Aê Diê brei leh, leh anăn msĕ mơh, lŏ ksiêm wĭt bĕ mâo mơ̆ klei drei ƀuăn leh kơ Khua Yang ƀiădah ka yŏng bi sĭt ôh, ƀuăn rơ̆ng bĕ srăng bi sĭt mtam hlăm thŭn mrâo anei.
Drei thâo mơ̆ ya klei jăk drei mă tŭ leh sa thŭn êgao?
Wah lač: Ơ Khua Yang khăp ơi! Ya dŏ kâo mă čiăng bi wĭt kơ jih klei jăk Ih brei leh kơ kâo hlăm sa thŭn êgao. Brei kâo dôk kjăp sĭt suôr hŏng Ih hĭn, hdĭp bi mơak kơ Ih hĭn hlăm thŭn mrâo anei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
