Phau Ntawv Nkauj 116:12-14
Nqe cim:
“Tus Tswv ua txhua yam zoo rau kuv, kuv yuav muab dabtsi pauj nws txiaj ntsig?” (Phau Ntawv Nkauj 116:12)
Lus nug xav:
– Tus uas sau Phau Ntawv Nkauj 116 zeem paub tus Tswv txoj koob hmoov zoo li cas?
– Nws coglus li cas kom pauj tau tus Tswv txiajntsig?
– Ib xyoos dhau los, koj zeem paub tus Tswv txoj koob hmoov zoo li cas?
– Peb puas muaj kev coglus li cas rau tus Tswv xyoo tshiab?
Nyob rau lub sijhawm xyoo laus xaus xyoo tshiab tawm tuaj, saib xyoo tas los muaj kev zoo siab vim pom tej koob hmoov Vajtswv ua pub rau peb kev ua neej puv npho. Tus uas sau Phau Ntawv Nkauj 116 siv nqe lus “txhua yam zoo” hauv nqe 12 los hais txog qhov uas Vajtswv ua zoo rau nws. Tus uas sau phau ntawv no zeem paub tias txhua yam puavleej yog tus Tswv pub rau nws hla qhov uas nws thov lossis txojkev xav. Vim qhov no tus uas sau Phau Ntawv Nkauj ntseeg hais tias tej “yam zoo” uas tus Tswv pub yuav muaj pub rau nws txojkev ua neej. Nws ntseeg ruaj tias txhua yam zoo uas tus Tswv pub rau nws yav tas los, tseem pub ntxiv thiab ua ntxiv mus tom ntej.
Vim yog tus neeg uas tau txais Vajtswv koob hmoov yog li nws hais rau tus kheej tias yuav tsum pauj tus Tswv txiajntsig. Lo lus “pauj” hauv nqe 12 muaj lub ntsiab tias yog muab los, rov fij dua lossis muab rov qab, tus uas sau Phau Ntawv Nkauj hais txog lub siab uas paub pauj txiajntsig thaum tau txais tus Tswv tej koob hmoov ntau yam. Tiamsis nws hais tias tsis paub yuav muab dabtsi los pauj txoj koob hmoov loj uas tus Tswv pub? Tus uas sau Phau Ntawv Nkauj tsuas paub hais rau tus Tswv tias nws coglus ncaj ncees, vamkhom tus Tswv thiab tsuas ua tus Tswv tsaug nkaus xwb (nqe 13), vim “Koj thiaj yog kuv tus Tswv; txhua yam zoo uas kuv muaj puavleej yog koj pub” (Phau Ntawv Nkauj 16:2). Txuas ntxiv nqe 14, nws qhia lub siab pauj tus Tswv txiajntsig tabmeeg“Vajtswv haivneeg tuaj txoos ua ke”. Lo lus “pauj kom tas” muaj lub ntsiab tias yog ua kom txaus tej yam uas coglus rau tus Tswv lawm. Tes haujlwm pauj txiajntsig tabmeeg uas nws ua, tsis yog ua kom tau qhuas tiamsis yog ua tej haujlwm los ntawm kev txo hwjchim, zeem paub tus Tswv. Qhov no kuj ua rau ntau leej koom ua Vajtswv tsaug thaum pom nws lub neej ncaj ncees.
Saib lub xyoo tas los, peb cia li suav tus Tswv tej koob hmoov uas Nws pub rau yus thiab yus tsevneeg kom peb paub tias tus Tswv pub rau peb muaj ntau yam npluamias. Ua Vajtswv tsaug vim Nws niaj hnub pub koob hmoov rau peb, Nws tej koob hmoov tsis muaj hnub tas, peb tsuas paub hais rau Nws tias: “Tus Tswv ua txhua yam zoo rau kuv, kuv yuav muab dabtsi pauj nws txiaj ntsig?” nqe 12). Txhua lub xyoo dhau mus, thov Vajtswv pab kom peb yim paub tus Tswv heev dua, nyob ze Nws thiab qhia tshwm lub siab ncaj ncees nrog tus Tswv mus. Los peb ua ke suav tej koob hmoov uas tus Tswv pub, thiab kuj cheemtsum xav yam uas peb coglus rau tus Tswv lawm puas tau ua tiav, cia li coglus xyoo no ua kom tiav.
Thov Vajtswv,
Vajtswv tus muaj kev hlub, nyuam yaus yuav muab dabtsi los pauj txhua yam zoo uas Koj pub xyoo tas los. Thov Koj pab kom nyuam yaus nyob ze Koj, ua neej rau Koj tau ntsejmuag rau xyoo tshiab. Nyuam yaus tuav Tswv Yexus lub npe thov, Amees.
Peb puas zeem paub tej koob hmoov zoo uas yus tau txais xyoo tas los?
Nyeem Vajluskub hauv peb lub xyoos: I Kauleethaus 5
Kênh Youtube BHKTHN:
