Klei Aê Diê Blŭ: Klei Bi Hriêng 26:4-5
Êlan kliăng: “Đăm bi wĭt klei jhat kơ klei jhat arăng ngă ôh, kăn bi wĭt klei dlao wač kơ klei arăng dlao wač rei; ƀiădah lĕ hơêč hmưi bĕ klei jăk jĭn, kyua kơ klei anăn Aê Diê iêô diih leh, čiăng kơ diih dưi dưn klei jăk jĭn” (I Y-Pêtrôs 3:9)
Klei êmuh ksiêm mĭn: Si klei Mtao Salômôn bi hriăm anak amâo dưi lŏ wĭt lač kơ mnuih mluk? Si ngă lŏ wĭt lač kơ mnuih mluk? Klei hriăm bi hriăm phung đăo kơ Krist ti hnơ̆ng čuăn srăng hdĭp?
Mơ̆ng kdrêč sa hdruôm hră Klei Bi Hriêng mtam, Mtao Salômôn bi hriăm anak ñu thâo kral klă anôk mdê mnuih thâo mĭn leh anăn mnuih mluk: “Klei huĭ mpŭ kơ Yêhôwa jing klei kčưm kơ klei thâo săng; phung mluk bi êmut kơ klei thâo mĭn leh anăn klei bi hriăm” (Klei Bi Hriêng 1:7). Anei jing phung mâo klei thâo săng ƀiădah amâo hdĭp hŏng klei kpă ênô ôh, kyuanăn brei anak răng snăk tơdah lŏ wĭt lač kơ mnuih mluk, thâo hĕ ya ngă amâo brei lŏ wĭt lač ôh, bi tơdah brei lŏ wĭt lač si ngă srăng wĭt lač.
Pô čih Klei Bi Hriêng mtă kơ anak đăm lŏ wĭt lač kơ mnuih mluk tui si klei mluk ñu ôh (êlan 4a), čiăng tlaih kơ boh jhat jing anak pô jing hĕ msĕ si mnuih mluk (êlan 4b). Tơdah anak lŏ wĭt lač kơ mnuih mluk tui si klei mluk ñu, si tô hmô lŏ bi wĭt tui si klei ƀai leh anăn klei soh ñu ngă leh, klei anăn čiăng lač anak ăt tui hlue êlan soh diñu mơh, ti knhal tuč mngăt anak srăng rai tuč (dlăng Klei Bi Hriêng 22:24-25).
Ƀiădah tơdah klei lŏ wĭt lač kơ mnuih mluk jing yuôm, snăn hlăm klei anei pô čih Klei Bi Hriêng mtô kơ anak snei: “Lŏ wĭt lač bĕ kơ mnuih mluk tui si klei mluk ñu” (êlan 5a), klei anăn čiăng tlaih kơ boh jhat kyuadah mnuih mluk mĭn ƀuh kơ ñu jing pô thâo mĭn leh anăn lŏ nao mplư lu mnuih mkăn. Klei bi hriăm hlăm êlan 5 ăt čiăng lač kơ klei brei lŏ wĭt lač kơ mnuih mluk čiăng bi êdah klei soh mnuih mluk tơdah diñu ngă klei mjhua pô mkăn amâodah phung ƀuôn sang, ngă klei bi rŭng ti krah phung đăo, atăt lu mnuih ngă mdê hŏng klei mtô mơ̆ng Klei Aê Diê Blŭ. Wăt tơdah pô lŏ wĭt lač msĕ snăn srăng tuôm hŏng klei arăng ngă jhat, klei dleh dlan, tăp năng wăt srăng tŭ klei hyưt huĭ mơh mơ̆ng mnuih mluk, ƀiădah knang kơ klei thâo mĭn Khua Yang brei, ăt brei drei lŏ wĭt lač mơh.
Phung đăo kơ Krist srăng hdĭp djŏ tui si hnơ̆ng čuăn klei khăp leh anăn klei kpă ênô doh jăk Aê Diê. Hlăm djăp mta klei amâo srăng sa ai amâodah jing msĕ si mnuih mluk ôh; ƀiădah brei drei jing doh jăk msĕ si Aê Diê drei jing doh jăk: “Đăm bi wĭt klei jhat kơ klei jhat arăng ngă ôh, kăn bi wĭt klei dlao wač kơ klei arăng dlao wač rei; ƀiădah lĕ hơêč hmưi bĕ klei jăk jĭn, kyua kơ klei anăn Aê Diê iêô diih leh, čiăng kơ diih dưi dưn klei jăk jĭn” (I Y-Pêtrôs 3:9). Mbĭt hŏng klei anăn, brei drei hur har hưn Klei Mrâo Mrang Jăk brei jih jang mnuig thâo, brei digơ̆ lui hĕ êlan soh leh anăn lŏ wĭt kơ Khua Yang. Mơ̆ng klei anăn, srăng mâo lu mnuih hŏng klei Aê Diê pap digơ̆ srăng hdĭp hŏng klei doh jăk, kpă ênô. Akâo Yang Mngăt Jăk bi hriăm grăp čô drei hdĭp kluôm ênŭm hlăm klei sĭt nik čiăng kơ drei dưi mâo klei thâo mĭn tơdah lŏ wĭt lač kơ mnuih mluk.
Si drei răng hlăm klei blŭ tơdah lŏ wĭt lač kơ mnuih mluk?
Wah lač: Ơ Khua Yang jing Pô bŏ hŏng klei khăp, Pô doh jăk leh anăn kpă ênô, brei bĕ kơ kâo mâo klei thâo mĭn čiăng kơ kâo dưi lŏ wĭt lač kơ jih jang mnuih, amâo mâo bi mguôp amâodah sa ai hŏng mnuih mluk ôh, ƀiădah hdĭp doh jăk čiăng ba Klei Mrâo Mrang Jăk kơ klei bi mtlaih truh kơ jih jang mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
