Klei Aê Diê Blŭ: II Klei Yăl Dliê 36:22-23
Êlan kliăng: “Kyuadah Kâo thâo ya jing hdră Kâo mkra leh kơ diih,” Yêhôwa lač, “hdră brei klei jăk amâo djŏ ôh klei jhat kơ diih, čiăng kơ diih mâo klei čang hmăng kơ êdei” (Y-Yêrêmi 29:11)
Klei êmuh ksiêm mĭn: Ya klei Mtao Sirus brei phung ƀuôn sang Aê Diê ngă? Ya ngă ñu ngă msĕ snăn? Tơdah tuôm hŏng klei knap mñai msĕ si luč jih klei čang hmăng ya drei khăng ngă leh anăn phă anôk drei dlăng?
Hdruôm hră Klei Yăl Dliê bi ruê̆ hŏng klei Y-Sirus mtao Persơ mtrŭn hră brei jih jang phung ƀuôn sang Aê Diê lŏ wĭt kơ ƀuôn sang digơ̆ pô tloh 48 thŭn mơ̆ng hruê arăng bi rai Sang kkuh mpŭ ti ƀuôn Yêrusalem (II Klei Yăl Dliê 36:18-19). Klei anei truh sa thŭn êdei leh Mtao Sirus mdlưh klei mtao čar Ƀaƀilôn kiă kriê. Ñu čiăng ngă jăk kơ klei đăo phung dôk ti gŭ klei ñu kiă kriê, čiăng kơ digơ̆ dưi kkuh mpŭ kơ yang digơ̆ pô.
Boh sĭt gơ̆, jih jang bruă Mtao Sirus ngă dôk hlăm hdră Aê Diê čiăng lŏ bi kơrŭ phung ƀuôn sang Ñu sơăi. Ñu čiăng bi sĭt klei Ñu blŭ leh kyuanăn Ñu mčhur ai tiê Mtao Sirus brei gơ̆ mtrŭn hră brei phung ƀuôn sang Ñu lŏ wĭt mdơ̆ng Sang kkuh mpŭ kơ Yêhôwa. Êlâo dih, hŏng ƀăng êgei Khua pô hưn êlâo Y-Yêrêmi, Aê Diê ƀuăn leh tơdah phung ƀuôn sang Ñu iêo wah lač kơ Ñu, Ñu srăng lŏ wĭt lač leh anăn lŏ atăt ba phung mnă wĭt (Y-Yêrêmi 29:10-14). Ară anei, phung ƀuôn sang Aê Diê mâo klei bi mtlaih leh kyuadah “čiăng kơ klei Yêhôwa blŭ leh hŏng ƀăng êgei Y-Yêrêmi dưi bi sĭt” (êlan 22).
Phung ƀuôn sang Aê Diê tŭ klei bi kmhal kyua klei soh diñu ngă leh. Aê Diê srăng pap brei nanao, lŏ bi kơrŭ leh anăn čiăng kơ Ñu dôk mbĭt hŏng digơ̆ hlăm klei kkuh mpŭ (II Klei Yăl Dliê 13:10-12). Sang kkuh mpŭ arăng bi rai leh ênuk Mtao Nêƀukatnêtsar snăn ară anei Aê Diê čiăng Sang kkuh mpŭ srăng lŏ mkra wĭt. Tơdah Sang kkuh mpŭ lŏ mkra wĭt leh, snăn Aê Diê srăng lŏ bi wĭt mơh klei pap nao mbĭt hŏng Sang kkuh mpŭ. Hlăm klei truh msĕ si luč jih klei čang hmăng, sĭt nik phung ƀuôn sang Aê Diê bi kngăr snăk tơdah ƀuh klei Aê Diê kiă kriê bŏ hŏng klei khăp leh anăn klei pap hlăm klei hdĭp digơ̆. Ară anei, digơ̆ dưi “đĭ nao kơ ƀuôn Yêrusalem” čiăng “mdơ̆ng kơ Ñu sa boh sang yang…hlăm čar Yuđa” (êlan 23).
Hlăm klei drei tui hlue Khua Yang, sĭt nik grăp čô drei srăng tuôm sơăi hŏng klei mâo blư̆ drei ƀuh msĕ si amâo lŏ mâo klei čang hmăng ôh. Lŏ dlăng bĕ kơ klei yăl dliê kơ phung ƀuôn sang Aê Diê čiăng kơ drei ƀuh Aê Diê dôk mbĭt hŏng digơ̆ hlăm jih jang klei truh, wăt hlăm ênuk digơ̆ nao jing mnă hlăm čar tue, Aê Diê ăt srăng lŏ bi kơrŭ digơ̆ mơh. “Yêsu Krist ăt jing msĕ mbruê, hruê anei, leh anăn hlŏng lar” (Hêbrơ 13:8). Hruê anei, Aê Diê ăt dôk mbĭt hŏng drei nanao hlăm jih jang klei truh msĕ mơh. Đăm luč klei čăng hmăng ôh, wah lač bĕ kơ Khua Yang leh anăn đăo bĕ kơ klei Ñu ƀuăn. Jih jang klei Khua Yang ƀuăn leh srăng bi sĭt kyuadah Ñu mâo nanao hdră čiăng pap brei leh anăn lŏ bi kơrŭ drei.
Si ngă drei dôk hdĭp hlăm klei luč klei čang hmăng mơ̆? Ya drei ngă čiăng dôk kjăp hlăm klei čang hmăng hdĭp?
Wah lač: Ơ Khua Yang, brei kâo ăt đăo kơ klei Ih ƀuăn bŏ hŏng klei khăp leh anăn klei pap măng ai ya klei truh hlăm klei hdĭp kâo. Đru kâo dôk sĭt suôr nanao hlăm klei kkuh mpŭ kơ Ih leh anăn gưt kơ klei Ih Blŭ. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
