II Xwmtxheej Vajntxwv 36:22-23
Nqe cim:
“Kuv tib leeg thiaj paub tej uas kuv npaj yuav ua rau nej, kuv yuav pab kom nej vammeej tsis yog ua kom nej puastsuaj, nej thiaj muaj kev cia siab rau yav tom ntej” (Yelemis 29:11)
Lus nug xav:
– Vajntxwv Xailas tso cai rau cov tus Tswv haivneeg ua dabtsi?
– Vim li cas vajntxwv ua zoo li ntawd?
– Thaum ntsib kev txomnyem tas kev cia siab, peb pheej ua dabtsi thiab ntsia rau qhov twg?
Phau ntawv Xwmtxheej Vajntxwv hais xaus cov neeg Pawxias tus Vajntxwv Xailas, tso cai rau tus Tswv haivneeg rov qab los hauv lawv lub tebchaws tom qab 48 xyoo uas lub nroog Yeluxalees raug puastsuaj (II Xwmtxheej Vajntxwv 36:18-19). Qhov xwmtxheej no tshwm muaj ib xyoo tom qab uas Vajntxwv Xailas tua yeej lub tebchaws Npanpiloos. Vajntxwv xav ua kom tiav ib txoj cai uas yog pub cai rau cov neeg raug ua cev qhev tau pehawm lawv tus tswv.
Tseeb tiag, tej uas Vajntxwv Xailas ua puavleej nyob rau hauv Vajtswv txojkev npaj tso Nws haivneeg rov qab los. Nws xav kom ua tiav Nws tej lus cog tseg, yog li Nws tshoov Vajntxwv Xailas siab, ua rau vajntxwv “hloov siab” tso cai rau tus Tswv haivneeg rov los txhim tsa lub Tuamtsev rau tus Tswv. Ua ntej ntawd, los ntawm tus cevlus Yelemis, Vajtswv tau coglus hais tias yog Nws haivneeg thov Nws ces Nws yuav teb lawv tej lus thov thiab coj lawv rov qab los (Yelemis 29:10-14). Nimno, tus Tswv haivneeg dim kev ua qhev vim “tus Tswv thiaj ua kom muaj raws li nws tau hais rau Yelemis tus uas cev Vajtswv lus lawm” (nqe 22).
Tus Tswv haivneeg twb raug lub txim uas lawv ua txhaum. Vajtswv yog tus zoo siab hlo zam txim, cawm lawv thiab nrog lawv nyob dhau los ntawm txojkev pehawm Nws (II Xwmtxheej Vajntxwv 13:10-12). Lub Tuamtsev twb puas rau tiam Vajntxwv Nenpukajnexales kav lawm, tiamsis nimno tus Tswv xav kom rov ua dua lub Tuamtsev. Yog lub Tuamtsev rov ua tau ces txoj koob hmoov hlub nrog rau lub Tuamtsev kuj yuav rov muaj dua. Nyob rau lub tsamthawj tas kev cia siab no, tus Tswv haivneeg yuav xav tsis thoob txog qhov uas pom Vajtswv txojkev hlub thiab koob hmoov yeej tseem nrog nraim lawv. Nimno, lawv tau “rov qab los hauv nroog Yeluxalees txhim kho tus Tswv lub Tuamtsev” (nqe 23).
Nyob hauv lub neej nrog tus Tswv mus, peb txhua tus kuj ntsib raug tej lub sijhawm zoo li uas tsis muaj kev cia siab lawm. Cia li ntsia keebkwm tus Tswv haivneeg kom peb pom hais tias tus Tswv yeej nrog nraim lawv nyob hauv txhua lub tsamthawj, txawm yog thaum lawv raug mus ua qhev rau lwm lub tebchaws, thiab Vajtswv kuj txaus siab hlo yuav coj lawv rov qab los thiab. “Yexus Khetos, nws yeej zoo nws li qub; nag hmo thiab hnub no nws zoo li cas, nws yeej zoo li ntawd mus ibtxhis li” (Henplais 13:8). Nimno, tus Tswv kuj nrog nraim peb nyob hauv txhua lub tsamthawj. Tsis txhob tas kev cia siab, cia li rau siab ntso thov Vajtswv pab thiab ntseeg rawv Nws tej lus cog tseg. Tej lus uas tus Tswv hais yeej muaj tiav, vim Nws yog tus uas npaj txojkev zam txim thiab ua zoo rau peb.
Thov Vajtswv,
Tus Tswv, thov Koj pab kom nyuam yaus niaj hnub cia siab ntsoov rau Koj tej lus cog tseg uas muaj kev hlub thiab koob hmoov, txawm yog nyob rau lub tsamthawj twg hauv kev ua neej. Thov Koj qhia kom nyuam yaus ncaj ncees pehawm Koj thiab ua raws li Koj Txojlus. Nyuam yaus tuav Tswv Yexus lub npe thov, Amees.
Peb puas tabtom ua neej nyob rau lub tsamthawj tas kev cia siab? Peb ua dabtsi kom muaj kev cia siab thiab ruaj siab?
Nyeem Vajluskub hauv peb lub xyoos: I Kauleethaus 3
Kênh Youtube BHKTHN:
