Klei Aê Diê Blŭ: Klei Mmuñ Hđăp 50:1-14
Êlan kliăng: “Ngă klei kpă ênô leh anăn klei djŏ jing klei Yêhôwa mơak lu hĭn kơ mnơ̆ng ngă yang.” (Klei Bi Hriêng 21:3)
Klei êmuh ksiêm mĭn: Si klei Khua Yang kñăm Ñu jing Pô kpă ênô? Si klei phung ƀuôn sang Aê Diê thâo săng ka djŏ hdră êlan ôh čiăng dưi ngă djŏ klă tui si klei kpă ênô Khua Yang čiăng? Si drei ngă čiăng dưi wĭt ngă djŏ klă tui si klei kpă ênô Khua Yang?
Klei Mmuñ Hđăp 50 kñăm Khua Yang jing Khua Phat Kđi Kpă, leh anăn iêô mthưr phung ƀuôn sang ngă leh klei bi mguôp hŏng Ñu, “phung ngă leh klei bi mguôp hŏng Kâo hŏng mnơ̆ng ngă yang” (êlan 5), brei lŏ ksiêm dlăng wĭt ai tiê diñu hlăm klei diñu kkuh mpŭ kơ Aê Diê. Hlăm ênuk Klei Bi Mguôp Hđăp, Khua Yang kñăm Ñu jing Aê Diê klei kpă ênô. Khua Yang ƀuăn srăng brei kơ phung ƀuôn sang Ñu sa boh lăn čar siam klă (êlan 2), wĭt lač kơ klei anăn, brei diñu bi êdah bruă klam hlăm klei bi mguôp hŏng Khua Yang, hŏng klei ngă hlue klei bhiăn myơr mnơ̆ng ngă yang mbĭt hŏng jih jang klei bhiăn mkăn hlăm ƀuôn sang. Khua Yang srăng ksiêm dlăng klei diñu gưt ngă klei bi mguôp anăn hŏng klei khăng ktang, msĕ si hlăm êlan 3, “Ñu amâo dôk ñăt ôh, ti anăp Aê Diê mâo pui trơ̆ng, jŭm Ñu mâo angĭn êbŭ ktang”. Khua Yang bi êdah klei kpă ênô Ñu hŏng klei Khua Yang srăng jing khua phat kđi phung ƀuôn sang Ñu (êlan 6). Khua Yang wăt jing khua phat kđi kơ jih lăn ala msĕ mơh “kyuadah Ñu hriê yơh, Ñu hriê čiăng phat kđi lăn ala. Ñu srăng phat kđi lăn ala hŏng klei kpă ênô, …” (Klei Mmuñ Hđăp 96:13; 9:8).
Ƀiădah lĕ, phung ƀuôn sang Aê Diê thâo săng ka djŏ hdră êlan ôh, čiăng dưi ngă djŏ tui si klei kpă ênô Khua Yang čiăng. Diñu myơr mnơ̆ng ngă yang tui si hdră bhiăn leh anăn mĭndah Khua Yang čiăng kơ biăp leh anăn êmô! Êjai Khua Yang lač leh: “Kâo amâo srăng tŭ ôh êmô knô mơ̆ng sang diih, kăn tŭ rei bê knô mơ̆ng war biăp diih” (êlan 9). Mâo dua phŭn knhal Khua Yang amâo yua ôh mnơ̆ng ngă yang: Tal sa, Khua Yang hrih mjing jih jang mnơ̆ng, “Kyuadah jih jang hlô hlăm kmrơ̆ng jing dŏ Kâo, wăt hlô ti lu êbâo čư̆” (êlan 10). Tal dua, Khua Yang amâo djŏ jing mnuih kmưn ôh čiăng “ƀơ̆ng huă mnăm” jih mnơ̆ng ngă yang anăn: “Tơdah Kâo êpa, Kâo amâo srăng hưn kơ diih ôh; kyuadah lăn ala jing dŏ Kâo, wăt jih jang mnơ̆ng hlăm ñu. Kâo ƀơ̆ng kđeh čĭm êmô knô mơ̆? Amâodah mnăm êrah bê knô mơ̆?” (êlan 12-13). Klei myơr mnơ̆ng ngă yang grăp thŭn, jing klei čiăng mñă kơ phung ƀuôn sang Ñu brei lŏ hdơr kơ klei soh diñu leh anăn thâo hdơr knga bi mni kơ Aê Diê: “Ƀiădah hlăm klei ngă yang anăn mâo klei lŏ hdơr kơ klei soh grăp thŭn.” (Hêbrơ 10:3).
Êlan hdră čiăng wĭt ngă djŏ tui si klei kpă ênô Khua Yang čiăng jing “Myơr klei bi mni kơ Aê Diê jing mnơ̆ng ngă yang, leh anăn bi sĭt klei diih ƀuăn hŏng Pô Ti Dlông Hĭn;” (êlan 14). Mblang jing klei kkuh mpŭ kơ Aê Diê hŏng ai tiê thâo hdơr knga leh anăn gưt ngă hlue Klei Aê Diê Blŭ hlăm klei hdĭp grăp hruê. Khua Yang amâo čoh čuăn kơ phung ƀuôn sang Ñu mnơ̆ng myơr ti êngao ôh: “Kyuadah Ih amâo mơak ôh hŏng klei ngă yang; tơdah kâo myơr kơ Ih mnơ̆ng myơr čuh, mnơ̆ng anăn amâo bi mơak kơ Ih ôh. Mnơ̆ng ngă yang bi mơak kơ Aê Diê jing ai mĭn mčah; Ơ Aê Diê, Ih amâo bi êmut ôh kơ ai tiê mčah leh anăn kmhal kơ klei soh.” (Klei Mmuñ Hđăp 51:16-17). Tơdah hriăm thâo săng leh Aê Diê jing kpă ênô, brei drei kkuh mpŭ kơ Aê Diê hŏng ai tiê sĭt kpă, leh anăn dôk hdĭp hŏng klei hdĭp huĭ mpŭ kơ Ñu, hdơr knga bi mni kơ Ñu.
Ya drei srăng ngă tơdah thâo leh Aê Diê jing kpă ênô?
Wah lač: Ơ Ama kpă ênô! Bi mni lač jăk kơ Ama lŏ mñă leh brei kâo thâo Khua Yang jing Pô kpă ênô. Akâo Khua Yang brei kâo thâo huĭ mpŭ kơ Khua Yang leh anăn kkuh mpŭ kơ Khua Yang hŏng ai tiê đup gưt leh anăn hdơr knga bi mni kơ Khua Yang! Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Amôs 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
