Ntawv Nkauj 50:1-14
Nqe cim:
“Ua ncaj ua ncees thiab ua zoo, txaus tus TSWV siab dua coj tej khoom tuaj fij rau nws” (Pajlug 21:3).
Lus nug rau sawvdaws xav:
– Tus Tswv hais meej Nws yog tus ncajncees li cas?
– Vajtswv haivneeg totaub tsis tau yog qhov uas ua kom txaus siab rau Vajtswv txoj kev ncajncees li cas?
– Yuav ua li cas kom ua tau rau Vajtswv txoj kev ncajncees tsimnyog?
Ntawv Nkauj 50 hais meej hais tias tus Tswv yog tus txiav txim ncajncees thiab Nws nqua hu Nws haivneeg hais tias, “cov neeg uas muab tsiaj tua fij thiab nrog kuv coglus tseg lawm” (nqe 5) yuav tsum tshuaj xyuas dua lawv lub siab hauv kev phem. Tiam Vajluskub qub, Vajtswv hais meej hais tias Nws yog Vajtswv tus ncajncees. Nws coglus yuav pub ib thaj av zoo kawg nkaus rau Nws haivneeg (nqe 2), tiamsis lawv yuavtsum pehawm Nws dhau los ntawm kev fij khoom thiab coj txhua nqe kevcai. Tus Tswv yuav tshuaj xyuas nruj kev coj raws li kev coglus tseg lawd li hauv nqe 3 “nws yuav tsis los ntsiag to, muaj nplaim taws cig sib ntswg yos ntawm nws hauv ntej, thiab muaj khaub zeeg cua ntsawj ibncig nws”. Tus Tswv qhia tshwm Nws txoj kev ncajncees los ntawm qhov uas Nws yuav yog tus txiav txim rau Nws haivneeg (nqe 6). Thiab tus Tswv tseem yog lub ntiajteb tus txiav txim thiab “Nws yuav los txiav txim rau lub ntiajteb.Nws yuav txiav txim ncaj ncees rau lub ntiajteb… (Ntawv Nkauj 96:13; 9:8).
Txawm li ntawd los Vajtswv haivneeg totaub tsis tau yog raws li qhov uas ua kom txaus siab rau Vajtswv txoj kev ncajncees. Lawv fij khoom zoo li kevcai thiab xav hais tias Vajtswv cheem tsum lawv tej yaj thiab tej nyuj! Tiamsis tus Tswv hais tias: “Kuv yeej tsis yuav tej heev nyuj uas nej yug tom tshav zaub lossis tsis yuav nej tej tshis” (nqe 9). Ob qhov vimchiv uas Vajtswv tsis siv cov khoom fij: Tim ib, Vajtswv yog tus tsim ib puas tsav yam, vim “txhua yam tsiaj uas nyob tom havzoov thiab tej nyuj uas nyob puv nkaus saum ntau txhiab lub roob puavleej yog kuv tug” (nqe 10). Tim ob, Vajtswv tsis yog tibneeg uas cheem tsum “noj haus” tej khoomfij ntawd “Yog kuv tshaib plab, kuv yuav tsis thov ntawm nej noj, rau qhov lub ntiajteb thiab txhua tsav yam puavleej yog kuv li. Kuv noj nqaij nyuj lossis haus ntshav tshis thiab los?” (nqe 12-13). Tej khoom fij txhua lub xyoo yog cia ntuas Vajtswv haivneeg nco txog lawv tej kev txhaum thiab ua Vajtswv tsaug: “qhov uas lawv theej lawv lub txhoj ntawd ua rau lawv niaj xyoo nco ntsoov lawv tej kev txhaum” (Henplais 10:3).
Qhov uas ua tau rau Vajtswv txoj kev ncajncees kom tsimnyog yog “Cia li muab nej tej khoom uas nej ua Vajtswv tsaug fij rau Vajtswv, thiab muab rau Vajtswv tus uas muaj hwjchim loj kawg nkaus raws li nej tau coglus tseg lawm” (nqe 14). Txhais hais tias pehawm Vajtswv los ntawm lub siab ua Nws tsaug thiab ua raws li Nws Txojlus txhua hnub. Vajtswv tsis taij Nws haivneeg tej khoomfij sab nraud: “Koj yeej tsis yuav tej khoom uas luag coj tuaj fij; yog koj yuav tej ntawd, kuv yeej yuav coj tuaj, koj tsis txaus siab rau tej khoom uas luag coj tuaj hlawv fij rau koj. Vajtswv, tej uas kuv coj tuaj fij rau koj ces yog kuv lub siab mos siab muag xwb, koj yuav tsis fee plhu rau tus uas txo hwjchim thiab lees nws tej kev txhaum ib zaug li” (Ntawv Nkauj 51:16-17). Thaum uas kawm paub Vajtswv yog tus ncajncees, peb pehawm Nws los ntawm lub siab tseeb, thiab ua neej hwm Vajtswv, ua Nws tsaug.
Thov Vajtswv,
Vaj Leej Txiv Tus uas ncajncees! Ua Koj tsaug uas Koj tau ntuas nyuam yaus hais tias Koj yog Tswv ncajncees. Thov pab nyuam yaus paub hwm Koj, pehawm Koj los ntawm lub siab mloog lus thiab ua Koj tsaug. Nyuam yaus tuav Tswv Yexus Khetos lub npe thov, Amees.
Peb yuav li ua cas thaum uas paub Vajtswv yog Tus ncajncees?
Nyeem Vajluskub hauv peb lub xyoos: Amauj 3
Kênh Youtube BHKTHN:
