I Timôthê 3:14-15
“Inh chih kơ ih kơthơ âu, mă-lei ưh kơ đunh mơ̆n inh wă năm ngôi tơ ih. Dah inh ưh kơ yĕng năm, inh chih kơthơ âu boih wă kơ ih băt bơ̆n ‘nhŏng oh bơngai lui wă pơm thoi yơ lăm hnam ‘Bok Kei-Dei. Bơ̆n bơngai lui jing kon Kră Yang ‘Bok Kei-Dei. Sư boih arih ling lang ưh kơ đei layơ lôch, na lu bơ̆n bơngai lui mă răk tơdrong ‘Bok Kei-Dei kơjăp, trŏ kơ bơ̆n bơtho tơdrong Sư kơ đe nai dơ̆ng.” (I Timôthê 3:14-15)
Nơ̆r jet tơchĕng pơwao:
– ‘Bok Pôl bơtho yua rup ayơ wă pơma gah Khul Bơngai Lui?
– Lu rup sư yua ‘nâu tơ’bôh tơdrong kiơ gah Khul Bơngai Lui?
– ‘Bai pơhrăm ăn kơ bơ̆n păng hnam dơnŏ arih thoi yơ lăm Khul Bơngai Lui?
Kơplah sư bơtho gah Tơdrong ‘Nao ‘Lơ̆ng bơ̆n yua iŏk tơpă, ‘bok Pôl pơdơh ‘mơ̆i kơ tơdrong pơma noh na sư pơma gah tơdrong kơnhăm kơ tơdrong kơthơ sư chih ‘nâu: “Dah inh ưh kơ yĕng năm, inh chih kơthơ âu boih wă kơ ih băt bơ̆n ‘nhŏng oh bơngai lui wă pơm thoi yơ lăm hnam ‘Bok Kei-Dei. Bơ̆n bơngai lui jing kon Kră Yang ‘Bok Kei-Dei. Sư boih arih ling lang ưh kơ đei layơ lôch, na lu bơ̆n bơngai lui mă răk tơdrong ‘Bok Kei-Dei kơjăp, trŏ kơ bơ̆n bơtho tơdrong Sư kơ đe nai dơ̆ng.” (trong 15), đơ̆ng noh, lu bơ̆n kư̆m ‘bôh tôm tơdrong gah tơdrong arih bơngai lui kơ Kră Yang Yêsu Krist lăm Khul Bơngai Lui kơplah noh sơ̆. Sư yua iŏk pêng tơdrong lăm trong 15 wă tơblang gah Khul Bơngai Lui.
Mă minh, Khul Bơngai Lui jơ̆ Hnam ‘Bok Kei-Dei. ‘Bơ̆t anih ‘nâu, lu bơ̆n hlôh yua kơ liơ ‘bơ̆t trong mă sư pơma gah tơdrong lu ‘bok bơtho păng kră hnam yang, ‘bok Pôl bơtho lu sư athei “gơh pơgơ̆r hnam dơnŏ bơ̆n kơdih” kiơ̆ kơ bơ̆n ‘bôh minh pah ‘nâu, hnam wă khan hnam dơnŏ, tơ noh đei tơdrong tơproh ‘lơ̆ng păng gơh pơgơ̆r, nhen thoi ‘bok bơtho păng kră hnam yang lăm tơdrong jang “gơh pơgơ̆r hnam dơnŏ kơdih”; păng rim bơngai lăm hnam dơnŏ gơh bơwei băl, thoi kơ bre klokăn, mĕ ‘bă kon hơ’lơ̆p, thoi đei pơma roi lăm tơdrong ‘lơ̆ng lu ‘bok bơtho păng kră hnam yang. Hnam kŭm wă pơma kơ anih oei đunh sơnăm, anih mă bơ̆n mơn hiôk rơhăo, chơt hiôk. Lăm âu, ‘bok Pôl ưh kơ đei pơma khan Khul Bơngai Lui ‘noh hnam bơngai lui, mălei “ Hnam ‘Bok Kei-Dei”, pơma pơtih kơ anih Kră Yang oei hơdai păng oei ling lang, anih Kră Yang lăp đon gơ̆r.
Mă ‘bar, ‘bok Pôl pơma pơih thim să “Hnam” păng đei tơblang “khul Bơngai Lui kơ ‘Bok Kei-Dei mă arih ling lang”. Nơ̆r “Khul Lui” lăm nơ̆r Grĕk wă khan “khul tơpôl”. Lăm Tơdrong jang 7:38, nơ̆r ‘nâu pơma kơ lu bơngai Isơrael Kră Yang krao sư lĕch đơ̆ng dêh Êyiptơ. Đơ̆ng noh, Khul Bơngai Lui ‘noh tơpôl khul mă Kră Yang đei krao tơlĕch đơ̆ng lăm teh đak. Arih tŏk bŏk lăm teh đak đei lơ tơdrong pơm kơ bơ̆n ‘bônh kơ druh kiơ̆ păng sơng iŏk, Khul Bơngai Lui bơ̆n ‘bônh kơ tơ hiong lê̆ tơdrong mă Kră Yang krao iŏk bơ̆n lĕch hlôi đơ̆ng tơdrong yoch lăm teh đak, tơplih kơ tơdrong bơ̆n hiôk chơt lăm teh đak.
Mă pêng, Khul Bơngai Lui thoi “jrăng păng hơnă kơ tơdrong tơpăt”. Tơdrong ‘nâu trŏ dêh hăm Timôthê ‘bok bơtho oei ‘lơ̆p oei bơ̆jang tơ Êphêsô, tơ pơlei ‘nâu đei anih akŭm tih kơ yang Đian hăm 127 tŏ jrăng. Nơ̆r “hơnă” lăm âu đei pơma kơ tơnăr hnam dah tơmam pĕng găn. Pơtih kơ Khul Bơngai Lui thoi “jrăng păng hơnă kơ tơdrong tơpăt” đei pơma kơ Khul Bơngai Lui pôk tưk tơdrong tơpăt wă kơ lơ bơngai ‘bôh.
Apinh Kră Yang ăn kơ lu bơ̆n păng hnam dơnŏ bơ̆n jing minh khul tơpôl Kră Yang rơih iŏk, păng jing anih bơwei păng kŭm thoi tưk tơiung tơdrong tơpăt Tơdrong ‘Nao ‘Lơ̆ng, wă kơ Khul Bơngai Lui tơ pơlei bơ̆n kơdih păng đĭ đăng Khul Bơngai Lui jơ̆p jang anih jing anih Kră Yang lăp đon oei hơdai.
Ơ Kră Yang, phŏ inh hiơt hiong tơdrong kăl Khul Bơngai Lui ‘noh kiơ păng Khul Bơngai Lui oei đei wă pơm kiơ. Apinh Ih tơgŭm inh lăng ‘bôh đơ̆ng nơ̆r Ih bơtho pơchrang kơ inh wă kơ inh arih trŏ thoi Kră Yang krao inh lăm Khul Bơngai Lui kơ ‘Bok Kei-Dei. Yua anăn Kră Yang Yêsu Krist, Amen.
Lu bơ̆n kăl kơ hơmet kiơ wă kơ arih trŏ kơ lăm Khul Bơngai Lui kơ ‘Bok Kei-Dei?
Đŏk Sơ̆p Hla bơar ‘Bok Kei-Dei lăm pêng sơnăm: Amôt 2
Kênh Youtube BHKTHN:
