Klei Aê Diê Blŭ: I Y-Timôthê 3:14-15
Êlan kliăng: “Kâo čang hmăng srăng truh kơ ih djăl, ƀiădah kâo čih klei mtă anei kơ ih, čiăng kơ tơdah kâo hnui truh, ih dưi thâo si klei djŏ dôk dơ̆ng ƀơ̆ng huă hlăm găp djuê Aê Diê, jing Phung Sang Aê Diê hdĭp, jing kmeh leh anăn atur dưh klei sĭt nik.” (I Y-Timôthê 3:14-15)
Klei êmuh ksiêm mĭn: Ya rup Khua ƀĭng kna Y-Pôl yua čiăng lač kơ Phung Sang Aê Diê? Dŭm rup anăn brei ƀuh ya klei mâo kơ Phung Sang Aê Diê? Si klei hriăm đru drei leh anăn gŏ sang hdĭp hlăm Phung Sang Aê Diê?
Tơdah dôk mtô kơ klei ba yua Klei Mrâo Mrang Jăk hlăm klei hdĭp, Khua ƀĭng kna Y-Pôl mdei čiăng lač kơ klei kñăm hră anei: “tơdah kâo hnui truh, ih dưi thâo si klei djŏ dôk dơ̆ng ƀơ̆ng huă hlăm găp djuê Aê Diê” (êlan 15), mơ̆ng anăn, drei ăt mâo klei dlăng kluôm hĭn kơ bruă knuih hdĭp phung đăo hlăm boh klei Phung Sang Aê Diê. Ñu yua tlâo rup hlăm êlan 15 čiăng mblang kơ Phung Sang Aê Diê.
Tal sa, Phung Sang Aê Diê jing Sang kơ Aê Diê. Anăp anei, drei srăng thâo săng ya ngă hlăm kdrêč lač kơ knuih hdĭp phung khua pô mtô leh anăn khua sang yang, Khua ƀĭng kna Y-Pôl mtô diñu brei “kiă kriê bi jăk phung anak diñu leh anăn sang diñu”. Hlue si klei dlăng anei, sang jing gŏ sang, tinăn mâo klei dăp djŏ pruĕ êlan leh anăn klei dưi, msĕ si khua pô mtô leh anăn khua sang yang hlăm bruă “kiă kriê phung anak diñu leh anăn sang”; leh anăn bruă klam phung hlăm sang dưi mđĭ lar, msĕ si ung-mô̆, amĭ ama- anak čô, msĕ si lač leh hlăm knuih phung khua pô mtô leh anăn khua sang yang. Sang ăt jing anôk dôk hdĭp mda sui, anôk sa čô mnuih ƀuh êđăp ênang, jăk mơak. Tinei, Khua ƀĭng kna Y-Pôl amâo lač ôh Phung Sang Aê Diê jing sang kơ phung đăo, ƀiădah jiing “Sang Aê Diê”, čiăng lač anôk Aê Diê dôk leh anăn kiă kriê sui, anôk Ñu khăp kiă kriê.
Tal dua, Khua ƀĭng kna Y-Pôl lač kơ rup “Sang” hŏng klei mblang “jing Phung Sang Aê Diê hdĭp”. Boh blŭ “Phung Sang Aê Diê” hlăm klei blŭ Grĕk jing “phung”. Hlăm Bruă Phung Khua Ƀĭng Kna 7:38, boh blŭ anei yua čiăng lač kơ phung ƀuôn sang Israel mâo bi mtlaih mơ̆ng čar Êjip. Kyua anăn, Phung Sang Aê Diê jing êpul mnuih mâo iêô mthưr đuĕ mơ̆ng lăn ala. Ti krah lăn ala ară anei iêô mthưr klei thâo jum, hlai mbĭt leh anăn sa ai, Phung Sang Aê Diê ênưih snăk luč klei thâo săng kơ pô jing leh mnuih dưi iêô đuĕ mơ̆ng lăn ala, hrô kơ sa ai hlai mbĭt jing sa hŏng lăn ala.
Tal tlâo, Phung Sang Aê Diê jing “kmeh leh anăn atur kơ klei sĭt nik”. Rup anei jing yuôm bhăn snăk hŏng Khua pô mtô mda asei Y-Timôthê dôk mă bruă ti Êphêsô, jing ƀuôn mâo sang yang prŏng snăk kkuh kơ yang H’Artêmis hŏng 127 ƀĕ kmeh. Boh hră “atur” tinei lač kơ sa atur amâodah mnơ̆ng dră krơ̆ng. Sitôhmô Phung Sang Aê Diê jing “ kmeh leh anăn atur dưh klei sĭt nik” jing mñă Phung Sang Aê Diê mâo bruă klam mđĭ klei sĭt nik čiăng kơ grăp čô mnuih dưi ƀuh.
Akâo kơ Khua Yang đru drei leh anăn gŏ sang drei jing sa êpul pioh hjăn, leh anăn jing anôk răng mgang ăt msĕ mơh mđĭ klei sĭt nik Klei Mrâo Mrang Jăk, čiăng kơ
Phung Sang Aê Diê alŭ wăl leh anăn prŏng hĭn jing Phung Sang Aê Diê kluôm jing anôk Aê Diê mơak kiă kriê.
Ya klei brei drei bi mlih čiăng hdĭp djŏ hlăm Phung Sang Aê Diê?
Wah lač: Ơ Khua Yang, lu mmông kâo wơr hĕ klei mblang si jing Phung Sang Aê Diê leh anăn ya ngă mâo hĕ. Akâo kơ Ih đru kâo mtrang ksiêm pô hlăm klei Ih mtô čiăng kâo hdĭp djŏ si klei Ih iêô leh hlăm Phung Sang Aê Diê Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Amôs 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
