I Pêtrôs 3:1-7
“Kư̆m lei-lăi thoi noh, lu bơngai drŏ-kăn, iĕm athei chu yom kơ klo iĕm. Dah klo iĕm ưh kơ lui kơ nơ̆r ‘Bok Kei-Dei, iĕm kư̆m athei pơm ‘lơ̆ng kơ sư ling lang; khŏm khŏm sư kư̆m lui mơ̆n mă khan ưh kơ đei bu bơtho.” (I Pêtrôs 3:1)
Nơ̆r jet tơchĕng pơwao:
– Lu bơngai pơm akăn mă sư lui bơih kăl kơ arih thoi yơ hăm klo sư kơdih?
– Wă kơ tơplih klo sư, bơngai pơm akăn kăl kơ rok yă Sa-ra gah tơdrong kiơ?
– Bơngai pơm klo mă sư lui bơih kăl kơ pơm thoi yơ hăm akăn sư kơdih?
– ‘Bai pơhrăm âu tơblŏk ăn kơ bơ̆n arih sa lăm hnam dơnŏ lu bơ̆n thoi yơ?
Lăm chăl noh sơ̆, Klo gơh pơm tôm tơdrong kơ akăn sư kơdih. Thoi noh tơdrong akăn sư wă kơ pơm tơ’bôh tơdrong lu kơ Kră Yang noh jơ̆ minh tơdrong hơnat pat dêh tơpă tơdah klo sư ưh kơ drơ̆ng ăn kơ sư. Kơplah tơdrong noh, nơ̆r Kră Yang bơtho khan kơ bơngai pơm akăn mă lui hơdrol kơ klo sư, ưh kơ sĭ bơtho klo sư tơdrong lui ôh, mă lei kăl kơ arih chu yom kơ klo sư, păng “yua kơ tơdrong arih sa đơ̆ng akăn sư, na ba ăn tơdrong tơplih kơ klo sư, păng klo sư đei ‘bôh tơdrong arih akăn sư rơgoh păng pơyom” (trong 1-2). Kră Yang wă kơ lu bơngai pơm akăn mă lu sư lui bơih tơ’bôh tơdrong ‘lơ̆ng ưh kơ đei la yơ tôch hiong lăm hnam dơnŏ sư kơdih. Tơplih ăn kơ tơdrong chă ngă gah ‘nguaih ‘bot tơkhiĕn maih, dah băn ao ‘lơ̆ng… mă lei “athei chă tơdrong pơguăng lăm jơhngơ̆m, wă khan tơdrong ‘lơ̆ng rơgoh ưh kơ đei la yơ tôch hiong lăm tơdrong iơ̆m dim kĕ ĕnh, noh jơ̆ tơdrong ‘lơ̆ng păng gĭt dêh ‘bơ̆t anăp ‘Bok Kei-Dei” (trong 3-4).
Wă kơ tơplih klo sư kơ dih, lu bơngai pơm akăn kăl kơ kiơ̆ thoi kơ mĭl đơ̆ng yă Sa-ra, “…lui gơnang kơ ‘Bok Kei-Dei đĭ jơhngơ̆m, chu yom kơ klo sư, dôm noh đĕch mă-lei đe băt kơ sư bơngai ‘lơ̆ng boih. 6 Yă Sara sơ̆ kư̆m thoi noh, sư chu yom kơ klo sư Abraham păng anăn Abraham yŏng tơ’ngla sư…” (trong 5-6). Arih sa lăm hnam dơnŏ mă ưh tam mă lui kơ Kră Yang, lơ bơngai pơm akăn đei tŭk lê̆ tơdrong lui, dah mă mơnah kư̆m hli ưh kơ wă pơm tơ’bôh đon lui hăm klo sư kơdih. Nơ̆r Kră Yang ba ăn tơdrong sơmĕng gô nhen thoi kon yă Sa-ra tơdah mă lu sư kư̆ gơnang kơ Kră Yang, arih thoi yă Sa-ra ling lang kơ chu yom kơ klo sư kơdih păng pơm tơdrong ‘lơ̆ng, tơdrong noh gô ba ăn tơdrong kơjăp mă tơ’bơ̆p dôm tơdrong truh hơnat. (trong 6).
Pêtrôs kư̆m athei bơngai pơm klo mă sư bơngai lui bơih athei arih hơgei hăm akăn sư kơdih, kăl kơ pơyom kơ akăn sư kơdih mă khan sư bơngai rơdu tơrăn hloh ră, kăl kơ bơwei, dŏng tơgŭm ưh kơ ngôi kư̆ kă ‘bih đe nai. Tơdah klo lăng akăn sư ưh kơ rơ a, arih ưh kơ ‘lơ̆ng hăm akăn sư, ưh kơ ‘lơ̆ng hăm akăn sư hưch kơ bơngai nai, lei dôm tơdrong krao khan sư gô đei tơdrong pơgăn. Yua kơ tơdrong tơ’bưh hăm ‘Bok Kei-Dei noh jơ̆ đơ̆ng tơdrong tơ’bưh ‘lơ̆ng hăm bơngai nai (trong 7). Tơdah bơngai pơm klo arih kơnê̆, gô pơm ăn kơ akăn sư ưh kơ wă lui kơ ‘Bok Kei-Dei, tơdah pơm ăn kơ akăn sư gô ling lang kơ blĕk klai, gô hiong tơdrong pŭn hiôk đơ̆ng Kră Yang wă song ăn.
‘Bai pơhrăm năr âu tơgŭm ăn kơ bơ̆n lăng tơdrong oei sa lăm hnam dơnŏ bơ̆n kơdih. Tơdrong klo dah akăn sư gô ba ăn tơdrong tơplih kơ bơngai cheng sư ‘noh mă ưh tam mă lui, tơdah đĭ kơ măr sư gô đei pŭn hiôk đơ̆ng Kră Yang song ăn, noh jơ̆ yua kơ đơ̆ng tơdrong măr sư đei pơm lăm chăl arih măr sư. Apinh Kră Yang tơgŭm bơ̆n arih mă ‘lơ̆ng hăm klo dah akăn bơ̆n kiơ̆ thoi Kră Yang đei bơtho khan mă tơ’bơ̆p tơdrong thoi yơ gô đei tơdrong pŭn hiôk lăm hnam dơnŏ.
Ơ Kră Yang, Ih jơ̆ tơngla kơ hnam dơnŏ inh. Apinh Ih tơgŭm ‘bôh tôm tơdrong ưh kơ ‘lơ̆ng lăm chăl arih inh hăm hnam dơnŏ inh. Apinh Ih ăn kơ inh băt kơ hơmet ming tơdrong arih kiơ̆ thoi nơ̆r Ih đei bơtho, wă kơ hnam dơnŏ inh arih kiơ̆ thoi Ih wă. Yua anăn Kră Yang Yêsu Krist. Amen
Lu bơ̆n kăl kơ arih thoi yơ wă kơ tơplih klo dah akăn bơ̆n?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hôsia 11
Kênh Youtube BHKTHN:
