I Pêtrôs 2:21-24
“Yua kơ Inh bơngai dim, băt ‘mêm mơnat, na apinh iĕm pŭ iŏk bĕ, pơhrăm iŏk bĕ tơdrong Inh âu, wă kơ iĕm pơdơh hiôk.” (Mathiơ 11:29)
Nơ̆r jet tơchĕng pơwao:
– Kră Yang krao iŏk bơngai lui athei pơhrăm iŏk đơ̆ng Kră Yang Yêsu tơdrong kiơ? Yua kơ kiơ?
– Kră Yang Yêsu đei bơtho tơdrong chu iŏk pơmat hăm tơdrong kiơ?
– Lu bơ̆n kăl kơ pơhrăm iŏk đơ̆ng Kră Yang thoi yơ?
Trong năm truh tơdrong đe ưang kơ Kră Yang Yêsu, yak hlôi đơ̆ng tơdrong gleh pơmat tat (Luka 24:25-26). Bơngai lui bơ̆n athei yak kiơ̆ jơ̆ng Kră Yang kiơ̆ trong gleh pơmat tat. ‘Bok Pêtrôs đei yak hlôi bơih đơ̆ng tơdrong gleh pơmat tat pơhrăm iŏk đơ̆ng Kră Yang Yêsu thoi noh na sư krao lu bơngai kiơ̆ Kră Yang athei adrin chu iŏk pơmat thoi nơ̆r Kră Yang đei khan: “Yêsu krao bơngai tơpôl lơ păng lu bơngai pơhrăm păng Sư mơ̆n năm tơ Sư. Na Sư khan: Dah bơngai bu wă kiơ̆ Inh, sư athei tŭk đĭ tơdrong sư kơdih păng tôi kơdih ‘long pơglang chu lôch yua kơ wă kiơ̆ Inh.” (Markôs 8:34). Bơ̆n đei pŭ iŏk lơ tơdrong gleh pơmat, phŏ lĕch đơ̆ng tơdrong yoch bơ̆n. Mălei bre Pêtrôs krao lơ bơngai lui athei pŭ iŏk pơmat yua kơ pơm ‘lơ̆ng. Nơ̆r Kră Yang krao lu bơ̆n pơhrăm iŏk pơmat tat ‘nâu yua kơ: “’Bok Kei-Dei krao iŏk bơ̆n wă kơ bơ̆n iŏk jơhngơ̆m đon dim gơh găt kuă ăn pơm kơnê̆ kơ đe mă khan đe pơm kơnê̆ kơ bơ̆n. Yêsu Krist đei tơdrong gleh pơmat-tat thoi noh mơ̆n sơ̆ yua wă tơgŭm bơ̆n. Mă-lei Sư ưh kơ đei pơm kơnê̆ kơ đe ôh, Sư pơm trong wă kơ bơ̆n rok kiơ̆ Sư.” (trong 21). Kră Yang Yêsu kư̆m dai thoi bơngai đĭch đe, Sư jur jing kon bơngai păng chu phep đep yom thoi bơngai đĭch đe păng lôch pơmat tơ ‘long pơglang tăm (Philip 2:7-8). Bơ̆n arih lăm teh đak ‘bĕnh kơ tơdrong ưh kơ tơpăt “Dôm lu bơngai mă gơnang kơ Kră Yang Yêsu Krist wă pơm đon ‘lơ̆ng tơpăt, lu sư gô đei tơdrong đe areh pơm kơnê̆ kơ lu sư.” (II Timôthê 3:12). Mălei Kră Yang chu pơmat tat wă dŏng lu bơ̆n, lei na lu bơ̆n kư̆m dai pơhrăm iŏk tơdrong ‘nâu hăm jơhngơ̆m hiôk.
Kră Yang Yêsu bơih “’Bok mă tih hloh” (trong 21). Bơtho pơhrăm lu kon Sư gah chu iŏk gleh pơmat tat, kư̆m thoi Sư chu iŏk gleh pơmat “Sư ưh kơ đei pơm minh tơdrong yoch kiơ, păng Sư ưh kơ đei layơ hơlĕnh kơ đe.” (trong 22). Kơplah bơ̆n tơ’bơ̆p tơdrong ưh kơ ‘lơ̆ng, jơhngơ̆m bơ̆n ngăl ‘bônh kơ blĕk, lĕch nơ̆r pơma kơnê̆, nơ̆r pơma krưp păng pơm tơwih. Mălei Kră Yang bơih pơm kơmĭl gah tơdrong chu pơmat păng iŏk đon ala, “Đe pơma kơnê̆ kơ Sư, Sư ưh kơ pơma kơnê̆ kơ đe; đe pơm pơmat Sư, mă-lei Sư ưh kơ pơma tơwih kơ đe. Sư gô mơ̆ng kơ ‘Bok Kei-Dei đĕch, yua kơ Sư băt kơ ‘Bok Kei-Dei sek tơlang tơpăt.” (trong 23). Sư pơjao akâu Sư kơ ‘Bok Kei-Dei, Tơ’ngla sek tơlang tơpăt.
Lu bơ̆n kăl kơ pơhrăm iŏk kơmĭl Kră Yang gah tơdrong chu pơmat yua kơ kon bơngai bơ̆n păng yua kơ Anăn Kră Yang. Kră Yang Yêsu chu pơmat wă pŭ iŏk tơdrong yoch kon bơngai, dŏng pơklaih bơngai bu mă lui kơ Sư wă kơ klaih đơ̆ng tơdrong yoch, păng ăn kơ bơ̆n arih ‘nao (trong 24), Sư chu iŏk tơdrong đe pơjĭ pơmat Sư wă kơ bơ̆n klaih ‘lơ̆ng, ‘măn kơ sĕch akar, kiơ̆ tơdrong yoch. Mălei yua kơ đon lui, na lu bơ̆n wih brŏk tơ Yêsu Krist tơ’ngla wei bơ̆n, tơ’ngla wei lăng bơhngol bơ̆n. Lu bơ̆n ling lang ‘blŏk trong năm tơ tơdrong ‘lơ̆ng rŏ athei yak hlôi trong ‘long pơglang. Kơlih kơ thoi noh, na lu bơ̆n athei pơhrăm iŏk kiơ̆ kơmĭl Kră Yang Yêsu iŏk đon ala chu pơmat yua kơ Anăn ‘Bok Kei-Dei.
Kơkuh kơ Ih Kră Yang iơ̆m dim, apinh Ih mơnat kơ inh, inh thoi triu jrok trong na gơh wih brŏk tơ Ih yua kơ đơ̆ng tơdrong Ih lôch. Apinh Ih tơgŭm inh pơhrăm kiơ̆ Ih. Chu pơmat yua kơ Ih, pơm kơmĭl ‘lơ̆ng, wă dŏng lu bơngai jum dăr kơ inh. Krao khan yua Anăn Kră Yang Yêsu Krist, Amen.
Lu bơ̆n pơhrăm kiơ̆ Kră Yang gah kơmĭl chu pơmat thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong jang 8
Kênh Youtube BHKTHN:
