Klei Aê Diê Blŭ: I Y-Pêtrôs 2:21-24
Êlan kliăng: “Brei diih đua knông Kâo leh anăn hriăm mơ̆ng Kâo, kyuadah Kâo jing ênang leh anăn mâo ai tiê luă gŭ; leh anăn mngăt diih srăng mdei” (Y-Mathiơ 11:29)
Klei êmuh ksiêm mĭn: Phung đăo kơ Krist mâo klei iêô brei hriăm mơ̆ng Khua Yang kơ ya klei? Khua Yang Yêsu bi hriăm kơ klei tŭ klei knap mñai hŏng ya êlan? Si ngă drei srăng hriăm mơ̆ng Khua Yang?
Êlan Khua Yang Yêsu nao kơ klei guh kơang jing êlan tŭ klei knap mñai (Y-Luk 24:25-26). Brei phung đăo tui kru jơ̆ng Ñu êbat hlăm êlan tŭ klei knap mñai mơh. Khua ƀĭng kna Y-Pêtrôs tuôm hriăm leh kơ klei tŭ klei knap mñai mơ̆ng Khua Yang Yêsu kyuanăn ñu kwưh kơ phung tui hlue Khua Yang kăp tŭ klei knap mñai msĕ si Khua Yang lač leh, “Tơdah sa čô čiăng tui hlue Kâo, brei ñu hngah hĕ klei ñu pô čiăng, klam kyâo bi kal ñu, leh anăn tui hlue Kâo” (Y-Markôs 8:34). Drei srăng tŭ klei knap mñai kyua lu mta, tăp năng anăn jing boh jhat kyua klei soh drei pô. Ƀiădah Khua ƀĭng kna Y-Pêtrôs dôk kwưh kơ phung đăo brei tŭ klei knap mñai kyua klei ngă bruă jăk. Klei Aê Diê Blŭ iêo drei brei hriăm klei hriăm tŭ klei knap mñai anei kyuadah ” Krist msĕ mơh tŭ leh klei knap mñai kyua diih” (êlan 21). Yêsu Krist tuôm jing leh sa čô “dĭng buăl tŭ klei knap mñai”, mơ̆ng anôk jing Aê Diê, Ñu toh hĕ klei jing Aê Diê, tŭ klei jing sa čô dĭng buăl leh anăn gưt asăp tơl djiê (Philip 2:7-8). Drei dôk hdĭp ti krah lăn ala bŏ hŏng klei wê, “jih jang hlei pô čiăng hdĭp doh jăk hlăm Krist Yêsu srăng tŭ klei arăng ngă jhat” (II Y-Timôthê 3:12). Ƀiădah Khua Yang tŭ leh klei knap mñai čiăng bi mtlaih drei, snăn ăt brei drei găn mơh klei hriăm anei hŏng klei hơ̆k mơak.
Khua Yang Yêsu jing sa čô “Nai mtô prŏng”, bi hriăm leh phung đăo kơ Ñu klei tŭ klei knap hŏng klei Ñu pô “tŭ leh klei knap mñai kyua diih, čiăng brei kơ diih klei bi hmô, čiăng kơ diih tui hlue kru Ñu” (êlan 21). Khua Yang bi hriăm leh klei hriăm kơ klei tŭ klei knap mñai hŏng klei hdĭp Ñu pô, “Ñu amâo tuôm ngă soh ôh, kăn arăng tuôm hmư̆ klei luar mơ̆ng ƀăng êgei Ñu rei” (êlan 22). Tơdah arăng ngă klei wê kơ drei, tui si klei bi kčŭt ênưih snăk drei lŏ wĭt ngă jhat, blŭ phĭ, blŭ ruă amâodah lŏ wĭt rŭ ênua. Ƀiădah Khua Yang jing klei bi hmô kơ klei tŭ klei knap mñai leh anăn klei bi luă gŭ pô, “Tơdah arăng dlao wač kơ Ñu, Ñu amâo lŏ dlao wač kơ arăng ôh” ( êlan 23). Khua Yang Yêsu pô jao leh Ñu pô kơ Aê Diê, Pô phat kđi hŏng klei kpă.
Brei drei hriăm mơ̆ng Khua Yang kơ klei tŭ klei knap mñai kyua pô mkăn, leh anăn kyua Anăn Khua Yang. Khua Yang Yêsu tŭ leh klei knap mñai čiăng klam brei klei soh lăn ala, bi mtlaih phung đăo kơ Ñu mơ̆ng klei bi kmhal kyua klei soh leh anăn brei kơ digơ̆ klei hdĭp mrâo (êlan 24). Khua Yang tŭ klei arăng čăm bi êka čiăng bi hlao klei soh lăn ala, klei soh drei pô yơh. Brei phung đăo kơ Krist thâo drei jing phung biăp klah đuĕ, hdĭp tui si kđeh, hdĭp hlăm klei soh. Ƀiădah hŏng klei đăo, drei lŏ dưi wĭt kơ Pô Mngăt Biăp, jing Pô kiă mngăt drei. Hdơr bĕ êlan nao truh kơ klei guh kơang jing êlan srăng găn kyâo bi kal. Kyuanăn yơh, tui bĕ klei Khua Yang Yêsu bi hmô leh gĭr tŭ klei knap mñai kyua Anăn Aê Diê.
Si drei hriăm mơ̆ng Khua Yang kơ klei tŭ klei knap mñai?
Wah lač: Ơ Khua Yang Pô jăk, akâo Ih pap brei kơ kâo đa, kâo jing sa drei biăp klah đuĕ dưi lŏ wĭt kơ Ih kyua klei Ih djiê leh. Brei kâo hriăm mơ̆ng Ih, tŭ klei knap mñai kyua Ih, ngă klei bi hmô jăk, čiăng bi mtlaih jih jang mnuih jŭm dar kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
