Loos 10:13-15
Nqe cim:
“Nej cia li thov tus tswv teb kom nws txib dua ib co neeg mus pab hlais nws cov nplej” (Mathais 9:38)
Lus nug rau sawvdaws xav:
– Timthawj Paulus nug ntau lolus nug rau lub homphiaj dabtsi?
– Vajtswv thiab Pawg Ntseeg yuav ua dabtsi rau cov neeg uas txais yuav Vajtswv lub suab hu?
– Peb puas tabtom thov Vajtswv thiab ua ib yam dabtsi rau tes haujlwm tshaj tawm Txojmoo Zoo?
Timthawj Paulus qhia paub “Txhua tus uas thov tus Tswv pab yuav dim” (nqe 13), thiab nug ntau lolus nug ua kom tus nyeem muaj kev xav. “Thov tus Tswv” taij thov, nrhiav kev cawmdim ntawm tus Tswv. Tseeb tiag, txoj kev cawmdim yuav tsis muaj tshwm rau tus tsis tau ntseeg Vajtswv. Tiamsis yuav ua li cas kom ib tug neeg ntseeg tau Tswv Yexus yog hais tias lawv tsis tau hnov txog Nws? Thiab yuav li cas kom lawv hnov tau yog hais tias tsis muaj neeg qhia lawv? Thiab yog hais tias tsis muaj leejtwg raug txib mus, ces yuav ua li cas muaj neeg mus tshaj qhia? (nqe 14–15). Timthawj Paulus qhia txog qhov tseemceeb ntawm tes haujlwm txib neeg mus qhia Txojmoo Zoo rau lwm tus. Timthawj Paulus qhia meej hais tias peb yuav tsum tawm mus peb thiaj muaj sijhawm ntsib thiab hais txog tus Tswv rau lwm tus. Thaum uas lawv hnov Txojmoo Zoo, lawv thiaj yuav paub ntseeg thiab thov tus Tswv pab. Paulus rho tus Cevlus Yaxayas cov lus hauv Yaxayas 52:7: “Cov neeg uas mus qhia txojmoo zoo txhais kotaw zoo kawg li!”. Yog tsis muaj cov kotaw uas txaus siab tawm mus, yuav tsis muaj leejtwg hnov Txojmoo Zoo kev Cawmdim.
Yog li ntawd leejtwg yuav txib cov neeg uas mus tshaj qhia Txojmoo Zoo rau tibneeg? Tseeb tiag Vajtswv yog Tus uas yuav txib neeg mus (Mathais 9:38), thiab tus Tswv pheej siv Pawg Ntseeg xa neeg mus, zoo ib yam li Pawg Ntseeg Ati-aukias xa Paulus thiab Npananpa mus tshaj Moo Zoo ntau zaus lawd (Tes Haujlwm 13:1-3). Nov yog Vajtswv tes haujlwm; txhua tus yuav tsum uas tib zoo ua tes haujlwm no. Vajtswv txib neeg thiab Nws pub koob hmoov rau lawv, ib yam li ntawd Pawg Ntseeg txib neeg mus mas cov ntseeg yuav sib pab los ntawm kev thov Vajtswv thiab fij nyiaj rau lawv mus. Thiab cov uas raug txib mus yuav tsum mus raws li Vajtswv lub suab hu thiab fij yus tus kheej rau kev tshaj Txojmoo Zoo thiab teb Vajtswv zoo li Yaxayas: “Kuv nyob ntawm no! Thov txib kuv mus!” (Yaxayas 6:8).
Loos 10:14-15 yog cov lus nqua hu txhawb mus tshaj qhia Txojmoo Zoo, yog ib co lus nqua hu tseemceeb heev hauv Vajluskub vim tshaj qhia Txojmoo Zoo yog tus Tswv tej lus samhwm rau txhua tus uas ntseeg Nws. Ntawd yog tej lus samhwm rau peb txhua tus uas yog cov twb tau txais kev cawmdim lawd. Pawg Ntseeg thiab txhua tus ntseeg yuav tsum thov Vajtswv ntau rau tes haujlwm tshaj tawm Txojmoo Zoo, thov Vajtswv txib thiab tshoov ntau tus neeg lub siab kom txaus siab tawm mus qhia Tswv Yexus rau cov uas tsis tau txais kev cawmdim. Peb yuav tsum ntsia pom thiab nco ntsoov thov Vajtswv txhua lub sijhawm pab rau cov uas raug txib mus. Thiab tej zaum peb kuj yuav tau Vajtswv hu mus ua cov tub tshaj Txojmoo Zoo rau txhua tus uas nyob ib ncig ntawm peb.
Thov Vajtswv,
Tus Tswv, thov pab nyuam yaus hlub tshua txog tes haujlwm tshaj tawm Txojmoo Zoo ntau dua thiab tas siab thov Vajtswv rau cov uas raug txib mus. Thov pab nyuam yaus npaj txhij yuav ua raws li Koj lub suab hu thiab coj Txojmoo Zoo mus rau cov uas xav los cuag Koj. Nyuam yaus tuav Tswv Yexus Khetos lub npe thov, Amees.
Peb puas thov Vajtswv pab rau cov uas raug txib mus tshaj tawm Txojmoo Zoo rau cov uas tsis tau ntseeg?
Nyeem Vajluskub hauv peb lub xyoos: Nkauj Quaj Ntsuag 1
Kênh Youtube BHKTHN:
