Klei Aê Diê Blŭ: I Y-Pêtrôs 2:9-10
Êlan kliăng: “Ƀiădah diih jing sa phung găp djuê Aê Diê ruah leh, phung khua ngă yang kơ mtao, sa phung găp djuê doh jăk, phung ƀuôn sang Aê Diê pô, čiăng kơ diih dưi hưn bruă yuôm bhăn Pô iêô leh diih kbiă mơ̆ng klei mmăt truh kơ klei mngač yuôm bhăn Ñu” (I Y-Pêtrôs 2:9)
Klei êmuh ksiêm mĭn: Khua ƀĭng kna Y-Pêtrôs brei thâo ya klei dưi Aê Diê brei kơ phung đăo kơ Khua Yang Yêsu? Aê Diê brei klei dưi kơ phung đăo kơ Ñu ya pioh ngă? Ya drei srăng ngă čiăng bi leh bruă klam prŏng jing phung găp djuê doh jăk?
Mdê hŏng phung amâo đăo leh anăn amâo gưt ôh kơ Klei Aê Diê Blŭ, Khua ƀĭng kna Y-Pêtrôs lač, “ƀiădah diih jing sa phung găp djuê Aê Diê ruah leh”, leh anăn Ñu brei klei dưi jing “phung khua ngă yang kơ mtao, sa phung găp djuê doh jăk, phung ƀuôn sang Aê Diê pô” (êlan 9).
Tal sa, phung đăo kơ Yêsu Krist jing “phung găp djuê Aê Diê ruah leh”. Aê Diê ruah leh anăn bi tui leh drei čiăng mjing drei jing phung găp djuê Israel hlăm mngăt, jing phung ƀuôn sang Ñu pô. Aê Diê ruah leh anăn bi tui drei hơăi mang hŏng klei Ñu pap. Drei mâo klei bi mtlaih amâo djŏ kyua drei jing năng ôh, leh anăn kăn drei dưi ngă thiăm sa mta bruă kơ klei Aê Diê čuăn bi mtlaih rei. Kyuanăn đăm brei phung đăo yap ai amâodah ngă mgao ôh, ƀiădah bi luă gŭ drei pô leh anăn mpŭ kơ klei jing phung Aê Diê ruah. Tal dua, drei jing “phung khua ngă yang kơ mtao”. Ti gŭ klei bi mguôp hđăp, Aê Diê mdưm bruă kơ phung khua ngă yang. Bruă klam kơ diñu jing nao ba Klei Aê Diê Blŭ kơ phung ƀuôn sang Aê Diê, leh anăn hưn kơ Aê Diê jih jang klei čiăng leh anăn klei soh phung ƀuôn sang. Ƀiădah ti gŭ klei bi mguôp mrâo, hŏng klei Khua Yang Yêsu djiê, jih jang phung đăo jing phung khua ngă yang kơ Mtao Yêsu sơăi. Drei dưi nao drei pô ti anăp Aê Diê, leh anăn dưi mă bruă kơ Ñu. Aê Diê brei leh kơ grăp čô phung đăo hruê anei mâo hdruôm hră Klei Aê Diê Blŭ, drei dưi hmư̆ asăp Ñu hlăm hdruôm hră Klei Ñu Blŭ, dưi hưn klei soh kơ Ñu grăp blư̆ ngă soh, dưi mă bruă kơ Ñu msĕ si sa čô khua ngă yang mphŭn dô. Tal tlâo, drei jing “sa phung găp djuê doh jăk, phung ƀuôn sang Aê Diê pô”. Phung găp djuê doh jăk jing sa phung găp djuê pioh brei mdê kơ Aê Diê pô. Mphŭn dô Aê Diê ruah leh phung Israel jing phung găp djuê doh jăk kơ Ñu pô, ƀiădah kyua klei diñu amâo đăo leh anăn kyua klei soh diñu snăn diñu bi luč leh klei jing yuôm bhăn anăn, leh anăn Aê Diê ruah leh phung tue mjing digơ̆ jing phung găp djuê doh jăk, jing phung ƀuôn sang kơ Ñu pô. Kyuanăn yơh Khua ƀĭng kna Y-Pêtrôs lač: “Mphŭn dô diih amâo jing sa phung ƀuôn sang ôh, ƀiădah ară anei diih jing leh phung ƀuôn sang Aê Diê. Mphŭn dô diih amâo tuôm mă tŭ ôh klei Aê Diê pap, ƀiădah ară anei diih mă tŭ leh klei pap anăn” (êlan 10).
Klei Aê Diê kñăm čiăng tơdah Ñu brei klei pap kơ drei jing Ñu čiăng jao kơ drei bruă klam prŏng hưn klei khăp Ñu, hưn klei Yêsu Krist djiê, Pô iêô leh drei kbiă mơ̆ng klei mmăt klei soh truh kơ klei mngač leh anăn klei hdĭp hlŏng lar (êlan 9). Brei grăp čô drei dlăng yuôm kơ klei pap Aê Diê brei leh, hdĭp hŏng klei hdĭp doh jăk, duah Aê Diê leh anăn ksiêm hriăm Klei Ñu Blŭ, hur har nao hưn Klei Mrâo Mrâo Jăk bi mtlaih mnuih soh.
Si drei mpŭ kơ klei jing sa phung găp djuê doh jăk, leh anăn ngă bruă klam prŏng Aê Diê jao leh?
Wah lač: Bi mni kơ Ơ Aê Diê Pô doh jăk, đru kâo hdơr kơ kâo jing găp djuê doh jăk pioh kơ Ih pô, čiăng kơ kâo djă pioh nanao klei bi mguôp hŏng Ih, hriăm Klei Ih Blŭ leh anăn hưn klei khăp Ih kơ jih jang mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
