Klei Aê Diê Blŭ: Klei Mmuñ Hđăp 116:15-19
Êlan kliăng: “Kâo srăng myơr kơ Ih mnơ̆ng myơr bi mni kơ Ih, leh anăn iêô wah lač kơ anăn Yêhôwa.” (Klei Mmuñ Hđăp 116:17)
Klei êmuh ksiêm mĭn: Si klei pô čih lŏ bi êdah klei ñu hdơr knga kơ Khua Yang? Si klei anei bi êdah sĭt êmĭt hlăm klei hdĭp pô čih? Ya klei khăng bi kgăn drei bi êdah ai tiê thâo hdơr knga kơ Khua Yang?
Klei klă mngač hĭn bi êdah ai tiê thâo hdơr knga jing klei kkuh mpŭ leh anăn mmuñ bi mni kơ Khua Yang (êlan 17). Drei kkuh mpŭ kơ Khua Yang kyuadah Ñu jing Pô hrih mjing drei; Ñu jing Pô Bi Mtlaih, ba drei mơ̆ng klei mmăt kơ klei mngač; leh anăn Ñu jing Pô dlăng ba, kiă kriê drei hlăm klei hdĭp grăp hruê. Khua ƀĭng kna Y-Pôl mtô: “Bi mni bĕ kơ Aê Diê hlăm jih jang klei truh;” (I Têsalônik 5:18) mblang jing, hlăm jih jang bruă, hlăm jih jang klei truh brei drei bi mni kơ Khua Yang sơăi. Hlăm mmông ruă ênguôt hĭn, luč klei knang kơ anak mnuih, drei ăt mâo phŭn knhal čiăng bi mni kơ Khua Yang mơh, kyuadah drei mâo sa čô Pô Sĭt suôr dôk mđing hmư̆, bi juh, leh anăn bi mtlaih (êlan 10-11). Tơdah tlă anăp hŏng klei djiê luč, tơdah pô drei khăp jing anak Aê Diê djiê luč, drei ăt bi mni kơ Khua Yang mơh kyuadah Khua Yang kiă kriê leh digơ̆ êjai dôk hdĭp ti lăn ala anei, ăt srăng kiă kriê mngăt digơ̆ tơdah digơ̆ djiê (êlan 15). Tơdah drei pô yơh dôk tlă anăp hŏng klei djiê, drei ăt mmuñ bi mni kơ Khua Yang kyuadah thâo snei: “Wăt tơdah kâo êbat hlăm troh êyui klei djiê,
kâo amâo srăng huĭ kơ sa mta klei jhat ôh; kyuadah Ih dôk mbĭt hŏng kâo;” (Klei Mmuñ Hđăp 23:4). Bi êdah bĕ ai tiê thâo hdơr knga kơ Khua Yang hŏng klei kkuh mpŭ leh anăn mmuñ bi mni wăt tơdah hlăm klei knap mñai, ênguôt hnĭng truh kơ drei, kyuadah drei đăo snei “Snăn, drei thâo Aê Diê mjing jih jang klei jing jăk kơ phung khăp kơ Aê Diê, čiăng lač phung Aê Diê iêô leh tui si klei Ñu čuăn.” (Rôm 8:28).
Lŏ wĭt kơ êlan tal êlâo hĭn hlăm Klei Mmuñ Hđăp tloh ênoh anei, tơdah pô čih lač snei, ñu khăp kơ Yêhôwa kyuadah Yêhôwa duah ñu, mđing hmư̆, bi mtlaih, leh anăn kiă kriê ñu. Khua ƀĭng kna Y-Yôhan lač leh hlăm I Y-Yôhan 4:19: “Drei khăp kyuadah Ñu khăp leh kơ drei êlâo.”. Drei tuôm êmuh mơ̆ hjăn pô snei, si ngă drei đăo ƀiădah klei hdĭp ăt thu krô, êgah êmăn, leh anăn amâo dưi hdĭp klei hdĭp sa čô mnuih hưn bi sĭt ôh? Klei wĭt lač năng ai kyua drei ka khăp sĭt kơ Khua Yang ôh, jih klei drei dôk ngă jing bruă klei đăo, bruă sang Aê Diê, amâo djŏ mơ̆ng ai tiê klei mĭn sa čô mă bruă kyua khăp kơ Ama ñu pô ôh! Drei amâo khăp kơ Khua Yang kyuadah drei wơr bĭt hĕ si klei Khua Yang khăp kơ drei! Drei lui klei kpăk gun, klei dleh dlan, leh anăn klei mơak, klei tŭ dưn ti lăn ala plah mă leh anôk klei bi mguôp klei khăp hŏng Khua Yang (Klei Bi Êdah 2:4). Lŏ hdơr wĭt bĕ si klei Khua Yang khăp leh kơ drei, si klei Khua Yang duah drei, leh anăn bi mtlaih drei, jih klei jăk Khua Yang brei kơ drei grăp hruê. Lŏ bi mrâo bĕ klei khăp Khua Yang hlăm drei, leh anăn drei srăng thâo ya klei brei drei ngă čiăng “bi wĭt kơ Yêhôwa, kyua jih klei jăk Ñu ngă leh kơ kâo”.
Si ngă drei kkuh mpŭ kơ Khua Yang leh anăn bi êdah ai tiê thâo hdơr knga kơ Khua Yang grăp hruê mơ̆?
Wah lač: Ơ Khua Yang, akâo Khua Yang ba kâo lŏ wĭt hŏng Ih Pô leh anăn klei khăp Ih khăp leh kơ kâo. Kâo ƀuăn myơr klei hdĭp kâo kơ Ih kyuadah kâo thâo Khua Yang jao klei hdĭp Ih kơ kâo leh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
