Hơriso 116:15-19
“Inh gô pơyơ̆r tơmam soi bơnê kơ Ih Kră Yang. Păng krao apinh hăm anăn Kră Yang.”
(Hơriso 116:17)
Nơ̆r jet tơchĕng pơwao:
– Bơngai chih tơ’bôh dơ̆ng jơhngơ̆m băt bơnê kơ Kră Yang thoi yơ?
– Tơdrong ‘nâu đei tơ’bôh hloi đơ̆ng tơdrong arih sư thoi yơ?
– Tơdrong kiơ ngăl pơgăn bơ̆n tơ’bôh jơhngơ̆m băt bơnê kơ Kră Yang?
Tơdrong mă hơđăl hloh tơ’bôh jơhngơ̆m băt bơnê ‘noh bơih kơkuh păng hơri ưang kơ Kră Yang (trong 17). Bơ̆n kơkuh kơ Kră Yang yua kơ Sư bơih Tơ’ngla pơjing bơ̆n; Sư bơih Tơ’ngla dŏng pơklaih, chông bơ̆n đơ̆ng măng mu năm tơ hơdah; păng Sư bơih Tơ’ngla wei rong bơwei bơ̆n lăm tơdrong arih rim năr. ‘Bok Pôl bơtho “Năr iĕm chơt hiôk dah năr iĕm đei tơdrong gleh sơ’ngon, iĕm kư̆m athei bơnê kơ ‘Bok Kei-Dei mơ̆n.” (I Têsalônik 5:18), wă khan đĭ đăng tơdrong jang, tôm tơdrong arih sa athei bơnê kơ Kră Yang ngăl, ‘noh yua kơ bơ̆n đei Yang Tơpăt Tơpă mơ̆ng, pơlung păng dŏng bơ̆n (trong 10-11). Kơplah tơ’bơ̆p tơ’bưh hăm lơ tơdrong juăt, dah bơngai lăm hnam dơnŏ bơ̆n bơngai lui kon Kră Yang mă lôch, bơ̆n kư̆m hơri ưang kơ Kră Yang, yua kơ Sư đei wei rong lu sư lăm teh đak âu, kư̆m gô wei rong bơhngol lu sư mă khan kơplah lôch bơih (trong 15). Dah bơ̆n tơ’bơ̆p tơ’bưh hăm tơdrong lôch, bơ̆n kư̆m oei hơri ưang kơ Kră Yang yua kơ băt thoi âu “Mă inh năm lăm thŭng yơ̆p tơdrong lôch, inh ưh kơ hli kơ răm, yua kơ Kră Yang oei hăm inh; ‘long băl hăm ‘long jra Ih pơlung inh.” (Hơriso 23:4). Athei tơ’bôh jơhngơ̆m ‘mêm kơ Kră Yang kơkuh păng hơri ưang mă khan đei tơdrong gleh pơmat, jĭ ơh sơ’ngon truh kơ bơ̆n yua kơ lui ngeh thoi âu “Bơ̆n ‘bôh bơngai bu mă ‘mêm kơ ‘Bok Kei-Dei, bơngai noh ‘Bok Kei-Dei rơih iŏk lui kơ Sư, lu bơngai thoi noh boih, mă sư tơ’bơ̆p tơdrong kiơ, bơ̆n băt kơ ‘Bok Kei-Dei ăn kơ sư hiôk ngăl.” (Rôm 8:28).
Pơlơ̆k dơ̆ng trong blŭng a Hơriso hơiă ‘nâu kơplah bơngai chih khan sư ‘mêm kơ Kră Yang ‘Bok Kei-Dei yua kơ Kră Yang chă sư, mơ̆ng, dŏng, păng wei rong sư. Yôhan đei pơma khan lăm I Yôhan 4:19; “Bơ̆n ‘mêm kơ ‘Bok Kei-Dei kơlih kơ Sư ‘mêm kơ bơ̆n hơdrol”. Hăm đei layơ bơ̆n jet bơ̆n kơdih yua kơ kiơ inh lui kơ Kră Yang mălei tơdrong arih oei hrĕng kro, gleh lap, păng arih ưh kơ gơh pơm kơdranh? Nơ̆r tơl rŏ lăng yua kơ bơ̆n ưh kơ đei ‘mêm kơ Kră Yang tơpă, dôm tơdrong kiơ bơ̆n oei jang ‘noh tơdrong jang tơdrong lui, tơdrong jang hnam akŭm, ưh kơ sĭ bơngai đei jơhngơ̆m ‘mêm kơ ‘Bă bơ̆n tơpă ôh! Bơ̆n ưh kơ đei ‘mêm kơ Kră Yang yua kơ bơ̆n hiơt bơih Kră Yang ‘mêm kơ bơ̆n tih thoi yơ! Bơ̆n jang tơdrong hrăt hrot ưh kơ rơhơi bơ̆n, tơdrong anat bơ̆n, păng dôm tơdrong chơt hiôk, tơdrong đei yua lăm teh đak tơgar iŏk anih tơ’bưh ‘mêm kơ Kră Yang (Tơdrong Tơ’bôh 2:4). Athei blŏk Kră Yang ‘mêm kơ bơ̆n kơ băt dang yơ, Kră Yang chă păng ăn kơ bơ̆n tơdrong dŏng pơklaih thoi yơ, dôm tơdrong pŭn hiôk Kră Yang ăn kơ bơ̆n rim năr thoi yơ? Athei pơm hơmet jing ‘nao tơdrong ‘mêm Kră Yang lăm bơ̆n, păng đơ̆ng noh lu bơ̆n gô băt bơ̆n kăl kơ pơm kiơ wă “pơm tơwih kơ Kră Yang gah dôm tơdrong hiôk ‘lơ̆ng mă Sư đei ăn kơ inh”
Kơkuh kơ Ih Kră Yang, apinh Ih ăn kơ jơhngơ̆m inh brŏk tơ Ih păng tơdrong ‘mêm Ih đei ‘mêm kơ inh. Inh apinh pơyơ̆r chăl arih inh kơ Ih yua kơ băt thoi âu, Ih jao akâu Ih kơdih kơ inh bơih. Krao khan yua anăn Kră Yang Yêsu Krist, Amen.
Bơ̆n hăm kơkuh kơ Kră Yang păng tơ’bôh jơhngơ̆m băt bơnê kơ Sư rim năr ưh?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 25
Kênh Youtube BHKTHN:
