Klei Aê Diê Blŭ: Klei Mmuñ Hđăp 95:1-7
Êlan kliăng: “Brei drei nao ti anăp Ñu hŏng klei bi mni; brei drei mmuñ hơ̆k kơ Ñu hŏng klei mmuñ bi mni!” (Klei Mmuñ Hđăp 95:2)
Klei êmuh ksiêm mĭn: Ya klei pô čih Klei Mmuñ Hđăp 95 iêô mthưr phung dlăng hră ñu ngă? Si ñu hưn mdah kơ klei Aê Diê jing leh anăn kơ klei drei jing? Hŏng si ai tiê klei mĭn leh anăn knuih drei kkuh mpŭ kơ Khua Yang?
Klei Mmuñ Hđăp 95 kñăm klei yuôm kơ knuih bi êdah klei hdơr knga bi mni kơ Aê Diê tơdah drei mmuñ bi mni kkuh mpŭ kơ Ñu. Pô čih iêô mthưr pô dlăng hră mmuñ bĕ, mpŭ mni bĕ kơ Yêhôwa hŏng ai tiê hơ̆k mơak leh anăn bi mni (êlan 1-2), mbĭt hŏng klei bi ti gŭ pô, luă gŭ (êlan 6). Phung anak Aê Diê mâo lu mta klei čiăng ur hơ̆k mmuñ bi mni kơ Khua Yang drei pô. Brei drei mpŭ mni kơ Aê Diê hŏng ai tiê klei mĭn hơ̆k mơak leh anăn hur har. Wăt tơdah mâo lu blư̆ drei mmuñ bi mni kơ Khua Yang hlăm klei ktrŏ ênguôt, ƀiădah đăm brei ôh knuih mmuñ bi mni anăn jing phŭn. Hơ̆k mơak bĕ kyuadah Khua Yang srăng brei klei pap đru drei dưi găn gao ai tiê ênguôt anăn leh anăn hơ̆k mơak hlăm jih jang klei truh.
Pô čih brei thâo: “Kyuadah Yêhôwa jing Aê Diê prŏng; Ñu jing Mtao prŏng ti dlông hĭn kơ jih jang yang.” (êlan 3). Drei hơ̆k mơak kyua Khua Yang brei kơ drei klei pap dưi mmuñ bi mni kơ Ñu jing Khua Yang kơ jih jang yang. Kyua Ñu jing Mtao prŏng hĭn leh anăn jih jang mnơ̆ng hrih mjing jing dŏ Ñu sơăi, snăn yơh brei drei mmuñ bi mni kkuh mpŭ kơ Ñu hŏng ai tiê thâo hdơr knga. Klei drei kkuh mpŭ amâo dưi kƀah ôh ai tiê hdơr knga kơ Aê Diê. Thâo săng klei Khua Yang jing prŏng leh anăn hdơr knga kơ Pô brei kơ drei lu mta mnơ̆ng snăk, đru drei thâo kkuh mpŭ kơ Khua Yang hŏng klei djŏ leh anăn bi mơak kơ Ñu (Y-Yôhan 4:23).
Pô čih lŏ bi klă klei Khua Yang jing prŏng hĭn hŏng klei ktang myang Ñu hrih mjing jih jang mnơ̆ng. Dơ̆ng mơ̆ng anôk êlam truh kơ čŏng čư̆, dơ̆ng mơ̆ng êa ksĭ truh kơ lăn thu, hŏng kngan Khua Yang sơăi hrih mjing jih jang mnơ̆ng (êlan 4-5). Ñu jing Pô kiă kriê kluôm jih lăn ala wăt jih adiê, hlăm anăn mâo wăt phung mnuih drei. Pô čih Klei Mmuñ Hđăp 95 bi msĕ “Kyuadah Ñu jing Aê Diê drei, drei jing phung ƀuôn sang hlăm kdrăn rơ̆k mda Ñu, phung biăp kngan Ñu atăt” (êlan 7). Kyuanăn yơh, brei drei nao kkuh mpŭ kơ Aê Diê hŏng klei luă gŭ kyua Ñu jing Pô hrih mjing drei (êlan 6). Lu mnuih hruê anei wơr bĭt leh bruă klam kơ pô, nao kkuh mpŭ kơ rup yang anak mnuih mkra mjing, ƀiădah amâo kkuh mpŭ kơ Pô Hrih Mjing ôh. Phung anak Aê Diê brei hdơr bĕ, klei kkuh mpŭ jing bruă jao kơ jih jang mnuih brei ngă hŏng Pô Hrih Mjing.
Klei Mmuñ Hđăp 95 mñă kơ drei brei hdơr klei ktang myang Aê Diê jing prŏng hĭn ti dlông jih jang mnơ̆ng. Mơ̆ng klei anăn yơh bi mđĭ ai drei kkuh mpŭ kơ Aê Diê hŏng ai tiê thâo hdơr knga bi mni leh anăn hŏng klei luă gŭ. Brei drei kkuh mpŭ kơ Aê Diê hlăm jih jang mta bruă drei ngă grăp hruê hlăm klei hdĭp, amâo djŏ ôh knŏng hlăm klei kkuh mpŭ ti Sang Aê Diê. Brei drei hdơr knga bi mni kơ Aê Diê nanao kơ klei bi mtlaih Ñu pioh brei kơ drei leh anăn hŏng jih ai tiê kkuh mpŭ kơ Ñu hŏng ai tiê bi mni.
Si ngă klei hdĭp drei hdĭp kkuh mpŭ kơ Khua Yang hŏng ai tiê bi mni mơ̆?
Wah lač: Ơ Khua Yang, pap brei kơ kâo kyua lu blư̆ klei kâo kkuh mpŭ kơ Khua Yang kƀah klei thâo hdơr knga bi mni kơ Khua Yang. Akâo Khua Yang đru kâo thâo kral nanao klei Aê Diê jing prŏng hĭn, čiăng kơ kâo hŏng jih ai tiê kkuh mpŭ kơ Khua Yang hŏng klei hơ̆k mơak leh anăn bi mni. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
