Pajlug 24:26
Nqe cim:
“Tus uas muab lo lus tseeb teb luag, qhia hais tias yog phoojywg zoo” (Pajlug 24:26).
(Phau HMOWSV)
“Tus uas teb lo lus tseeb mas zoo li nwj daim tawv ncauj”.
Lus nug rau sawvdaws xav:
– “Lo lus tseeb” yog li cas?
– Vim li cas tus sau muab lo lus tseeb piv rau kev nwj daim tawv ncauj?
– Tus ntseeg yuav tsum ua qhia tshwm tej lus hais li cas?
Tus ntseeg hais lus yuav tsum hais tej lus ncaj ncees. Lo lus “tseeb” hauv lus Henplais lub ntsiab yog hais ncaj nraim, ncaj ncees, sib luag zog, lossis hais yam yog xwb. Lo lus tseeb qhia tshwm tus uas hais yog neeg ncaj thiab tseeb.
Lo lus tseeb tau tus sau muab piv rau kev nwj ntawm daim tawv ncauj. Nwj yog ib tes haujlwm qhia tshwm kev hlub ntawm ob tug neeg ua ke. Nyob txij ntawm tej lub tebchaws kev coj noj coj ua uas muaj ntau yam kev nwj ntsigtxog ntau lub ntsiab sib txawv. Ntau lub tebchaws hauv ntiajteb no muaj txoj cai txais tos qhua tshwjxeeb los ntawm ob lub plhu sib twb ua ke. Hauv tebchaws Nyablaj, qhia tshwm kev sib hlub los ntawm cov neeg laus thiab cov menyuam ces yog nwj tus nws hlub ib sab plhu. Tiamsis qhia tshwm kev hlub tob ntawm pojniam thiab txivneej, lawv sib nwj ntawm daim tawv ncauj. Kev sib nwj ntawm daim tawv ncauj qhia txog kev sib raug zoo hauv txoj kev hlub thiab sib lo ua ke ruaj khov ntawm ob tug neeg uas yog pojniam thiab txivneej. Tus sau cov lus no muab kev nwj ntawm daim tawv ncauj los feeb pij (phân biệt) kev nwj ntawm plhu, vim nwj ntawm plhu muaj lub ntsiab zoo li lo lus noj qab nyob zoo, hos nwj ntawm daim tawv ncauj muaj lub ntsiab sib hlub, sib koom ua ked.
Hauv lub neej noj nyob muaj ntau tus tuaj yeem rawv nkhaus qhov tseeb, kom qaij txhob ua rau phoojywg tu siab lossis ua li ntawd kom nrhiav tau kev muaj nqis rau tus kheej. Tiamsis Vajtswv Txojlus qhia hais tias tus uas teb ncaj nraim, ncaj ncees thiaj yog tus phoojywg tseeb. Dhau nqe pajlug no, Vajntxwv Xalumoos qhia rau menyuam yuav tsum qhia tshwm yus lub siab ncaj ncees rau txhua tus dhau ntawm tej lus teb ncaj nraim, tsis zais qhov tseeb lossis hais nkhaus ub nkhaus no ua rau lwm tus totaub yuam kev kom muaj nqis rau yus.
Timthawj Paulus hais tias Vajtswv xav kom cov ntseeg yuav tsum “… hais qhov tseeb ntawm txojkev sib hlub kom thiaj loj hlob txhua fab koom rau tus uas yog lub taubhau uas yog Khetos ntag.” (Efexus 4:15 HMOWSV). Peb yuav tsum ua neej rau qhov tseeb, vim peb Leej txiv saum ntuj yog qhov tseeb. Vajtswv cov menyuam yuav tsum ua neej hwm Vajtswv, tsis txhob nrhiav txhua txoj haukev tuav tswvyim los ntawm tej lus hais tsis ncaj uas ntse ntsuav, lossis lus dag kom tau li yus siab nyiam. Kev nwj tsuas yog lub cim ntawm kev hlub xwb, txawm yog hauv Nyablaj txojcai los yeej tsis siv kev nwj los hais noj qab nyob zoo rau txhua tus, peb los kuj tsis siv kev nwj hais noj qab zoo rau cov ntseeg txhua tus, tiamsis txoj kev hlub thiab kev ncaj ncees yuav tsum yog lub plag ruaj khov hauv peb cov ntseeg kev sib raug zoo thiab sib koom. Lo lus hais hlub uas tsis tseeb hauv lub siab tuaj yog kev dag; tiamsis lo lus hais tseeb, tsis muaj kev hlub ces yog tsis totaub thiab txhim kho tsis tau lwm tus. Thov Vajtswv pab kom peb ib leeg hais lus tseeb rau ib leeg tawm hauv lub siab hlub tuaj kom txhua tus tibneeg pom peb yog Vajtswv uas tus muaj kev hlub cov menyuam.
Thov Vajtswv,
Vajtswv, nyuam yaus ua Koj tsaug uas Koj tau hlub thiab tuag theej nyuam yaus lub txhoj. Thov pab nyuam yaus ua neej hais tej lus tseeb rau txhua tus, kom lwm tus pom Koj txoj kev hlub. Nyuam yaus tuav Tswv Yexus Khetos lub npe thov, Amees.
Peb puas hais tej lus hlub thiab tseeb rau txhua tus lawm tau?
Nyeem Vajluskub hauv peb lub xyoos: 2 Xwmtxheej Vajntxwv 3
Kênh Youtube BHKTHN:
