Loos 16:17-20
Nqe cim:
“Cov kwvtij, kuv xav kom nej ceevfaj cov neeg uas ntxias kom sawvdaws tawg pab tawg pawg thiab kom peb tso tej lus qhia uas nej twb hnov lawm tseg. Nej tsis txhob quavntsej cov neeg ntawd tej lus qhia!” (Loos 16:17)
Lus nug rau sawvdaws xav:
– Timthawj Paulus ceebtoom cov ntseeg hauv nroog Loos yam dabtsi?
– Yuav ua cas zeem paub cov neeg uas ua rau pawg ntseeg tawg pab tawg pawg?
– Yam dabtsi pab peb tiv thaiv tau kev sib koom siab hauv pawg ntseeg?
Tom qab tej lus hais noj qab nyob zoo rau cov phoojywg ntseeg, timthawj Paulus qhia tshwm nws kev hmov tshua txog cov ntseeg hauv lub nroog Loos txojkev ntseeg. Paulus ceebtoom cov ntseeg hauv nroog Loos yuav tsum khiav deb cov neeg uas rhawv tsim muaj pab muaj pawg thiab ua rau lwm tus yuam kev ntawm txoj kev ntseeg uas lawv twb tau txais yuav los lawm. Cov neeg ua rau tawg pab tawg pawg yog cov lam los koom xyaw cov ntseeg, lossis tej zaum lawv yog cov xibfwb cuav qhia tej kev ntseeg txawv Yexus zaj. Txawm yog lawv ua li cuag yog tseeb, los cov ntseeg yeej yuav zeem paub lawv dhau ntawm tej yam uas lawv ua: Tej ntawd yog; lawv paub Vajtswv Txojlus ntau tiamsis tsis ua Tswv Yexus Khetos tes haujlwm, tej haujlwm uas lawv ua yog cia los yug lawv lub plab xwb, txhais hais tias, lawv nrhiav yam muaj nqis rau lawv xwb. Lawv qhia Vajtswv Txojlus keej kawg tiamsis tsis ua raws li tej uas lawv qhia. Lawv tsuas xav txog lawv tus kheej xwb, lawv xav kom muaj koob nto npe, xav ua tus thawj tswj txhua tus uas koom nrog lawv. Yog li ntawd, cov ntseeg yuavtsum ceevfaj cov xibfwb cuav tej lus qhia yuam kev thiab cov uas ua rau pawg ntseeg tawg pab tawg pawg (Mathais 7:15). Cov neeg no pheej haub ntxias cov ntseeg los ntawm tej lus qab zib, lus dag kom qeej leej ntseeg zoo siab, tiamsis lawv lub homphiaj yog ntxias cov ntseeg uas kev ntseeg yaus thiab tsis tau paub dabtsi kom tawg pab tawg pawg.
Timthawj Paulus zoo siab thiab qhuas pawg ntseeg hauv nroog Loos muaj koob nto npe txog kev mloog lus. Paulus xav kom lawv muaj txaus kev txawj ntse ua neej raws li qhov tseeb: Zeem paub yam zoo yuav tsum coj raws thiab qaij deb yam phem (nqe 19). Lub cim ntawm tus ntseeg tseeb yog, txhim kho pawg ntseeg kom muaj kev sib hlub, kev koom siab, kev sib pab, kev sib txhawb thiab kom txhua tus dhau mus ua lub neej zoo li Tswv Yexus tus yam ntxwv. Thiab Vajtswv tus muaj kev kaj siab yuav pub dag zog kom Nws cov menyuam kovyeej dab Ntxwjnyoog lub fwjchim thiab paub ua neej raws li Vajtswv siab nyiam (nqe 20).
Lub tsamthawj muaj xibhwb cuav, cov uas ua rau tawg pab tawg pawg yeej muaj nyob hauv pawg ntseeg ib tiam dhau tiam los txog niaj hnub nim no. kom zeem paub cov ntawd thiab qaij deb lawv, peb yuavtsum kawm Vajtswv Txojlus txhua hnub. Thaum mloog lus qhuab qhia, nyeem ntawv txhawb siab, peb yuavtsum xyum cov ntseeg hauv Npele-as tus qauv, tshuaj xyuas thiab muab piv rau Vajluskub saib puas yog li Vajtswv Txojlus qhia: “Paulus qhia cov Yudais uas nyob hauv lub nroog Npele-as hais tias, lawv yoojyim qhia dua li nws qhia cov uas nyob hauv lub nroog Thexalaunikes. Cov neeg Npele-as kub siab lug mloog Vajtswv txojlus thiab lawv niaj hnub kawm Vajtswv txojlus saib puas muaj tseeb raws li Paulus qhia” (Tes Haujlwm 17:11). Yog tsis ua li ntawd, peb yuav yoojyim poob rau tej lus ntxias lus qab zib uas rub peb lub neej sab nqaij tawv, yog peb tsis paub tseeb Vajtswv Txojlus. Cov ntseeg uas nquag kawm thiab tshawb Vajtswv Txojlus yuav paub tseeb thiab sawv ruaj tsis poob rau kev dag ntxias.
Thov Vajtswv,
Vajtswv, nyuam yaus tabtom nyob rau lub sijhawm kawg, muaj ntau tus xibhwb cuav, cevlus cuav tuaj hauv Koj pawg ntseeg, ua rau tawg pab tawg pawg. Thov pab nyuam yaus nquag kawm Koj Txojlus paub ceevfaj thiab feeb meej thiab khiav deb cov neeg cuav ntawd. Nyuam yaus tuav Tswv Yexus Khetos lub npe thov, Amees.
Yuav ua cas thiaj sib koom tiv thaiv tau kev ua neej hauv pawg ntseeg?
Nyeem Vajluskub hauv peb lub xyoos: Pajlug 26
Kênh Youtube BHKTHN:
