Kalatias 6:6-10
Nqe cim:
“Txhua lub sijhawm uas peb pab tau lwm tus, peb yuav tsum pab, tiamsis peb yuav tsum pab cov ntseeg heev dua” (Kalatias 6:10)
Lus nug rau sawvdaws xav:
– Timthawj Paulus qhia meej txog tus cai “…yuav tsum sib pab ris nra…” los ntawm tej haujlwm twg thiab ua rau leejtwg?
– Nws txhawb Vajtswv cov menyuam li cas hauv kev sib pab thiab ua haujlwm zoo?
– Peb tau txhawb zog li cas thaum ua neej sib pab thiab ua haujlwm zoo?
Hauv tsab ntawv Kalatias 6:1-5, Timthawj Paulus qhia meej txog tus cai “…yuav tsum sib pab ris nra…” txuas ntxiv hauv nqe 6-10, Paulus piav qhia meej txog tus cai sib pab ris nra ntawd muaj ob tes haujlwm yuav tsum ua, yog sib pab thiab ua haujlwm zoo rau peb pab neeg uas yog pab rau cov qhia Vajtswv Txojlus, tibneeg txhua tus thiab cov kwvtij koom kev ntseeg.
Tiam Vajluskub qub muaj kevcai qhia meej txog tes haujlwm yuavtsum pub muaj txaus noj haus rau cov povthawj hauv lub Tuamtsev, tiamsis tiam Paulus nyob tsis tau muaj tus cai muab nyiaj hli rau cov qhia Vajtswv Txojlus, ntau tus cim civ nrhiav nyiaj los yug yus, ib yam li timthawj Paulus xaws tsev ntaub muag thiaj tau nyiaj siv ua Vajtswv haujlwm. Nkag siab tus uas ib ke ua Vajtswv haujlwm ib ke nrhiav nrhiav nyiaj yug yus, thiab Paulus kuj tsis xav kom pawg ntseeg muab nws ua tus qauv los ua kev kawm rau lwm tus, vim li ntawd nws thiaj ntuas cov ntseeg hais tias “tus uas kawm Yexus Khetos zaj, nws yuavtsum zoo siab hlo muab tej uas nws muaj faib rau tus uas qhia nws” (nqe 6), raws li lub ntsiab tseeb yog “faib txhua yam zoo uas yus muaj” pub rau tus uas qhia Vajtswv Txojlus rau yus. Txhua yam zoo, zoo li nyiaj txiag, khoom qhov txhia chaw, kev noj haus… Txhua tus ntseeg hauv pawg ntseeg yuav tsum paub muab txhua yam zoo uas yus muaj txhawb pub rau cov qhia Vajtswv Txojlus rau yus.
Pab neeg tim ob, timthawj Paulus qhia peb yuav tsum sib pab ris nra dhau los ntawm tes haujlwm ua zoo “rau txhua tus” (nqe 10). Leejtwg twb txawj ua zoo rau tus ua zoo rau yus, tiamsis ua zoo rau txhua tus yog tes haujlwm tsawg leej xav ua. Kev ua zoo rau txhua tus yog ib qhov kev ua tim khawv rau cov tsis tau paub Vajtswv txoj kev hlub tseeb ntawm cov ntseeg Vajtswv, “…kom lawv thiaj yuav pom tej haujlwm zoo uas nej ua thiab qhuas nej Leejtxiv uas nyob saum ntuj ceebtsheej” (Mathais 5:16 MWW 2022).
Pab neeg tim peb uas peb yuav tsum pab, kuj zoo li pab neeg tim ob thiab ntag tiamsis “tshwjxeeb yog ua zoo rau cov uas nyob rau hauv tsev neeg ntseeg Vajtswv” (nqe 10 MWW 2022). Tes haujlwm ua zoo ntawm tus ntseeg yuav tsum pib hauv cov tsev neeg ntseeg Vajtswv uas yog cov ntseeg nyob txhua qhov chaw hauv yus lub tebchaws thiab mus thoob qab ntuj. Yog peb tsuas ua zoo rau cov sab nraud, tsis ua zoo rau peb cov kwvtij koom kev ntseeg ces peb yog neeg ntsejmuag ncaj siab nkhaus, tsuas yog xav ua kom luag pom thiab tau qhuas xwb.
Timthawj Paulus txhawb Vajtswv cov menyuam hauv nqe 7-9 hais tias, “tsis txhob nkees ua tej haujlwm zoo”. Lub plag pab kom peb ua tau tej haujlwm zoo no yog los ntawm qhov tseeb uas hais tias “yeej tsis muaj ib tug yuav dag tau Vajtswv, txhua tus nyias yuav tau sau raws li tej uas nyias tseb” Tseeb tiag, peb sib pab thiab ua haujlwm zoo ces peb yeej tsis cia siab kom tau pauj rov qab, tiamsis Vajtswv tus uas paub txhua yam uas peb ua, thaum txog Nws lub sijhawm lawm, Nws yuav muab nqis zog zoo kawg nkaus rau peb.
Thov Vajtswv,
Vajtswv, thov pab kom nyuam yaus npaj txhij sib pab ris nra dhau los ntawm tes haujlwm sib pab thiab ua haujlwm zoo thaum yog zoo sijhawm uas Koj pub nyuam yaus muaj peevxwm ua tau. Nyuam yaus ntseeg hais tias, muaj ib hnub yuav tau sau tej nqi zog ntawd. Nyuam yaus tuav Tswv Yexus Khetos lub npe thov. Amees.
Peb puas hnyav siab thaum uas sib pab ua tes haujlwm zoo? Peb ua tej ntawd zoo li cas?
Nyeem Vajluskub hauv peb lub xyoos: Ntawv Nkauj 54-55
Kênh Youtube BHKTHN:
