Klei Aê Diê Blŭ: Galati 6:6-10
Êlan kliăng: “Snăn êjai hruê găl, brei drei ngă jăk kơ jih jang mnuih, boh nik nak kơ phung ayŏng adei hlăm klei đăo” (Galati 6:10)
Klei êmuh ksiêm mĭn: Khua ƀĭng kna Y-Pôl bi klă klei mtă “Đru bi gui klei ktrŏ hdơ̆ng diih” hŏng ya bruă ngă leh anăn ngă kơ hlei pô? Si ñu bi mđĭ ai phung đăo hlăm klei bi mbha leh anăn ngă jăk? Ya klei bi mđĭ ai drei mâo tơdah hdĭp hŏng klei thâo bi mbha leh anăn ngă jăk?
Hlăm hră Galati 6:1-5, Khua ƀĭng kna Y-Pôl mtă “đru bi gui klei ktrŏ hdơ̆ng diih”, lŏ čuê hlăm êlan 6-10, ñu bi klă kơ klei đru bi gui klei ktrŏ anăn hŏng dua bruă ngă klă jing bi mbha leh anăn ngă jăk kơ tlâo phung mnuih, anăn jing: pô mtô Klei Aê Diê Blŭ, jih jang mnuih, leh anăn phung ayŏng adei hlăm klei đăo.
Hlăm ênuk Klei Bi Mguôp Hđăp, mâo klei bi kčah klă kơ klei brei mnơ̆ng ƀơ̆ng huă kơ phung khua ngă yang hlăm Sang Aê Diê. Hlăm ênuk Khua ƀĭng kna Y-Pôl ka mâo klei mtrŭn brei prăk mlan ôh kơ pô mtô Klei Aê Diê Blŭ, lu mnuih ăt mă bruă čiăng duah mnơ̆ng ƀơ̆ng huă kơ digơ̆ pô. Msĕ si Khua ƀĭng kna Y-Pôl tuôm ngă leh bruă ngă sang čhiăm čiăng mă bruă kơ Aê Diê. Thâo săng klă kơ klei dleh dlan phung mă bruă kơ Aê Diê êjai leh anăn duah ƀơ̆ng huă êjai, leh anăn ñu kăn čiăng rei Phung Sang Aê Diê mă ñu jing klei bi hmô pioh mgô̆ pô mkăn gưt kơ klei diñu mtrŭn, kyuanăn ñu mtă brei phung đăo “bi mbha jih jang mnơ̆ng jăk kơ pô mtô kơ ñu” (êlan 6). Jih jang mnơ̆ng jăk anăn tăp năng jing prăk mah, dŏ dô yua, klei bi mguôp…Brei phung đăo hlăm Phung Sang Aê Diê bi êdah klei thâo bi mbha jih jang mnơ̆ng jăk čiăng bi mđĭ ai phung mtô Klei Aê Diê Blŭ kơ ñu.
Phung mnuih tal dua Khua ƀĭng kna Y-Pôl mtă brei đru gui klei ktrŏ hŏng klei ngă jăk kơ “jih jang mnuih” (êlan 10). Jih jang mnuih dưi sơăi ngă jăk kơ pô ngă jăk kơ ñu, ƀiădah ngă jăk kơ jih jang mnuih jing klei hưn bi sĭt brei jih jang phung ka thâo kral Khua Yang ôh ƀuh klei khăp sĭt mơ̆ng phung đăo leh kơ Khua Yang, “…čiăng kơ diñu dưi ƀuh bruă jăk diih ngă leh anăn diñu mpŭ mni kơ Ama diih hlăm adiê” (Y-Mathiơ 5:16).
Phung tal tlâo brei drei bi mbha jing phung mbĭt hŏng phung tal dua anăn, ƀiădah brei drei mđing dlăng hĭn “boh nik nak kơ phung ayŏng adei hlăm klei đăo”. Bruă jăk phung đăo srăng kčưm ngă êlâo hĭn jing ti krah phung đăo, jing phung đăo tar ƀar čar pô, leh anăn tar ƀar lăn ala. Tơdah drei knŏng jăk hŏng phung ti êngao ƀiădah amâo uêñ ôh kơ phung ayŏng adei hlăm klei đăo snăn drei jing ai ngăm yơh, ngă čiăng kơ pô mkăn ƀuh leh anăn bi mni đuč.
Khua ƀĭng kna Y-Pôl bi mđĭ ai phung đăo hlăm êlan 7-9 “Đăm brei drei jing êmăn ôh hlăm klei ngă jăk”. Anôk păn čiăng drei mâo klei amâo mâo êmăn anăn jing klei sĭt nik arăng amâo dưi mưč kơ Aê Diê ôh, ya mjeh arăng rah, ñu srăng wiă boh anăn mơh. Sĭt nik drei bi mbha leh anăn ngă jăk amâo bi hmăng kơ arăng lŏ wĭt ngă jăk ôh, ƀiădah Aê Diê Pô Thâo Jih Jang Mnơ̆ng thâo jih bruă drei ngă leh, leh anăn truh ênuk bi kčah, Ñu srăng brei drei wiă boh tŭ dưn jăk siam.
Drei tuôm êdu ai mơ̆ tơdah bi mbha leh anăn ngă jăk? Si drei dưi găn leh klei anăn?
Wah lač: Ơ Khua Yang, đru kâo thâo đru bi gui klei ktrŏ hdơ̆ng phung ayŏng adei hŏng klei yua jih mmông găl čiăng bi mbha leh anăn ngă jăk tui si hnơ̆ng dưi Ih brei. Kâo đăo sĭt nik truh kơ ênuk bi kčah, Ih srăng brei kâo wiă boh tŭ dưn. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 54-55
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
