Klei Aê Diê Blŭ: II Bruă Mtao 6:16-17
Êlan kliăng: “Ơ Yêhôwa, brei kâo thâo êlan Ih; bi hriăm kâo êlan Ih.” (Klei Mmuñ Hđăp 25:4)
Klei êmuh ksiêm mĭn: Ya ngă Khua pô hưn êlâo Y-Êlisê dưi wah lač brei kơ dĭng buăl ñu? Klei anei brei ƀuh kơ hlei pô brei drei wah lač êlâo hĭn? Ya klei drei akâo kơ Khua Yang mblang ală drei čiăng dưi ƀuh?
Khua pô hưn êlâo Y-Êlisê dưi lač hŏng dĭng buăl ñu: “Đăm huĭ ôh” leh anăn wah lač brei kơ gơ̆ kyua ñu ƀuh leh lu lĭn phung kahan Aê Diê arăng amâo dưi ƀuh ôh dôk mbĭt hŏng diñu. Snăn, pô wah lač brei kơ mnuih mkăn dưi “ƀuh”, êlâo hĭn jing pô dưi “ƀuh” jih ya klei Khua Yang bi êdah, čiăng lač jing mâo klei ƀuh myang. Êlâo kơ wah lač brei kơ pô mkăn dưi mblang ală, brei drei akâo kơ Khua Yang mblang ală drei pô, pŏk lui hĕ jih čhiăm păng, mnư̆ gang ngă kơ drei amâo dưi ƀuh jih hlăm klei ƀuh myang. Amâo mâo ôh klei mkăn năng huĭ hĭn kơ sa čô mnuih bum ală ƀiădah mĭndah ñu pô jing mngač ală leh anăn brei mnuih mkăn êbat djŏ tui si êlan ñu dôk nao, boh nik tơdah drei jing khua gĭt gai amâodah mnuih mtô bi hriăm mnuih mkăn (Y-Mathiơ 15:14). Leh anăn ăt kăn mâo klei mkăn huĭ hyưt hĭn kơ sa čô mnuih, ƀăng êgei ñu blŭ nanao kơ klei đăo yơh ƀiădah tơdah tlă anăp hŏng klei dleh, amâo mgaih mkra hŏng klei đăo ôh biădah lĕ msir mkra tui si klei dưi ñu pô leh anăn tui si êlan hdră lăn ala.
Brei drei wah lač brei bĕ kơ phung anak, găp djuê, mah jiăng… dưi mblang ală čiăng thâo ƀuh klei hdĭp amâo djŏ knŏng hjăn ti lăn ala anei ôh ƀiădah wăt hlăm ênuk hlŏng lar, ƀuh klei luč čang hmăng mnuih amâo mâo Khua Yang, leh anăn ƀuh Khua Yang Yêsu čiăng jum Klei Mrâo Mrang Jăk Bi Mtlaih.
Akâo Khua Yang brei drei thâo ƀuh nanao klei Aê Diê dôk mbĭt leh anăn dôk kiă kriê drei, mbĭt hŏng klei ktang myang, klei sĭt suôr, klei thâo mĭn, leh anăn klei jăk Ñu. Snăn kơh drei amâo êdu ai ôh tơdah ƀuh klei awăt êdu drei pô, wăt kăn mâo klei mgao knang hjăn kơ klei ktang pô rei. Tơdah thâo ƀuh klei Khua Yang kiă kriê hlăm jih jang klei truh, drei ăt srăng thâo kral klei mgaih mkra mơ̆ng Aê Diê msĕ mơh, čiăng dưi dôk sĭt suôr êbat hlăm Klei Aê Diê Blŭ, thâo dôk gĭr čang guôn klei Khua Yang gĭt gai ktrâo atăt leh anăn hruê mmông Ñu wăt tơdah si klei truh dưn mơh.
Akâo Khua Yang brei drei thâo ƀuh klei kñăm čiăng hlăm klei hdĭp amâo djŏ ôh jing prăk kăk, anôk bruă, klei kƀăt siam, hră dŏ bi knăl, klei mpŭ mơ̆ng pô mkăn, ƀiădah jing ênoh yuôm klei hdĭp myang ktang kjăp leh anăn năng mpŭ hĭn (II Kôrantô 4:18; I Y-Pêtrôs 1:3-6).
Akâo Khua Yang brei drei thâo ƀuh klei hdĭp jing sa kdrăn blah myang, klei myang phung roh yang jhat mâo sĭt, kyuanăn drei knŏng bi blah hŏng phung roh myang hŏng mnơ̆ng bi blah myang yơh (Êphêsô 6:12-13). Akâo Khua Yang brei ală drei dưi mblang čiăng thâo ƀuh klei soh jing klei soh yơh, leh anăn thâo ƀuh klei jhat ƀai amâo tuôm jing klei jăk ôh, klei blŭ luar amâo tuôm jing klei sĭt nik ôh, leh anăn klei lhiăr klei bi kdơ̆ng hŏng Khua Yang amâo tuôm dưi jing êlan atăt truh kơ klei jăk mơak ôh (Klei Bi Hriêng 1:10-15).
Ya mta klei êlâo hĭn drei khăng akâo kơ Khua Yang brei kơ drei?
Wah lač: Ơ Khua Yang, akâo Ih mblang ală kâo čiăng kơ kâo ƀuh klei Khua Yang dôk kiă kriê klei hdĭp kâo. Brei kâo dôk gĭr wah lač brei leh anăn đru phung riêng gah kâo dưi mblang ală čiăng thâo ƀuh Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
