2 Vajntxwv 6:16-17
Nqe cim:
“Tus TSWV, thov qhia kom kuv paub koj txojkev, qhia kom kuv paub tej kev no tseeb” (Ntawv Nkauj 25:4)
Lus nug rau sawvdaws xav:
– Vim li cas Elisas thiaj thov Vajtswv rau nws tus tubtxib?
– Qhov ntawd qhia pom leejtwg tsimnyog peb thov Vajtswv pab rau nws?
– Peb yuav tsum thov Vajtswv qhib qhovmuag kom pom yam dabtsi?
Tus cev lus Elisas hais tau rau nws tus tubtxib hais tias: “Tsis txhob ntshai” thiab thov Vajtswv rau tus tubtxib, vim Elisas tabtom pom Vajtswv cov tub rog uas qhovmuag ntsia tsis pom nyob puagncig nws. Yog li ntawd, tus thov Vajtswv qhia rau lwm tus “pom”, ua ntej yus yuav tsum yog tus xub “pom” tej uas Vajtswv qhia. Lub ntsiab yog yuavtsum muaj qhov kev saib pom ntawm sab ntsujplig. Ua ntej thov Vajtswv qhib lwm tus qhovmuag, peb yuav tsum thov Vajtswv qhib peb lub qhov muag, pab tshem daim thaiv peb qhovmuag pov tseg, rhuav tej phabntsa uas thaiv peb saib tsis pom txhua yam ntawm sab ntsujplig pov tseg. Tsis muaj ib yam dabtsi txaus ntshai npaum li tus neeg dig muag uas nws pheej xav hais tias nws pom kev thiab xav kom lwm tus mus raws nws qab; tshwjxeeb yog thaum uas peb ua ib tug thawjcoj lossis yog tus qhia lwm tus (Mathais 15:14). Kuj tsis muaj ib yam uas txaus ntshai npaum li ib tug neeg uas lub ncauj pheej hais txog kev ntseeg, tiamsis thaum ntsib teebmeem tsis daws los ntawm kev ntseeg, tiamsis daws los ntawm nws lub tswvyim, lub peevxwm thiab raws ntiajteb kev xav.
Peb cia li thov Vajtswv rau peb tej menyuam, tsev neeg thiab tej phoojywg… tau Vajtswv qhib qhovmuag kom saib pom kev ua neej tsis yog hauv ntiajteb no xwb tiamsis tseem saib pom lub neej uas nyob mus ibtxhis, saib pom lub tsamthawj tas kev cia siab ntawm tus tsis ntseeg Vajtswv thiab saib pom kev cheemtsum los txais yuav Tswv Yexus kom tau kev Cawm dim.
Thov Vajtswv pub kom peb saib pom Vajtswv txoj kev tswj kav ntawm Nws lub hwjchim, Nws kev ncaj ncees, kev txawj ntse thiab Nws kev ib txwm ua zoo. Thaum pom li ntawd peb thiaj tsis qaug zog, thiaj tsis khavtheeb, thiab paub txo fwjchim los vamkhom Vajtswv. Thaum uas saib pom Vajtswv kev tswj kav hauv txhua lub sijhawm, peb yuav zeem paub Vajtswv txoj haukev daws teebmeem thiab ua taus siab ntev raws li Vajtswv Txojlus, txawm lub neej tau zoo lossis txomnyem yuav ua siab ntev tos Vajtswv kev coj thiab Vajtswv lub sijhawm.
Thov Vajtswv pab rau peb pom lub homphiaj rau kev ua neej tsis yog nyiaj txiag, meejmom, kev zoo nkauj, tej ntawv povthawj, tau lwm tus fwm, tiamsis yog tej uas muaj nqis ruaj khov ntawm sab ntsujplig thiab saib yam ntawd tseemceeb dua (2 Kauleethaus 4:18; 1 Petus 1:3-6).
Thov Vajtswv pub rau peb zeem paub lub neej yog ib npluav rog ntawm sab ntsujplig, yeebncuab sab ntsujplig yog yam uas muaj tseeb thiab peb tsuas tawmtsam yeej cov yeebncuab ntawd los ntawm siv Vajtswv tej cuabyeej xwb (Efexus 6:12-13). Thov Vajtswv qhib peb lub qhovmuag saib pom kev txhaum yog kev txhaum, thiab pom yam phem yeej tsis yog yam zoo, lo lus dag yeej tsis muaj hnub yog tseeb, kev tawmtsam Vajtswv yeej tsis muaj hnub yog txoj kev coj mus tau txais Vajtswv koob hmoov ib zaug li (Pajlug 1:10-15).
Thov Vajtswv,
Vajtswv, thov qhib nyuam yaus lub qhovmuag kom saib pom Koj kev tswj kav nyuam yaus lub neej. Thiab pub nyuam yaus muaj lub siab ntev thov Koj pab rau cov uas nyob ibncig ntawm nyuam yaus kom lawv qhovmuag saib pom Vajtswv Koj. Nyuam yaus tuav Tswv Yexus Khetos lub npe thov. Amees.
Peb pheej thov Vajtswv pab rau peb cov phoojywg yam dab tsi?
Nyeem Vajluskub hauv peb lub xyoos: 1 Xwmtxheej Vajntxwv 28
Kênh Youtube BHKTHN:
