Klei Aê Diê Blŭ: II Klei Yăl Dliê 20:5-12
Êlan kliăng: “…Kyuadah hmei amâo mâo klei ktang ôh bi blah hŏng phung lu lĭn anei hriê ngă kơ hmei. Hmei amâo thâo ôh ya srăng ngă, ƀiădah ală hmei dôk dlăng kơ Ih.” (II Klei Yăl Dliê 20:12)
Klei êmuh ksiêm mĭn: Kơ ya mta klei mtao Y‑Jôsaphat knang, čiăng myơr kơ Khua Yang klei ñu iêô kwưh? Si drei mă yua klei wah lač anei kơ drei?
Dôk ti anăp klei soh ñu ngă leh, mtao Y‑Jôsaphat thâo kơ ñu pô “hmei amâo mâo klei ktang ôh” leh anăn wăt “amâo thâo ôh ya srăng ngă”, ñu knŏng thâo nao ti anăp Khua Yang hŏng klei luă gŭ thâo kral klei Aê Diê jing prŏng. Ñu kčưm klei blŭ wah lač hŏng dŭm klei êmuh hlăm êlan 6 čiăng hưn klă klei ktang myang Aê Diê, ñu amâo mâo klei mĭn đing ôh. Leh anăn ñu mñă jih bruă Khua Yang ngă leh kơ phung ƀuôn sang Israel (êlan 7). Jing klei thâo mĭn sĭt, tơdah lŏ mñă jih bruă yuôm bhăn Khua Yang ngă êjai mmông wah lač, kyuadah srăng đru bi kjăp klei drei đăo kơ Aê Diê, mpŭ mni kơ Aê Diê leh anăn mñă kơ drei pô hdơr kơ Aê Diê drei amâo tuôm mlih ôh.
Tui čuê, mtao Y‑Jôsaphat bi êdah klei ñu đăo kơ klei ƀuăn leh anăn klei sĭt suôr Aê Diê. Hlăm êlan 8-9, ñu lŏ mñă klei mtao Y‑Salômôn wah lač hlăk myơr Sang Yang (II Klei Yăl Dliê 6) leh anăn klei Khua Yang lŏ wĭt lač kơ klei wah lač anăn (II Klei Yăl Dliê 7:12-16). Mtao Y‑Jôsaphat brei ƀuh, klei đăo jing mta phŭn yuôm kơ klei wah lač. “Leh anăn tơdah amâo mâo klei đăo, amâo dưi bi mơak kơ Aê Diê ôh. Kyuadah hlei pô čiăng nao giăm Aê Diê, brei đăo mâo Aê Diê, leh anăn Aê Diê mưn hlei pô duah Ñu.” (Hê-bơ-rơ 11:6). Lu mnuih lui brei klei dleh dlan ƀuh ti anăp ală bi huĭ diñu leh anăn đing kơ klei đăo, atăt kơ klei wah lač amâo mâo boh tŭ dưn ôh msĕ si klei Y‑Yakơ mtô leh, “Ƀiădah brei ñu akâo hŏng klei đăo, amâo đing ôh, kyuadah hlei pô đing jing msĕ si êa ksĭ poh yă angĭn bi ktlư̆ leh anăn kpuh. Mnuih msĕ snăn đăm mĭn ñu srăng mă tŭ sa mta mnơ̆ng mơ̆ng Khua Yang ôh: …” (Y‑Yakơ 1:6-7).
Klei đăo mtao Y‑Jôsaphat leh anăn phung ƀuôn sang bi êdah hŏng klei wah lač jih ai tiê “ƀiădah ală hmei dôk dlăng kơ Ih” (êlan 12). Êjai diñu dôk dơ̆ng “hlăm sang Yêhôwa” (êlan 5), jing anôk bi knăl mâo Aê Diê dôk mbĭt leh anăn anôk phung ƀuôn sang pioh kkuh mpŭ kơ Aê Diê. Mtao Y‑Jôsaphat wah lač, tơdah Khua Yang amâo mgang diñu, snăn phung roh srăng “hriê čiăng suôt hmei mơ̆ng lăn ngăn dưn Ih brei leh kơ hmei mă bha”. Luč lăn ngăn dưn jing luč Sang Yang, luč wăt klei kkuh mpŭ. Mtao wah lač hŏng Khua Yang snei, ñu đăo knang kluôm dhuôm kơ Khua Yang “Kyuadah hmei amâo mâo klei ktang ôh bi blah hŏng phung lu lĭn anei hriê ngă kơ hmei. Hmei amâo thâo ôh ya srăng ngă, …” (êlan 12). Tơdah tlă anăp hŏng klei lông dlăng dleh dlan, brei drei luă gŭ wah lač thâo kral klei ktang myang, klei sĭt suôr, leh anăn wăt klei khăp Khua Yang pioh brei kơ drei.
Si drei khăng wĭt ngă tơdah tlă anăp hŏng klei dleh dlan, čiăng bi knal klei đăo kơ Khua Yang?
Wah lač: Ơ Khua Yang, bi mni kơ Khua Yang kyua Ih jing Pô sĭt suôr, Pô khăp, amâo djăl ăl, leh anăn kăp pap brei klei soh hmei, tơdah hmei êran nao kơ Ih hŏng ai tiê mčah. Akâo Khua Yang đru rŭ kâo êjai mmông knap mñai. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Êphêsô 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
