II Xwmtxheej Vajntxwv 20:5-12
Nqe cim:
“…rau qhov tsis muaj leejtwg pab peb kom dim ntawm cov tubrog coob heev uas tuaj tua peb. Peb tsis paub yuav ua li cas, tiamsis peb thov koj pab peb.” (II Xwmtxheej Vajntxwv 20:12)
Lus nug rau sawvdaws xav:
– Vajntxwv Yehausafas muab dabtsi los fij thiab thov Vajtswv pab?
– Peb kawm tau cov lus thov Vajtswv no rau peb zoo li cas?
Tabmeeg tus kheej tej kev txhaum, Vajntxwv Yehausafas paub tias nws “tsis muaj peevxwm” thiab kuj “tsis paub yuav ua li cas”, nws tsuas tshuav qhov uas mus cuag tus Tswv ntawm lub siab txo hwjchim zeem paub tus Tswv yog tus muaj hwjchim loj. Yehausafas cov lus thov Vajtswv yog ib co lus nug tsis ua xyem xyav txij nqe 6 mus hais tias Vajtswv yog tus muaj hwjchim loj kawg nkaus. Nws rov hais txog tej uas tus Tswv tau ua rau cov Yixalayees (nqe 7). Nov yog ib lub tswvyim zoo thaum hais tej uas hais txog tej txujci tseemceeb uas tus Tswv ua hauv kev thov Vajtswv vim yuav ua kom peb muaj kev ntseeg ntxiv, qhuas Nws thiab nco ntsoov tias Vajtswv tsis hloov.
Txuas ntxiv, Vajntxwv Yehausafas qhia tawm kev ntseeg txog Vajtswv tej lus cog tseg. Hauv nqe 8-9, Yehausafas rov hais tej lus uas Vajntxwv Xalumoos thov thaum nws fij Tuamtsev (II Xwmtxheej Vajntxwv 6) thiab tus Tswv tej lus hauv (II Xwmtxheej Vajntxwv 7:12-16). Vajntxwv Yehausafas qhia paub kev ntseeg yog qhov tseemceeb thaum thov Vajtswv. “Tus uas tsis ntseeg yeej ua tsis tau haum Vajtswv siab, rau qhov tus uas xav los cuag Vajtswv, tus ntawd yuav tsum ntseeg hais tias yeej muaj Vajtswv tiag, thiab Vajtswv yuav muab nqi zog rau tus uas los cuag Vajtswv.” (Henplais 11:6). Ntau leej cia tej kev txomnyem ib vuag uas qhov muag ntsia pom ua rau lawv txhawj ntshai thiab ua xyem xyav kev ntseeg, tej lus thov Vajtswv thiaj tsis txais ib yam li Yakaunpaus qhia, “thaum nej thov Vajtswv nej yuav tsum ntseeg tsis txhob ua xyem xyav. Tus uas ua xyem xyav, tus ntawd zoo ib yam li tej dej Hiavtxwv uas cua ntsawj ntas mus ntas los. Tus uas zoo li ntawd, nws tsis txhob xav hais tias nws yuav tau ib yam dabtsi ntawm Vajtswv li.” (Yakaunpaus 1:6-7).
Vajntxwv Yehausafas thiab cov pejxeem txojkev ntseeg qhia tshwm los ntawm lawv tej lus taij thov “peb thov koj pab peb.” (nqe 12). Lawv tabtom sawv“hauv lub tshavpuam tshiab ntawm lub Tuamtsev” (nqe 5), qhov chaw piv txog cov pejxeem ntsib Vajtswv thiab pehawm Vajtswv. Vajntxwv Yehausafas thov Vajtswv hais tias, yog tus Tswv tsis tiv thaiv ces yeebncuab yuav“tuaj muab peb raws tawm hauv lub tebchaws uas koj muab rau peb lawm.” Poob lub tebchaws uas tus Tswv pub ces kuj yog poob lub Tuamtsev, tsis muaj kev pehawm. Vajntxwv hais rau tus Tswv hais tias nws yeej cia siab ntsoov rau tus Tswv “rau qhov tsis muaj leejtwg pab peb kom dim ntawm cov tubrog coob heev uas tuaj tua peb. Peb tsis paub yuav ua li cas, tiamsis peb thov koj pab peb” (nqe 12). Thaum ntsib kev sim siab txomnyem, cia li txo hwjchim thov Vajtswv zeem paub Nws lub hwjchim, Nws kev ua ncaj ncees, thiab nws txojkev hlub uas pub rau peb.
Thov Vajtswv,
Tus Tswv, nyuam yaus ua Koj tsaug vim Koj yog tus uas ua raws li Koj hais, muaj kev hlub, ua siab ntev, thiab zam txim thaum nyuam yaus los cuag Koj. Thov Koj tsa nyuam yaus thaum tws kev. Nyuam yaus tuav Tswv Yexus lub npe thov, Amees.
Peb pheej ua li cas thaum ntsib tej teebmeem los raug ua kom peb muaj kev ntseeg rau tus Tswv?
Nyeem Vajluskub hauv peb lub xyoo: Efexus 2
Kênh Youtube BHKTHN:
