II Hơ’mon 20:1-4
Kơkuh kơ lu bơngai mă mơ̆ng,
Năr âu lu bơ̆n gô tơchĕng pơwao ‘bai pơhrăm đei kơ̆l bai: Tơ’bơ̆p Tơdrong Anat Pat kiơ̆ kơ lăm Sơ̆p hla bơar Nơ̆r ‘Bok Kei-Dei II Hơ’mon 20:1-4.
1 Klaih kơ noh đei lu bơngai Môap, Ammôn păng kư̆m đei bơngai Mêunit năm hơdai blah Jêhôsaphat. 2 Đei bơngai năm roi tơbăt ăn kơ Jêhôsaphat thoi âu: “Đei minh khŭl linh lơ tơpă đơ̆ng char Eđôm pah to dơsĭ lu sư năm wă tơblah hăm ih; to lu sư oei lăm pơlei Hasasôn Tamar, (kư̆m anăn pơlei Êngêđi) 3 Jêhôsaphat hli, na hơmet jơhngơ̆m sư chă Kră Yang Yêhôwa, na kư̆m roi tơbăt jơ̆p kơ dêh char athei ơ̆t kơ sŏng sa. 4 Lu bơngai Juđa akŭm băl wă krao chă Kră Yang dŏng tơgŭm; lu Sư năm đơ̆ng jơ̆p pơlei oei lăm dêh char Juđa krao chă Kră Yang.
Trong tơm ‘bai pơhrăm ‘nâu:
“Jêhôsaphat hli, na hơmet jơhngơ̆m sư chă Kră Yang Yêhôwa, na kư̆m roi tơbăt jơ̆p kơ dêh char athei ơ̆t kơ sŏng sa.” (II Hơ’mon 20:3)
Nơ̆r jet tơchĕng pơwao:
– ‘Bok Pơtao Jêhôsaphat đei tơ’bơ̆p lăm tơdrong hơnat kiơ?
– Tơdrong sư pơm thoi yơ kơ plah đei tơ’bơ̆p tơdrong hơnat?
– Bơ̆n đei pơm thoi yơ kơplah bơ̆n đei pơm glăI na đei ‘Bok Kei-Dei chrih tơ’bôh?
Kơkuh kơ đĭ đăng,
Jêhôsaphat noh jơ̆ pơtao mă puăn lăm dêh Juđa. Sư jơ̆ minh ‘nu bơngai hli yom kơ ‘Bok Kei-Dei păng đei tơdrong pŭn hiôk (II Hơ’mon 17:3-4). Tơdrong hơnat lăm chăl 20 đei thoi âu “đơ̆ngh rŏng kơ dôm tơdrong âu” (trong 1) wă khan đơ̆ng rŏng kơ pơtao Jêhôsaphat đei pơm grŭp hơdai hăm pơtao mă chư̆ dêh pơgơ̆r dêh char Israel noh jơ̆ anăn sư Ahap wă năm blah lu bơngai Syri (II Hơ’mon chăl 18), păng bơngai pơtruh nơ̆r ‘Bok Kei-Dei a-năn sư Jêhu đei roi tơbăt kơ sư tơdrong hil mĭl đơ̆ng ‘Bok Kei-Dei, tơbăt kơ sư na sư băt kơ tơdrong yoch sư kơdih na sư păng kon pơlei đei jơhngơ̆m tơbral (II Hơ’mon 19:2-4). Đơ̆ng rŏng kơ ‘noh pêng tŏ teh đak pơ pôi hơdai năm blah lu bơngai Israel noh jơ̆ Mô-ap, Am-môn păng hơdrĕch bơngai Mao-nit lu sư năm blah lu bơngai Israel. ‘nâu jơ̆ lu linh lơ dêh lu sư yak hlôi kơ “đak dơsĭ lôch” wă năm blah pơlei Êngêđi lăm teh đak Juđa. Thoi noh, tơdrong âu lĕch đơ̆ng tơdrong yoch pơtao Jêhôsaphat. Yua kơ kiơ pơtao Jêhôsaphat tơbral bơih mă lei ‘Bok Kei-Dei oei wă bơtho pơjĭ? Athei blŏk tơdrong mơnat đơ̆ng ‘Bok Kei-Dei ưh kơ sĭ ưh kơ đei tơdrong truh kiơ đơ̆ng bơ̆n pơm yoch ôh. Hloh kơ noh dơ̆ng, sơng iŏk tơdrong bơtho pơjĭ noh jơ̆ ba ăn tơdrong ‘lơ̆ng kơ bơngai mă đơ̆ng sư pơm yoch, tơgŭm sư băt kơ tơdrong tih krưp kơ tơdrong yoch păng tơgŭm sư păng pơsĭt kơ tơbral tơpă.
Tơ’bơ̆p tơdrong hơnat tih âu pơm ăn kơ pơtao “Jêhôsaphat hli dêh” yua kơ thoi noh na “sư adrin chă Kră Yang Jêhôwa” (trong 3), Sư băt kơ tơdrong tơblah lĕch đơ̆ng tơdrong yoch sư kơ dih, nâu jơ̆ tơdrong đơ̆ng gah bơhngol na khŏm hơmet đơ̆ng gah bơhngol. Hloh kơ noh dơ̆ng tơdrong Jêhôsaphat pơm tơbăt ăn kơ bơ̆n sư tơbral tơpă. Đơ̆ng tơdrong âu, lu bơ̆n đei pơhrăm tơdah đei tơdrong pơm ưh kơ trŏ păng đei tơdrong chrih tơ’bôh đơ̆ng ‘Bok Kei-Dei lu bơ̆n kăl kơ tơbral hloi, ưh kơ sơngah, păng kŭm sơng iŏk tơdrong truh đơ̆ng tơdrong yoch mă bơ̆n đei pơm ‘noh păng kơdâu tơ Kră Yang ‘Bok Kei-Dei kơ plah đei tơdrong truh hơnat.
Pơtao Jêhôsaphat ưh kơ trŏ sư kơdih tơbral ‘bơ̆t anăp Kră Yang đĕch mă lei sư kŭm “ôr krao đĭ đăng lăm dêh Juđa ơ̆t kơ sŏng sa” păng lu sư kŭm chu kơ nơ̆r ‘‘bok Pơtao đei krao (trong 3-4). Mă khan tơdrong tơblah ‘nâu yua kơ tơdrong yoch ‘bok pơtao Jêhôsaphat mă lei kon pơlei kŭm đei băt mă khan đơ̆ng tơdrong yoch minh ‘nu ‘‘bok pơtao ră gô ba ăn tơdrong răm kơ đĭ đăng kon pơlei. Thoi noh, tơ’bơ̆p tơdrong hơnat âu, ưh kơ sĭ bơngai pơm yoch đĕch tơbral kơdih sư păng chă ‘Bok Kei-Dei đĕch mă lei kăl kơ đĭ kon pơlei pơla. ‘nâu jơ̆ khŭl bơngai lui kăl kơ đei kơ plah tơ’bơ̆p tơdrong yoch păng tơdrong pơ̆k huŏng đơ̆ng lăm ‘nhŏng oh bơngai lui. Athei ‘mêm mơnat, tơdŏng dih băl lăm tơdrong tơblah gah bơhngol kơplah bơ̆n minh jơhngơ̆m đon tơbral chă Kră Yang.
Bĕ bơ̆n pôm jơhngơ̆m đon krao khan,
Ơ Kră Yang, inh bơnê kơ Ih yua kơ tơdrong mơnat Ih ăn kơ inh kơplah inh pơm yoch hăm Ih. Apinh Ih ăn kơ inh iŏk jơhngơ̆m đon ala wă kơ tơbral na đei tơdrong mơnat. Yua anăn Kră Yang Yêsu Krist, Amen.
Ơ đĭ đăng bơngai mơ̆ng mă ‘mêm kơeng,
Kơplah pơm yoch Ih đei pơjah, pơtă lei mă tơbral?
Tơjur akâu jăn ‘bơ̆t anăp Kră Yang, tơbral
Dôm nơ̆r krao khan, Kră Yang đei mơ̆ng
Mêm mơnat, tơdŏng băl,
Ba ăn tơdrong dŏng pơklaih, dôm pah hiôk chơt
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Êphêsô 1.
Kênh Youtube BHKTHN:
