Klei Aê Diê Blŭ: Klei Mmuñ Hđăp 32:1-5
Êlan kliăng: “Snăn kâo hưn klei soh kâo kơ Ih, kâo amâo mdăp klei wê kâo ôh; kâo lač, “Kâo srăng hưn klei kâo gao klei bhiăn kơ Yêhôwa”; hlăk anăn Ih pap brei klei kâo jing soh.” (Klei Mmuñ Hđăp 32:5)
Klei êmuh ksiêm mĭn: Si klei mtao Y-Đawit ngă klei soh knhông leh anăn bi mdjiê mnuih? Si mtao wĭt ngă tơdah khua pô hưn êlâo Y-Nathan bi êdah klei soh mtao? Mơ̆ng ya klei mtao dưi mâo klei pap brei klei soh leh anăn lŏ dưi bi grăng hŏng Khua Yang? Ya klei hriăm kơ drei mơ̆ng rup bi hmô mtao Y-Đawit hưn mdah klei soh ñu?
II Y-Samuel kdrêč 11-12 čih yăl dliê klei mtao Y-Đawit ngă klei soh knhông hŏng H’Batsêba, mô̆ Y-Uri, leh anăn lŏ ngă klei soh bi mdjiê mnuih čiăng bi mkhư̆ hĕ klei hing lar, hŏng klei mtao mtă kơ khua kahan Y-Jôap dưm Y-Uri hlăm pruê̆ êlâo hlăm kdrăn blah jhat ktang hĭn snăn phung roh srăng bi mdjiê Y-Uri. Tơdah khua pô hưn êlâo Y-Nathan nao bi êdah klei soh mtao, mtao thâo kral leh anăn tŭ mtam, ñu amâo lŏ mgang, amâo lŏ hngah dêč kơ klei soh ñu ngă ôh, leh anăn ăt kăn yua klei kơhưm klei dưi ñu, lŏ wĭt ngă jhat kơ khua pô hưn êlâo Y-Nathan čiăng mdăp hĕ klei soh ñu ngă leh rei, ƀiădah mtao luă gŭ tŭ jih klei soh ñu ngă leh, ñu kmhal, hưn klei soh hŏng Khua Yang. Drei ƀuh klă klei anei hlăm Klei Mmuñ Hđăp 32 leh anăn 51.
Leh ngă soh, snăn klei tŭ boh jhat mơ̆ng klei soh jing klei amâo dưi lŏ tlaih ôh, êngao kơ klei anăn, klei soh mtao Y-Đawit wăt ngă bi kgăn klei mtao bi mguôp hŏng Aê Diê mơh. Ai tiê mtao jing ktrŏ msĕ si êa nguôm ti gŭ mđiă yan bhang (êlan 3-4). Êdei kơnăn mtao čih leh jih si klei ñu bi knal: “Snăn kâo hưn klei soh kâo kơ Ih, kâo amâo mdăp klei wê kâo ôh; kâo lač, Kâo srăng hưn klei kâo gao klei bhiăn kơ Yêhôwa; hlăk anăn Ih pap brei klei kâo jing soh” (êlan 5). Mtao hưn klei ñu kmhal sĭt hŏng jih ai tiê, kyuanăn “kâo hưn klei kâo gao klei bhiăn hŏng Yêhôwa” . Mtao thâo kral bruă ñu ngă jing jhat ƀai, leh anăn mtao amâo tuôm mdăp ôh hŏng Khua Yang wăt kăn mdăp rei hŏng jih jang mnuih. Êngao kơ klei hưn klei soh hŏng Khua Yang, mtao wăt lŏ čih dŭm Klei Mmuñ Hđăp mơh, amâo knŏng hưn klei soh ñu ngă leh hŏng phung ƀuôn sang ôh, ƀiădah wăt lŏ brei klei bi hriăm kơ klei hưn klei soh, dưi mâo klei pap brei, leh anăn dưi lŏ bi grăng hŏng Aê Diê, kơ phung anak čô mơh. Boh tŭ dưn, ai tiê mngăt mtao dưi mâo klei jăk mơak kyua “Aê Diê pap brei leh klei soh kâo”, Khua Yang yua mtao hlăm hdră bruă Ñu, leh anăn mơ̆ng klei soh mtao dưi mâo klei Khua Yang pap brei, dưi lŏ bi grăng anăn yơh, jing klei bi hriăm kơ lu mnuih, hlăm anăn mâo wăt phung drei (êlan 1-2).
Hruê anei, si drei lŏ wĭt ngă tơdah mâo pô ktrâo klei soh drei ngă? Lu mnuih kyua djăl čôñ, đŭt ai, hêñ kyuanăn drei khăng hngah kơ klei soh drei ngă, duah êlan diêr dêč amâo čiăng tŭ ôh klei soh pô ngă leh. Tăp năng lŏ wĭt ngă jhat kơ ayŏng adei čiăng mdăp bi hgăm hĕ klei soh pô. Khua Yang amâo mơak ôh tơdah drei wĭt ngă klei msĕ snăn, Klei Aê Diê Blŭ lač: “Hlei pô mdăp klei soh ñu amâo srăng mâo klei đĭ kyar ôh, ƀiădah hlei pô hưn leh anăn lui klei soh anăn srăng mâo klei pap.” (Klei Bi Hriêng 28:13). Drei knŏng dưi mă tŭ klei Khua Yang pap brei klei soh, tơdah drei hưn klei soh drei hŏng Khua Yang. Drei knŏng dưi lŏ bi grăng leh anăn lŏ bi mrâo klei bi mguôp mơ̆ng phŭn êlâo hŏng Khua Yang tơdah drei kmhal sĭt kơ klei soh.
Si ngă drei kmhal mtam mơ̆ tơdah thâo kral drei ngă soh hŏng Khua Yang?
Wah lač: Ơ Khua Yang, Pô Jăk leh anăn bŏ hŏng klei khăp, klei pap. Kâo thâo kâo khăng ngă soh hŏng Khua Yang leh anăn hŏng mnuih mkăn. Akâo kơ Yang Mngăt Jăk kčŭt ƀuah ai tiê kâo grăp blư̆ kâo ngă soh, čiăng kâo dưi mă tŭ klei pap brei, klei bi grăng mơ̆ng Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
