Phau Ntawv Nkauj 32:1-5
Nqe cim:
“Thaum ntawd kuv lees kuv tej kev txhaum rau koj, kuv tsis zais tej uas kuv ua txhaum ib qho li, kuv lees kuv tej kev txhaum huv tibsi rau koj, thiab koj zam tagnrho kuv tej kev txhaum huv tibsi mus” (Phau Ntawv Nkauj 32:5)
Lus nug rau sawvdaws xav:
– Vajntxwv Daviv tau ua txhaum kev nkauj nraug thiab tua neeg licas?
– Thaum tus cev lus Nathas hais tawm vajntxwv tej kev txhaum, nws ua licas?
– Vim qhov twg vajntxwv tau tus Tswv zam txim?
– Peb kawm tau dabtsi ntawm Daviv txoj kev lees txim?
2 Xamuyees tshooj 11,12 tau sau txog zaj xwm uas vajntxwv Daviv tau ua txhaum kev nkauj nraug nrog Npasenpas uas yog Uliyas tus pojniam, tom qab ntawd nws rov ua txhaum tua neeg los ntawm qhov uas nws kom tus thawj tub rog Yau-am cia Uliyas tuaj tom hauv ntej thaum muaj kev sib tua Uliyas thiaj raug tua tuag. Thaum tus cev lus Nathas tuaj qhia vajntxwv txoj kev txhaum rau nws, Daviv thiaj tsim dheev, tsis tawm tsam, paub nws txoj kev txhaum thiab tsis siv nws lub meejmom los muab Nathas tua kom thiaj npog tau nws txoj kev txhaum, tiamsis vajntxwv txo hwjchim thiab lees paub nws txoj kev txhaum, lees txim rau tus Tswv. Peb pom tseeb qhov no nyob hauv Phau Ntawv Nkauj tshooj 32 thiab 51.
Tom qab ua txhaum, nuj nqis ntawm txoj kev txhaum yog yam uas yuav khiav tsis dhau, vim qhov ntawd ua rau txoj kev sib raug zoo ntawm Daviv thiab tus Tswv raug txiav tu. Vajntxwv hnov nws lub zog yaj ntshis li tej hws uas tshav ntuj ziab qhuav lawm (nqe 3-4). Tom qab ntawd Daviv thiaj hais tawm tej uas nws tau lees rau tus Tswv : “Thaum ntawd kuv lees kuv tej kev txhaum rau koj, kuv tsis zais tej uas kuv ua txhaum ib qho li, kuv lees kuv tej kev txhaum huv tibsi rau koj, thiab koj zam tagnrho kuv tej kev txhaum huv tibsi mus” (nqe 5). Vajntxwv hais tawm tagnrho nws lub siab uas lees txim tiag tiag, “kuv lees kuv tej kev txhaum rau koj”. Vajntxwv pom meej nws txoj kev ua phem thiab tsis zais tej ntawd rau tus Tswv thiab tibneeg li. Dhau ntawm kev lees txim rau tus Tswv, vajntxwv tseem sau tej zaj nkauj hais txog nws kev lees txim nrog tej pejxeem thiab ua qauv txog kev lees txim rau sawvdaws, tau kev zam txim thiab rov muaj kev sib haum nrog nws tej xeeb ntxwv. Nqi zog, vajntxwv sab ntsujplig tau koobhmoov vim “Tus Tswv zam kuv tej kev txhaum husi mus”, vajntxwv tau tus Tswv siv rau Nws lub hom phiaj, tej kev txhaum tau tus Tswv zam, rov muaj kev sib haum, ntawd yog ib zaj kawm rau ntau leej, qhov ntawd muaj peb (nqe 1-2).
Niaj hnub no, peb muaj tus cwjpwm li cas thaum tau lwm tus qhia peb qhov kev txhaum rau peb? Ntau zaus peb txaj muag, tsis kam lees yus qhov kev txhaum, nrhiav ntau lub tswvyim los daws peb zaj. Tej zaum peb nrhiav hauv kev ua phem rau peb tus kwvtij kom thiaj npog tau peb tej kev txhaum. Tus Tswv yuav tsis txaus siab thaum peb ua li ntawd. Vajtswv Txojlus hais tias: “Yog koj pheej npog tej kev txhaum tseg koj lub neej yuav tsis vammeej; yog koj lees thiab tso plhuav tej kev txhaum tseg Vajtswv yuav hlub koj” (Pajlug 28:13). Peb tsuas tau txais kev zam txim dhau ntawm Vajtswv kev hlub yog thaum peb lees txim rau Nws. Thaum peb tas siab lees txim rau Vajtswv lawm peb thiaj tau rov nrog Vajtswv sib raug zoo li qub dua .
Thov Vajtswv,
Tus Tswv, Koj yog tus puv npo kev hlub. Nyuam yaus paub hais tias nyuam yaus pheej ua txhaum rau Koj thiab rau tibneeg. Thov Vaj Ntsujplig qhia nyuam yaus kom thiaj tau txais kev zam txim ntawm Koj thiab txoj kev sib raug zoo uas Koj pub. Nyuam yaus tuav Tswv Yexus Khetos lub npe thov. Amees.
Peb puas lees txim kiag thaum paub hais tias tau ua txhaum rau tus Tswv?
Nyeem Vajluskub hauv peb lub xyoos: Pajlug 24
Kênh Youtube BHKTHN:
