Yakaunpaus 3:13-18
Nqe cim:
“Tiamsis lub tswvyim uas los saum ntuj los yog lub uas zoo kawg nkaus. Lub tswvyim ntawd tsis ntau ncauj, paub cai, hais lus zoo, nrog luag ua phoojywg, hlub lwm tus, muab siab rau ua haujlwm zoo, tsis xaiv leejtwg ntsejmuag thiab tsis zais siab.” (Yakaunpaus 3:17)
Lus nug rau sawvdaws xav:
– Lub tswvyim saum ntuj los yog dabtsi thiab txawv lub tswvyim hauv ntiajteb licas?
– Lub tswvyim muaj kev cuamtshuam licas rau peb lubneej?
– Yuav ua cas thiaj nrhiav tau lub tswvyim saum ntuj los?
Txij puag thaum ub los, tibneeg yeej nrhiav tshua lub tswvyim. Muaj coob tug xav yuamkev hais tias lub tswvyim yog tej kev paub deb paub dav. Lub tswvyim tsis yog tsuas hais txog tej kev paub xwb tiamsis tseem yog peb tej kev xav, tus cwjpwm thiab kev paub xaiv yam uas yog. Yog pejxeem hauv Tebchaws Ceeb Tsheej, peb yuav tsum ua neej nrog lub tswvyim saum ntuj los, ntawd yog tus Tswv lub tswvyim, qhia tshwm Nws tus mojyam thiab ua haum Nws siab.
Nyob hauv ntu Vajluskub no, Yakaunpaus feeb meej lub tswvyim saum ntuj los thiab lub tswvyim hauv ntiajteb no. Hais txog lub hauvpaus, tswvyim saum ntuj pib ntawm tus Tswv los, muaj tej yam tshwjxeeb xws li: “yog lub uas zoo kawg nkaus. Lub tswvyim ntawd tsis ntau ncauj, paub cai, hais lus zoo, nrog luag ua phoojywg, hlub lwm tus, muab siab rau ua haujlwm zoo, tsis xaiv leejtwg ntsejmuag thiab tsis zais siab” (nqe 17). Tshuav lub hauvpaus ntawm tswvyim hauv ntiajteb teb yog los ntawm sab nqaij tawv thiab los ntawm dab los (nqe 15), muaj tus mojyam yog “muaj lub siab khib, cibnyeej thiab xav ua tus hlob” (nqe 14). Lub tswvyim saum ntuj los tsom ntsees rau tus Tswv thiab tig mus rau kev ua haum Nws siab, tshuav lub tswvyim ntiajteb tsom ntsees rau tus kheej, tsuas nrhiav ua yam muaj nqis rau tus kheej xwb.
Saib los rau tus kheej thiab lwm tus ibncig hauv lub cuabyig, Pawg Ntseeg, tsev kawm ntawv, chaw ua haujlwm lubneej, peb pom meej txog kev cuamtshuam ntawm ob lub tswvyim no. Thaum ua neej nrog lub tswvyim saum ntuj los dhau ntawm kev tso tus kheej txojkev muab hlob tseg, tsom ntsees rau tus Tswv, peb tau nyob hauv lub tsamthawj sab ntsujplig thiab sib haumxeeb. Tiamsis, thaum tsuas xav txog kev zoo rau tus kheej los ntawm tej tswvyim dag ntxias, peb yuav pom muaj kev sib ntxub, kev kub ntxhov thiab muaj ntau yam phem (nqe 16).
Tus Tswv haivneeg yuav tsum nrhiav lub tswvyim saum ntuj los. Vajluskub qhia hais tias, yog leejtwg paub tias tus kheej tsis muaj tswvyim, cia li los thov tus Tswv muab pub (Yakaunpaus 1:5). Vim lub tswvyim saum ntuj yog tus Tswv pub, yog li txoj haukev pab kom txais tau lub tswvyim ntawd yog dhau ntawm kev sib raug zoo nrog tus Tswv. Yim nyob ze tus Tswv dhau ntawm kev thov Vajtswv, nyeem, kawm Vajluskub, ua raws txojcai tswj sab ntsujplig, peb yim txais tau lub tswvyim uas Vajtswv muab pub rau peb lubneej. Peb txhua tus cheemtsum Vajtswv Txojlus taw qhia, rov tig saib tus kheej kev ua neej thiab tes haujlwm tabtom qhia tshwm lub tswvyim saum ntuj lossis lub tswvyim hauv ntiajteb? Cia li vamkhom tus Tswv txoj koob hmoov ua lubneej ncaj ncees, rhuav tshem lubneej nkhab nkhaus, lubneej ob lub siab kom lub tswvyim saum ntuj tshwm muaj hauv peb txhua tus.
Thov Vajtswv,
Tus Tswv, nyuam yaus txo hwjchim tabmeeg Koj, thov Koj pub lub tswvyim saum ntuj los rau nyuam yaus, kom nyuam yaus ua neej qhia tshwm Koj lub hwjchim thiab ua neej sib hlub, sib raug zoo nrog lwm tus. Nyuam yaus tuav Yexus Khetos lub npe thov, Amees.
Peb puas tas siab nrhiav lub tswvyim ntawm tus Tswv lawm tau?
Nyeem Vajluskub hauv peb lub xyoos: II Vajntxwv 19
Kênh Youtube BHKTHN:
