Yakaunpaus 3:7-12
Nqe cim:
“…rau qhov nws lub siab xav li cas, nws lub ncauj hais li ntawd.” (Lukas 6:45b)
Lus nug rau sawvdaws xav:
– Yakaunpaus qhia txog kev tswj tibneeg tus nplaig zoo licas?
– Tej lus hais hauv nqe 11-12 qhia txog mojyam ntawm tej lus hais zoo licas?
– Yuav ua cas thiaj tswj tau tej lus hais?
Tus nplaig, lossis tibneeg tej lus hais muaj cuab kav txhim kho lossis rhuav tshem, txhawb zog lossis thawb vau, kho zoo lossis mob siab, ua rau ciaj sia lossis ua rau tuag,… yog li ntawd qhov tseemceeb yog yuav tsum paub tswj tus kheej tus nplaig. Nyob ntawm no, Yakaunpaus qhia hais tias kev tswj tus nplaig tsis yog yoojyim. Txhua yam tsiaj, tsis hais ya saum nruab ntug, nyob hauv nruab tiv txwv lossis nyob saum nruab nqhuab, txawm yog yuav qus txog qib twg los yeej raug tibneeg tswj tau, tiamsis tibneeg tswj tsis tau lawv tus nplaig (nqe 7-8). Txawm yuav kawm dhau ntau phau ntawv, siv ntau sijhawm cob qhia, los tibneeg yeej tswj tsis tau tus nplaig kom zoo. Vim qhov teebmeem tsis yog nyob ntawm tus nplaig lossis lub qhov ncauj, tiamsis yog nyob tob tob puag hauv nruab siab.
Nyob hauv ob nqe 11-12, Yakaunpaus siv daim duab hais txog lub qhov dej thiab cov txiv ntoo los hais txog mojyam ntawm qhov teebmeem no. Raws li Vajtswv tsim, tsis muaj ib zaug twg koom ib lub qhovdej yuav txhawv tau dej qab zib thiab dej iab. Kuj tsis muaj ib tsob ntoo twg yuav txi taus lwm yam txiv. Tseeb tiag tej uas tshwm sab nraud puavleej yog pib ntawm tus mojyam sab hauv tuaj. Txhais tau hais tias tej lus hais yeej qhia tshwm nplooj siab xav. Tswv Yexus qhia hais tias nplooj siab phem ces tej lus hais kuj phem (Lukas 6:45).
Yog li ntawd, qhov teebmeem tsis yog yuav ua cas thiaj tswj tau tej lus hais tiamsis yog yuav ua cas thiaj tswj tau kom peb lub siab ncaj ncees thiab ua haum tus Tswv siab. Zoo li tus tsov hloov tsis tau plaub txaij, peb tsis muaj leejtwg muaj cuab kav hloov tau tus kheej lub siab (Yelemis 13:23). Txhua yam uas tibneeg ua tsuas hloov tau sab nraud thiab hloov tsis taus mus ntev. Ua tus Tswv tsaug, txawm yog tibneeg ntsib kev tws, los tsis muaj ib yam dabtsi uas tus Tswv ua tsis tau. Tus Tswv coglus rau Nws haivneeg hais tias: “Kuv yuav muab lub siab tshiab thiab txojkev xav tshiab rau nej” (Exekees 36:26). Los ntawm tus Tswv txojkev hlub thiab lub hwjchim, thaum los ntseeg Tswv Yexus, peb tau hloov ua neeg tshiab. Tiamsis, tsis yog thaum ntseeg tus Tswv lawm ces peb tsis hais tej lus yuamkev ntxiv. Vim tseem ua neej nyob nrog sab nqaij tawv qaug zog, peb tseem pheej yuamkev. Tiamsis thaum cia tus kheej lub siab rau Vaj Ntsujplig coj kev, peb yuav tau tus Tswv lub hwjchim pauv hloov txhua hnub. Peb tej lus hais kuj yuav tau pauv hloov nyob txij ntawm tus kheej kev sib raug zoo nrog tus Tswv. Yog tsis ua li ntawd, peb “lo lus qhuas thiab lo lus tsawm foom” yeej yuav “tawm hauv tib lub qhov ncauj los” xwb (nqe 10). Thov tus Tswv pab peb niaj hnub hwm Nws kom peb tej lus hais muaj nqis thiab txhawb lwm tus lub zog.
Thov Vajtswv,
Tus Tswv, nyuam yaus zeem paub tus kheej tej kev qaug zog hauv kev tswj ncauj lus. Tseem muaj ntau zaug nyuam yaus hais tej lus ua rau lwm tus yuamkev. Thov Vaj Ntsujplig lub hwjchim ua haujlwm hauv nyuam yaus, pauv hloov nyuam yaus dua tshiab zuj zus, kom nyuam yaus tej lus hais qhia tshwm nplooj siab uas muaj koj nyob nrog nraim. Nyuam yaus tuav Yexus Khetos lub npe thov, Amees.
Tej lus uas peb hais qhia tshwm peb lub siab licas?
Nyeem Vajluskub hauv peb lub xyoos: II Vajntxwv 18
Kênh Youtube BHKTHN:
