Loos 12:1-8
Nqe cim:
“Cov kwvtij, Vajtswv hlub peb kawg nkaus li, yog li ntawd kuv thiaj ntuas nej hais tias thaum nej tseem ua neej nyob no, nej yuav tsum muab nej lub cev fij rau Vajtswv kom dawbhuv thiab haum Vajtswv siab. Yog nej ua li ntawd, thiaj yog nej pehawm Vajtswv raws li Vajtswv siab nyiam.” (Loos 12:1)
Lus nug rau sawvdaws xav:
– Timthawj Paulus nqua hu cov ntseeg Tswv Yexus fij dabtsi rau tus Tswv?
– Txojkev pehawm raws li Vajtswv nyiam qhia tshwm zoo li cas?
– Peb tau txais cov koob hmoov twg thiab tabtom siv li cas?
Vim txojkev hlub loj kawg nkaus uas Vajtswv muab pub rau peb, Timthawj Paulus ntuas cov ntseeg kom muab lub cev ua qhov khoom ciaj sia thiab dawbhuv fij haum Vajtswv siab. Peb lub cev twb raug kev txhaum kav, nimno ntawm Vajtswv xubntiag, peb twb tuag, tsis muaj kev txuas nrog Nws lawm. Tiamsis txij thaum ntseeg Tswv Yexus, peb tau lub neej tshiab, muaj Vaj Ntsujplig kav. Yog li ntawd, peb lub cev dhau los ua lub tuamtsev ciaj sia thiab dawbhuv. Qhov uas ua rau Vajtswv haum siab yog txojkev pehawm Nws, txhais tau tias ua neeg nrog Vajtswv sib raug zoo.
Kev pehawm haum Vajtswv siab cheemtsum lub neej tsis ua li neeg ntiajteb ua. Hais ua lwm seem lus, tsis ua raws li lub neej qub, lub siab nyiam ua tiamsis txojkev xav tau Vaj Ntsujplig hloov tshiab. Tus ntseeg Yexus ua lub neej nrog tus Tswv mus thiab mloog raws li Nws qhia ces yuav tau txais yam zoo thiab txaus nkaus ntawm Vajtswv. Peb yuav tsum zeem paub qhov muaj nqis hauv Yexus Khetos, tsis txhob xav dhau tej uas ua tsis tau, tiamsis muaj lub siab txo hwjchim, ua neej raws nraim li txojkev ntseeg uas Vajtswv pub rau txhua tus.
Timthawj Paulus muab tus duab hais txog txhua yam hauv lub cev qhia kom peb ntsia pom yus qhov chaw nyob hauv Vajtswv tsevneeg. Hauv lub cev muaj ntau yam sib txuas thiab txhua yam ntawd tsis koom ua ib txoj haujlwm. Raws li lub ntsiab lus no, peb nyias muaj nyias tiamsis nyob hauv Yexus Khetos lub cev. Txhua tus nyias muaj nyias ib txoj koob hmoov; ib tug cev Vajtswv lus, ib tug raug hu mus ua haujlwm, ib tug tau koob hmoov qhia, ib tug tau koob hmoov ntuas, ib tug tau koob hmoov tswj kav, ib tug tau koob hmoov pab lwm tus… Raws li txoj koob hmoov tau txais, peb txhua tus koom ua ke ua Vajtswv tes haujlwm. Yog ib tug ua tau ntau txoj haujlwm hauv Pawg Ntseeg kuj tsis txhob khav tus kheej. Nyias zeem paub nyias txoj koob hmoov Vajtswv pub rau yus thiab siv txoj koob hmoov ntawd kom muaj qabhau. Tsheej yam hauv Yexus Khetos lub cev puavleej muaj nuj nqis thiab tseemceeb kawg nkaus. Ntawm Vajtswv xubntiag, tus neeg cev Vajtswv lus, uas yog tus qhia Vajtswv Txojlus, kuj muaj nqis ib yam li tus uas tau koob hmoov mus tsob hwb, pab cov neeg txomnyem. Yog li peb yuav tsum siv ua yus tes haujlwm, saib cov kwvtij hauv tus Tswv muaj nqis thiab sib pab kom sawvdaws ua tau tus ntseeg raws li Vajtswv siab nyiam.
Thov Vajtswv,
Tus Tswv, nyuam yaus ua Koj tsaug rau qhov uas Koj pub muaj lub neej tshiab, lub cev ciaj sia thiab dawbhuv. Ua Koj tsaug qhov uas Koj pub rau nyuam yaus tau tej koob hmoov thiab sijhawm ua Koj tes haujlwm. Thov Koj pab kom nyuam yaus txo hwjchim, kub siab lug pehawm txhua hnub haum Vajtswv Koj siab. Nyuam yaus tuav Tswv Yexus lub npe thov, Amees.
Peb tabtom fij rau Vajtswv cov khoom ciaj sia thiab dawbhuv, los yog cov khoom tuag thiab qias?
Nyeem Vajluskub hauv peb lub xyoo: I Vajntxwv 6
Kênh Youtube BHKTHN:
