Mathiơ 18:15-20
“Inh khan dơ̆ng thoi âu, dah ‘bar ‘nu bre bu oei tơ teh âu pôm đon dih băl krao khan wă apinh Sư tơdrong kiơ, ‘Bă bơ̆n mă oei tơ plĕnh ti Sư gô asong tơdrong bre bu mă apinh noh tơpă.” (Mathiơ 18:19)
Nơ̆r jet tơchĕng pơwao:
– Bơngai lui đei hiơ̆k dih băl thoi yơ lăm khul triu Kră Yang?
– Pơm thoi yơ bơngai lui gơh bơwei pôm đon dih băl?
- Tơdrong bơ̆n krao khan hơdai kăl kơ đei tơdrong gĭt kăl kiơ wă kơ Kră Yang tơl tơwih tơdrong bơ̆n krao khan?
Kră Yang Yêsu oei pơma gah khul triu oei tôm păng Sư ưh kơ wă minh pôm triu hiong đơ̆ng khul ôh (Mathiơ 18:12-14). Pơtrơp lăm chăl trong ‘nâu, Kră Yang bơtho tơ’bôh ăn dôm tơdrong kăl kơ pơm wă bơwei tơdrong pôm đon lăm khul bơngai lui. Tơdrong kơnhăm Kră Yang wă kơ bơ̆n arih đei hiơ̆k dih băl wă kơ huay kơ tơ hiong triu đơ̆ng lăm khul triu Sư. Khul noh jơ̆ hnam dơnŏ, khul tŏ sĕt bơngai, khul tơdrong jang, khul bơngai lui. Mălei, lăm tơdrong akŭm hơdai, bơ̆jang hơdai hăm khul bơngai lui bơ̆n, yua kơ bơ̆n bơngai yoch, ưh kơ weh ôh đei tơdrong ưh kơ ‘lơ̆ng pơm băl ưh kơ hiôk. Tơdrong răm noh ưh kơsĭ jing tơklah dih băl, ưh pă pôm đon dih băl đĕch ôh, mălei kư̆m pơgăn bơ̆n tơ’bưh hăm Kră Yang hay mơ̆n (Markôs 11:25). Wă kơ bơwei tơdrong pôm đon dih băl bơ̆n kăl kơ weh đơ̆ng tơdrong pơm pơ glăi đe, athei pơyom kơ đe, păng huay kơ jô̆ yo dih băl (trong 15-20). Lăng hơlen nơ̆r Kră Yang ‘nâu, mă đơ̆ng bơ̆n huay kơ đei pơm glăi kiơ ră, mălei bơ̆n athei adrin pơm hiôk dih băl! Lăm năr tơ’bơ̆p pơma dơnuh, kăl kơ pơ’lơ̆ng kơ bơngai mă pơm yoch, thoi noh Kră Yang pơkă khan: “Ih hăm kơdrô̆ sư đĕch”. Mưh khan kơ bơngai mă pơm yoch noh ưh kơ chu, lei athei krao thim ‘bar pêng ‘nu bơngai wang kiơ̆ mơ̆ng. Thoi noh, kơnhăm tuch luch noh Kră Yang wă kơ bơ̆n oei hiôk dih băl.” Ưh kơ trŏ wă pơgŏ đe athei năm pơtruh kơ bơ̆n ‘mơ̆i wă pơdah tơdrong pơma băl. Tơm tơdrong pôm đon dih băl noh jơ̆ ‘bar ‘nu krao khan hơdai (trong 19). Mưh tơdrong tơ’bưh ‘bar ‘nu pôm đon dih băl bơih lei nơ̆r krao khan bre sư gô đei. “‘Bă bơ̆n tơ plĕnh ti gô asong bre sư apinh noh tơpă.” Păng Sư gô oei hơdai bre sư.
Tơdrong minh jơhngơ̆m đon lăm khul triu Kră Yang jơ̆ tơdrong kăl dêh wă kơ bơ̆n krao khan păng tơdrong bơ̆n kơkuh kơ Kră Yang Sư iŏk lăp đon. Lăm ‘bai krao khan hơdai (Mathiơ 6:9-13). Kră Yang kư̆m bơtho bơ̆n krao khan lăm tơdrong pơgơ̆p băl minh jơhngơ̆m đon noh jơ̆ ưh kơ jô̆ yo kơ đe pơm yoch păng bơ̆n na Kră Yang kư̆m huay kơ jô̆ yo tơdrong yoch bơ̆n. “Apinh Ih ‘nĕ jô̆ yo kơ nhôn, thoi nhôn ưh kơ jô̆ yo kơ đe pơm yoch păng nhôn.” (Mathiơ 6:12). Tơdrong krao khan hơdai wă kơ Kră Yang mơ̆ng noh jơ̆ hiôk hơiă dih băl, pôm jơhngơ̆m đon, ưh kơ trŏ kơ tơdrong krao khan gơh, krao khan đunh, dah krao khan hơlơ̆k hơle hăm nơ̆r pơma ưh kơ yua. Thoi noh, apinh Kră Yang ăn kơ bơ̆n arih ‘lơ̆ng, jô̆ kơ đe bơngai ‘lơ̆ng hloh kơ bơ̆n păng ling lang ‘nĕ kơ jô̆ yo dih băl wă kơ Kră Yang oei hơdai păng mơ̆ng nơ̆r lu bơ̆n krao khan.
Tơdrong krao khan lăm hnam dơnŏ, khul tŏ sĕt bơngai đei Kră Yang mơ̆ng păng tơl tơwih ưh? Yua kơ kiơ?
Ơ ‘Bă lu nhôn mă oei tơ plĕnh ti! Apinh Ih ăn kơ inh ling lang chă tơdrong hiôk hơiă dih băl hăm ‘nhŏng mai oh, đei jơhngơ̆m huay kơ jô̆ yo dih băl, pơyom dih băl wă kơ nơ̆r lu bơ̆n krao khan ling lang đei Kră Yang mơ̆ng păng tơl tơwih. Krao khan hăm anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 4.
Kênh Youtube BHKTHN:
