Luka 2:13-14
Trong tơm: “Ư-ang kơ ‘Bok Kei-Dei mă oei tơ plĕnh ti. Sư wă ăn hiôk-hian kơ lu bơngai mă Sư lăp đon tơ ala teh âu.” (Luka 2:14)
Nơ̆r jet tơchĕng pơwao:
– Lăm măng Kră Yang Yêsu jur jing bơngai, đei tơdrong hlĭch kiơ truh bơih?
– Yua kơ kiơ tơdrong Kră Yang Yêsu jur jing bơngai ba ăn hiôn hian tơ ala teh âu?
– Bơ̆n kăl kơ pơm thoi yơ kơplah pơhrăm iŏk tơdrong sĭt ‘nâu?
Anih tơpŭ kơ nge Yêsu bơ̆n lăng ưh kơ đei kiơ hlĭch yua kơ thoi hmă đĕch ưh kơ đei mah dêh. Yă Mari “sư tơpŭ kơ minh ‘nu Kon kơdră sư. Sư tơsu kơ Kon sư minh blah khăn, klaih kơ noh tơ’bĭch kơpal ‘nhĕt kro tơ lăm war rơmo yua sư ưh kơ đei anih bơih lăm hnam ‘bĭch tơmoi” (Luka 2:7). Tơ’ngla hnam păng lu bơngai tơmoi năr noh ưh kơ đei bu băt Kon nge mă tơsu minh blah khăn tơ’bĭch kơpal ‘nhĕt kro noh jơ̆ kon nge hlĭch ưh kơ hmă đĕch ôh. Sư bơih Kon Pôm ‘Bok Kei-Dei, Yang Kon jur tơ ala teh âu. Thoi noh, minh ‘nu kon nge drŏnglo bơ̆n lăng thoi hmă đĕch jing tơdrong hlĭch chrơp pơtơm tơ’bôh ăn. ‘Bôh blư bla linh jang ‘lơ̆ng lơ tơpă dơ̆ng hơdai tơ kơpal plĕnh, lu sư hơri bơnê kơ ‘Bok Kei-Dei păng roi tơdrong gah Kon nge noh thoi âu: “Ư-ang kơ ‘Bok Kei-Dei mă oei tơ plĕnh ti. Sư wă ăn hiôk hian kơ lu bơngai mă Sư lăp đon tơ ala teh âu.” (trong 14).
Kră Yang Yêsu jur jing bơngai wă ba ăn hiôk hian tơ ala teh âu. Tơdrong hiôk hian Kră Yang Yêsu ba ăn ưh kơ trŏ kơ hiôk hơiă tơduă kon bơngai đĕch ôh. Mă-lei noh ăn kơ kon bơngai gơh oei hiôk ham ‘Bok Kei-Dei, sơlam teh đak hăm pơlei ‘lơ̆ng. Hla bơar nơ̆r ‘Bok Kei-Dei khan đĭ-đăng bơngai weh ataih đơ̆ng ‘Bok Kei-Dei kiơ̆ tơdrong yoch ngăl (Rôm 3:23). Păng kuă kơ lui kơ ‘Bok Kei-Dei (Rôm 5:10).
Yua kơ tơdrong yoch bơ̆n, đĭ-đăng bơngai gô pŭ iŏk tơdrong hil mĭl đơ̆ng Kră Yang wă phak ling lang lăm dơnâu ŭnh. Yua kơ ‘mêm mơnat kơ kon bơngai, Kră Yang Yêsu jur jing bơngai, oei lăm teh đak âu sơ̆ Sư ưh kơ đei pơm yoch, đơ̆ng noh Sư chu lôch tơ ‘long pơglang tang tơdrong yoch kon bơngai bơ̆n. Sư jing tơmam soi ‘lơ̆ng rơgoh, huay iŏk tơdrong yoch bơ̆n minh ‘măng tôm bơih. Đơ̆ng noh, dah bơngai bu lui sơng iŏk Kră Yang Yêsu, bơngai noh gô đei hiôk hơđơ̆ng tơpă: Păng mưh bơ̆n oei hiôk hăm ‘Bok Kei-Dei bơih, lei bơ̆n gơh oei hiôk hơiă dih băl.
Gơh hiôk hăm ‘Bok Kei-Dei noh jơ̆ đơ̆ng tơdrong jang Kră Yang Yêsu, tơdrong mơnat ăn đĕch đơ̆ng ‘Bok Kei-Dei ưh kơ trŏ đơ̆ng kon bơngai bơ̆n adrin na đei ôh. Bơ̆n băt tơpă bơ̆n đei tơdrong hiôk hian noh đơ̆ng yơ lei bơ̆n athei arih “Ư-ang kơ ‘Bok Kei-Dei mă oei tơ plĕnh ti” wă kơ lu bơ̆n ưh kơ đei minh ‘nu bu mă đei iŏk tơdrong hiôk hian tơpă bơih mă-lei oei arih kiơ̆ kơdih đĕch. Kăl hloh lăm tơdrong arih bơ̆n noh ưh pă tơchĕng gah bơ̆n kơdih mă-lei athei tơchĕng kơ Kră Yang păng tơdrong ‘lơ̆ng rŏ Sư, ưh kơ trŏ kơ lăm bơyan ‘blŏk kơ Kră Yang jur jing bơngai đĕch ôh mă-lei đĭ chăl arih hloi.
Lăm bơyan ‘blŏk kơ Kră Yang jur jing bơngai sơnăm ‘nâu, bơngai bu mă oei kăl kơ đei gơh oei hiôk hăm Kră Yang păng bơ̆n gô pơm kiơ wă tơgŭm lu sư?
Ơ Kră Yang, inh bơnê kơkuh ư-ang kơ Kră Yang Yêsu, Sư bơih ‘Bok mă jur jing bơngai wă ba ăn hiôk hian kơ chăl arih inh păng đĭ-đăng kon bơngai. Apinh tuh ăn lăm jơhngơ̆m ‘bĕnh tơdrong băt bơnê wă kơ arih ư-ang anăn Sư. Apinh Ih yua inh thoi tơmam Ih wă tơgŭm lu bơngai mă oei ưh kơ hiôk, tôch đon pă đei hơmĕng wă kơ lu sư gơh oei hiôk hăm Ih. Krao khan hăm anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 24
Kênh Youtube BHKTHN:
