Mathais 18:1-4
Nqe cim:
“…Nej cov yog leejtwg xav ua tus hlob, tus ntawd yuav tsum ua sawvdaws tus tubtxib, thiab nej cov yog leejtwg xav ua tus thawj, tus ntawd yuav tsum ua sawvdaws qhev.” (Malakaus 10:43-44)
Lus nug rau sawvdaws xav:
– Vim licas cov thwjtim nug tus Tswv hais tias leejtwg yog tus loj dua ntais saum ntuj Ceeb Tsheej?
– Tus Tswv teb cov thwjtim licas?
– Yuav ua licas peb thiaj ua tau haujlwm zoo li ib tug tubqhe?
Thaum mus txog lub nroog Kapena-us cov thwjtim nug tus Tswv hais tias, “Leejtwg yog tus loj dua ntais saum ntuj Ceeb Tsheej?” Muab tim rau Lukas 9:46 thiab Malakaus 9:34, peb paub hais tias lawv tau sibcav txog qhov teebmeem no, yog li ntawd lawv thiaj nug tus Tswv saib Nws yuav teb licas. Vim licas cov thwjtim xav paub leejtwg yog tus loj dua ntais? Vim thaum Tswv Yexus hais ua ntej txog Nws kev txomnyem thiab kev sawv rov los, ua rau lawv tsis totaub, vim li ntawd lawv thiaj xav txog ib qhov chaw rau yus tus kheej thaum tus Tswv tsim tsa lub tebchaws hauv ntiajteb no, thiab leejtwg los yeej xav kom tus kheej tau ua tus loj dua ntais.
Tswv Yexus hu ib tug menyuam yaus los sawv ntawm lawv xubntiag ua yamntxwv thiab Nws hais kom lawv yuav tsum “hloov… lub siab” kom zoo li tus menyuam yaus no, txhais hais tias yuav tsum cia tus Tswv hloov lawv tus cwjpwm thiab kev ntshaw thaum nrog tus Tswv mus. Tej yam tshwjxeeb ntawm cov menyuam yaus yog siab dawb siab zoo, cheemtsum kev pab, ntseeg siab, txo hwjchim, tsis muaj siab ntshaw… Tus Tswv hais tseeb meej rau cov thwjtim hais tias yog leejtwg txo hwjchim li tus menyuam yaus no, tus ntawd yuav tau ua tus loj dua ntais saum ntuj Ceeb Tsheej. Nws kuj ceebtoom hais tias yog lawv tsis ua neej thiab ua haujlwm zoo li cov menyuam yaus, ces lawv yuav tsis tau mus nyob saum ntuj Ceeb Tsheej. Tswv Yexus xav qhia txog qhov txhaum ntawm cov thwjtim thaum lawv tsis ua haujlwm zoo li ib tug tubqhe li Tswv Yexus (Malakaus 10:45) tiamsis ho xam ub xam no zoo li neeg ntiajteb, ntshaw tau hwjchim meejmom, txog qib uas sib txeeb, sib cav kom muaj yeej swb. Lawv tsis ua txhawb nqa tus Tswv, tiamsis txhawb nqa tus kheej, thaum kawg thiaj ua rau lawv sib cav sib ceg, sib faib pab pawg thiab ua rau lwm tus raug kev mob siab.
Niaj hnub nimno, yoojyim ua rau peb tabtom nrog tus Tswv mus tiamsis tseem xam rau ub rau no, sib txeeb meejmom, peb tsuas xav ua “tus loj” hauv nyias Pawg Ntseeg. Vajtswv Txojlus qhuab ntuas peb hais tias, tibneeg ntshaw muaj qib muaj quas, tiamsis tej qib quas ntawd tsis muaj nqis hauv Tswv Yexus. Tus uas ntshaw lub meejmom hauv Pawg Ntseeg yuav ua neej khav theeb, qia dub thiab tsuas ntshaw khoom qhov muag pom, nws tsuas koom nrog cov uas muaj nqis rau nws. Peb txhua tus cheemtsum ntsib tus Tswv thiab cia Nws yug dua tshiab, hloov tus cwjpwm dua tshiab. Peb yuav tsum zeem paub hais tias yus tus kheej qaug zog, muaj kev txhaum, me, qis thiab tsimnyog raug txim mus ibtxhis. Thaum zeem paub li ntawd peb thiaj yim paub nco tus Tswv txiajntsig thiab ua neej txo hwjchim nrog cov neeg nyob ibncig, peb thiaj yuav txo tau hwjchim ua haujlwm pab lwm tus zoo li ib tug tubqhe li Tswv Yexus. Tsuas yog thaum peb ua haujlwm zoo li ib tug tubqhe nyob hauv ntiajteb no, peb thiaj yog tus “loj dua ntais saum ntuj Ceeb Tsheej”.
Thov Vajtswv,
Tswv Yexus, thov pab nyuam yaus ntsia pom Koj tus qauv ua haujlwm los ntawm kev txo hwjchim pab lwm tus, kom nyuam yaus ua tau ib tug neeg txawj txo hwjchim, ua haujlwm zoo li ib tug tubqhe pab cov neeg uas Koj cia nyob ibncig ntawm nyuam yaus. Thov pab nyuam yaus saib ntsoov tej nqi zog saum ntuj tsis yog nrhiav tshuav tej nqi zog nyob hauv ntiajteb no. Nyuam yaus tuav Yexus Khetos lub npe thov, Amees.
Peb xav ua tus loj hauv ntiajteb lossis ua tus loj saum ntuj Ceeb Tsheej?
Nyeem Vajluskub hauv peb lub xyoos: Yauhas 1
Kênh Youtube BHKTHN:
