Klei Aê Diê Blŭ: Klei Mtô Mñă Klei Bhiăn 29:9-15
Êlan kliăng: Snăn răng bĕ brei ngă klei blŭ hlăm klei bi mguôp anei, čiăng kơ diih dưi čăt đĭ hlăm jih bruă diih ngă. (Klei Mtô Mñă Klei Bhiăn 29:9)
Klei êmuh ksiêm mĭn: Ya ngă Y-Môis mñă nanao leh anăn iêô mthưr phung ƀuôn sang Israel djă pioh klei bi mguôp hŏng Khua Yang? Ya ngă klei bi mguôp mơ̆ng Khua Yang hŏng phung ƀuôn sang Ñu mâo ênoh yuôm lă lar? Hruê anei si drei leh anăn anak čô djă pioh klei bi mguôp hŏng Aê Diê?
Wăt tơdah Y-Môis dưi mđĭ ai kyua klei prŏng prĭn Aê Diê ngă hlăm wưng leh êgao kơ djuê ana Israel, ƀiădah amâo djŏ kyua snăn ôh ñu jing mnuih knŏng dlăng kơ klei leh êgao, amâo mđing kơ boh sĭt. Mklăk wĭt, ñu thâo săng kơ ênuk mrâo phung ƀuôn sang Israel brei tuôm hŏng boh klei mrâo leh anăn klei lông dlăng mrâo dôk guôn diñu phă anăp. Hŏng bruă ngă khua gĭt gai hlăm klei hdĭp mngăt, ñu thâo knŏng tơdah ênuk mrâo mơ̆ng phung ƀuôn sang Israel hrăm mbĭt bi mklă klei kuôl kă mrâo hŏng Aê Diê, hdĭp kjăp hĭn hlăm bruă djă pioh klei bi mguôp hŏng Aê Diê hlăm krĭng lăn mdrŏng sah ăt bŏ hŏng klei mplư, snăn kơh diñu dưi mâo klei Aê Diê hơêč hmưi hlăm klei hdĭp. Anăn jing mta phŭn hlăm jih hdruôm hră Klei Mtô Mñă Klei Bhiăn, jih tal anei truh tal mkăn, ñu iêô mthưr ênuk mrâo phung ƀuôn sang Israel brei djă pioh klei bi mguôp mrâo mơ̆ng Aê Diê.
Hlăm trăn anei ñu ăt iêô mthưr phung khua gĭt gai ăt msĕ mơh phung ƀuôn sang, wăt phung ƀuôn sang tue, brei mŭt hlăm klei bi mguôp mrâo hŏng Aê Diê čiăng Ñu bi mklă diñu jing phung ƀuôn sang jing dŏ Aê Diê. Klei bi mguôp Aê Diê mkŏ mjing hŏng phung ƀuôn sang Israel jing klei bi mguôp amâo mâo wưng kčah, mphŭn mơ̆ng phung aê diñu jing Y-Abraham, Y-Isăk, Y-Yakôp, leh anăn dưi lŏ čuê hlăm dŭm blư̆ lŏ bi mklă mdê mdê hŏng grăp ênuk mdê mdê hlăm phung ƀuôn sang Israel. Klei bi mguôp anei ăt srăng lŏ čuê kơ ênuk mrâo kkiêng leh anăn hriê kơ prŏng hlăm krĭng Lăn Aê Diê Ƀuăn. Anăn jing diñu jih ai tiê, jih mngăt, jih ai ktang huĭ mpŭ kơ Yêhôwa Aê Diê (Klei Mtô Mñă Klei Bhiăn 6:4-5). Dưi lač, kliăng čiăng kơ phung ƀuôn sang Israel mâo sa klei hdĭp jăk mơak êđăp ênang, wăt hlăm kdrăn tač amâodah hlăm krĭng lăn bŏ hŏng êa ksâo leh anăn êa hnuê, anăn jing gưt kơ klei bi mguôp lă lar hŏng Aê Diê.
Djăp mta mnơ̆ng hlăm lăn ala anei mâo wưng ba yua sơăi, ƀiădah klei bi mguôp plah wah Aê Diê leh anăn phung ƀuôn sang Ñu mâo ênoh yuôm lă lar, kyua Aê Diê jing Pô amâo tŭ klei kčah kơ hruê mmông. Khua Yang Yêsu mtô hlăm Y-Mathiơ 6:33, êlâo hĭn brei duah ƀuôn ala mtao Aê Diê leh anăn klei kpă ênô Ñu, leh anăn Ñu srăng brei thiăm djăp mta klei mkăn.
Tơdah drei kjăp ai tiê djă pioh klei bhiăn Aê Diê snăn dŭm klei Ñu ƀuăn hlăm Klei Aê Diê Blŭ ăt srăng dưi rơ̆ng kơ drei găn dŭm ênuk. Kyua anăn, grăp čô drei brei mñă nanao kơ klei bi mguôp lă lar mơ̆ng Aê Diê hŏng anak čô, mbĭt anăn mtô mtă, ktrâo lač kơ anak čô drei lŏ čuê djă pioh klei bi mguôp anăn, anăn jing klei tŭ jing hlăm klei hdĭp.
Drei jih ai tiê đru ênuk êdei hlăm gŏ sang pô lŏ čuê djă pioh klei bi mguôp lă lar hŏng Aê Diê mơ̆?
Wah lač: Ơ Aê Diê, jing Pô kâo kkuh mpŭ lă lar. Akâo kơ Ih mtô kâo amâo djŏ knŏng jih ai tiê djă pioh klei bi mguôp hŏng Ih ôh ƀiădah ăt hdơr bruă klam mtô kơ lŏ čuê hlăm hlăm gŏ sang kâo lŏ dơ̆ng djă pioh klei bi mguôp hŏng Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
