Klei Aê Diê Blŭ: Y‑Nêhêmi 4:6, 15‑23
Êlan kliăng: “Snăn hmei mdơ̆ng mnư̆; leh anăn jih mnư̆ bi lir mbĭt truh kơ mkrah boh dlông gơ̆. Kyuadah phung ƀuôn sang mâo klei mĭn čiăng mă bruă hŏng jih ai tiê” (Y‑Nêhêmi 4:6)
Klei êmuh ksiêm mĭn: Ti djiêô klei wah lač, ya klei Y‑Nêhêmi lŏ ngă? Ya êlan hdră klei hdĭp myang yuôm pioh mă yua kơ klei hdĭp drei pô?
Klei đăo jao jih, mtrŭt Y‑Nêhêmi tuh êyuh ai tiê akâo kwưh kơ Khua Yang, leh anăn ăt klei đăo anăn mơh đru leh ñu mbĭt hŏng phung ƀuôn sang Aê Diê kgŭ dơ̆ng leh klei wah lač, ăt jhŏng lŏ ngă bruă Aê Diê jao. Klei anei brei ƀuh wah lač jing êlâo hĭn ƀiădah wăt bruă ngă hŏng klei đăo tui tluôn. Khua Yang ngă bruă hŏng klei phung đăo kơ Ñu wah lač leh anăn ngă bruă. Y‑Nêhêmi dưm kluôm dhuôm klei đăo ñu kơ Aê Diê Pô ktang myang, mbĭt anăn ñu ăt kgŭ dơ̆ng ngă bruă hŏng klei ktang myang anăn mơh (êlan 20). Ñu ngă bruă hŏng jih ai tiê, ƀiădah ăt thâo nanao Khua Yang yơh jing klei ktang diñu, leh anăn klei dưi hĭn hriê mơ̆ng Aê Diê. Drei wah lač êlâo hĭnƀiădah ăt brei gĭr ktưn ngă bruă tui si klei thâo mĭn Aê Diê brei. Klei čhuai amâo djŏ ôh kyua wah lač mđrĭng hŏng ngă bruă êjai, ƀiădah čhuai kyua uêñ lu đei kơ ngă bruă ƀiădah pioh ƀiă đei mmông wah lač.
Drei ăt thâo kral mơh êngao kơ klei bi kdơ̆ng kyua klei ngă soh, jih jang klei bi kdơ̆ng mkăn amâo jing phŭn knhal kơ drei phưi lui bruă ngă ôh. Y‑Nêhêmi amâo tuôm mdei bruă mdơ̆ng mnư̆ ƀuôn čiăng ngă wĭt kơ phung bi kdơ̆ng ôh. Hŏng klei anăn, ñu thâo săng leh anăn thâo kral Khua Yang hĭn: Khua Yang giăm ñu hĭn, ñu thâo kral klă hĭn Khua Yang jing Pô hmư̆ nanao klei wah lač (êlan 4, 9); Khua Yang jing Pô kpă ênô, bi kmhal phung jhat ƀai (êlan 4); jing Aê Diê ktang myang, Pô prŏng hĭn (êlan 14); Ñu dôk kiă kriê, “kơ̆ng hĕ hdră diñu” (êlan 15); leh anăn “Aê Diê drei srăng bi blah brei kơ drei” (êlan 20).
Phung roh knŏng čiăng kơ drei đuĕ hĕ mơ̆ng anôk drei dôk dơ̆ng leh anăn kwưh akâo kơ Khua Yang; kyuanăn, ktang tuôm hŏng klei dleh dlan, Phung Sang Aê Diê ktang hĭn brei bi mguôp sa ai hlăm klei wah lač leh anăn mă bruă kơ Aê Diê. Đăm mĭn ôh tơdah kdŭn tluôn klei dleh dlan srăng luč. Tơdah drei thâo săng snei, klei lông dlăng, klei bi kdơ̆ng Aê Diê brei klei dưi truh êjai drei dôk mă bruă kơ Ñu, jing čiăng đru drei đĭ hriê kơ prŏng khue hĭn, thâo kral Khua Yang klă hĭn, ktang kjăp hĭn, snăn klei čuăn kdŭn tluôn jing sa klei dluh lĕ. Năng ai drei mdei mă bruă kơ Aê Diê čiăng pioh mmông bi blah hlăm klei wah lač, amâodah čiăng čhuang mŭt hlăm sa klei iêô mthưr mrâo… ƀiădah đăm phưi lui ôh kyua klei dleh dlan, klei bi kdơ̆ng.
Pô čih mkra hră Gregory Brown čih leh snei: “Djŏ leh, Y‑Nêhêmi leh anăn phung ƀuôn sang Israel dưi phưi lui êjai phung roh diñu dôk ăl ngêñ, čang hmăng tlaih diñu ksŭng blah. Ƀiădah, phưi lui amâo đru diñu hơĭt ênang hĭn ôh. Mnuih amâo mâo sĭt suôr jing mnuih tuôm hŏng klei huĭ hyưt hĭn. Klei Satan hmăng hmưi jing tlĕ, bi mdjiê, leh anăn bi rai (Y‑Yôhan 10:10). Anôk hơĭt ênang hĭn jing dôk nanao hlăm klei Aê Diê čiăng”.
Si ngă drei kgŭ dơ̆ng ngă bruă mơ̆ leh grăp blư̆ wah lač?
Wah lač: Ơ Khua Yang, bi mni lač jăk kơ Khua Yang, kyuadah Ih dôk giăm kâo, dôk hŏng kâo nanao, jing Pô kiă kriê ktang myang leh anăn jăk. Akâo Khua Yang brei kơ kâo klei atăt gai, klei thâo mĭn, leh anăn wăt ai tiê jhŏng, čiăng kơ kâo gưt asăp Ih nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
