II Xwmtxheej Vajntxwv 22:1-9
Nqe cim zaj kawm:
“Nej tsis txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tau sau raws li tej uas nyias tseb” (Kalatias 6:7).
Lus nug rau sawvdaws xav:
– Vim li cas vajntxwv Ahaxiyas mus raws li Vajntxwv Ahaj tsev neeg txoj kev ua phem?
– Nws tau txais nuj nqis dabtsi?
– Zaj kawm no ceebtoom koj yam dabtsi hauv kev ua neej?
Ahaxiyas ua vajntxwv kav tebchaws Yudas thaum nws hnub nyoog muaj 22 xyoos, nws kav tebchaws Yudas tau ib lub xyoos. Ahaxiyas yog vajntxwv Yehaulas tus tub ntxawg thiab nws niam yog Athaliyas uas yog vajntxwv Ahaj thiab Yexenpees tus ntxhais. “Ahaxiyas coj raws nraim li vajntxwv Ahaj tsevneeg tus yamntxwv rau qhov nws niam Athaliyas yog Ahaj tus ntxhais thiab yog vajntxwv Aumelis uas kav tebchaws Yixalayees tus xeebntxwv. Nws niam yog tus cob nws ua txhaum ntag” (nqe 3).
Vim mloog ua raws leej niam txoj kev ua phem, “Ahaxiyas ua txhaum rau tus TSWV, rau qhov nws muab vajntxwv Ahaj tsevneeg ua nws cov tuavxam xwb, lawv thiaj coj nws mus ua txhaum”. Tom qab uas nws txiv Yehaulas tuag lawm, Ahaxiyas thiaj li raug Ahaj cov tuavxam nrhiav kev phem cuab Ahaxiyas poob mus rau txoj kev ploj kev tuag. Vim yog ua raws li Ahaj cov tuavxam qhia vajntxwv Ahaxiyas thiaj koom tes nrog vajntxwv Yaulas uas kav tebchaws Yixalayees mus ua rog rau vajntxwv Haxayees uas kav tebchaws Xilias ntawm Lamaus hauv cheebtsam Nkile-as thiaj ua rau Yaulas raug mob thiab los kho mob hauv lub nroog Yexelees. Tom qab uas rov los tsev lawm, ces tus Tswv ua rau Ahaxiyas rov mus xyuas vajntxwv Yaulas hauv lub nroog Yexelees. Vajntxwv Ahaxiyas thiaj raug tus thawj tub rog Yehus uas yog Vajtswv xaiv los rau txim rau Ahaj tsev neeg muab Ahaxiyas tua pov tseg.
Ahaxiyas raug tua tuag li ntawd twb yog vim nws nyiam xyaum ua raws li tsev neeg thiab tej neeg ib ncig kev ua phem thiaj raug Vajtswv rau txim tuag. Vajntxwv Yehausafas “tus uas hwm Vajtswv kawg siab kawg ntsws”, uas yog Ahaxiyas yawg kuj tau yuam kev mus yuav Ahaj tus ntxhais Athaliyas los ua nyab nyob rau hauv nws lub tsev neeg. Nuj nqis uas vajntxwv Yehausafas raug ris yog nws tus tub “Yehaulas ua phem ua qias ib yam li vajntxwv Ahaj” (II Xwmtxheej Vajntxwv 21:6), Yehaulas tau ua ntau yam kev phem thiab tua nws cov kwv uas koom niam koom txiv tuag tas huv tibsi, nws kuj raug Vajtswv rau txim tuag txomnyem heev (II Xwmtxheej Vajntxwv 21:19). Vajntxwv Yehausafas tus xeeb ntxwv Ahaxiyas kuj kis raug tej kev phem ntawm nws niam Athaliyas los ua ntau yam kev phem nws thiaj raug tua tuag ua rau “Ahaxiyas tsevneeg tsis tshuav ib tug ua vajntxwv kav tebchaws li lawm” (nqe 9).
Tus Tswv Txojlus qhia tias: “Nej tsis txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tau sau raws li tej uas nyias tseb” (Kalatias 6:7). Txawm yog yuam kev ua txhaum ntau tsawg hauv niaj hnub nimno los yuav raug them tus nqis siab rau yav tom ntej. Ua lub neej koom siab nrog lub ntiajteb thiab kev txhaum nyob rau niaj hnub nimno ces yus lub neej yuav raug kev puas tsuaj thiab tseem yuav kis mus raug yus tej xeebntxwv ntau tiam tom qab ntxiv. Zaj kawm hnub no ceebtoon peb txhua tus yuavtsum tas siab xyaum ua raws tus Tswv txoj kevcai qhia thiab mloog ua raws li Nws siab nyiam xwb. Ua txhua tes haujlwm zoo thiab xyaum raws cov neeg uas muab siab rau Ntseeg tus qauv zoo peb thiaj yuav tau sau tej yam zoo rau peb tus kheej, rau peb tsev neeg thiab peb tej xeebleej, xeebntxwv mus ntev loo hauv ntau tiam neeg. Yog xav tau li ntawd, peb yuavtsum pheej nco ntsoov nyeem, kawm Vajtswv Txojlus los qhia peb ua neej txhua hnub kom peb tsis ua txhaum rau tus Tswv.
Thov Vajtswv
Vajtswv, thov Koj Txojlus ci rau nyuam yaus pom kev thiab coj nyuam yaus taug tus Tswv Koj txoj kev. Thov pab Kom nyuam yaus paub mloog Koj lus kom tsis ntsib txoj kev puastsuaj tuaj raug rau nyuamm yaus thiab nyuam yaus tsev neeg, tiamsis kom tau txais koob hmoov txhua hnub uas Koj pub. Nyuam yaus tuav Tswv Yexus Khetos lub npe thov, Amees.
Peb tabtom xyaum li tibneeg ntiajteb ua lossis xyaum ua raws tus Tswv siab nyiam?
Nyeem Vajluskub hauv peb xyoos: 1 Kauleethaus 12:1-13:13
Kênh Youtube BHKTHN:
