Klei Aê Diê Blŭ: II Klei Yăl Dliê 22:1-9
Êlan kliăng: “Đăm brei arăng mplư diih ôh; arăng amâo dưi mưč kơ Aê Diê ôh. Kyuadah ya mjeh arăng rah, ñu srăng wiă boh anăn mơh.” (Galati 6:7)
Klei êmuh ksiêm mĭn: Si ngă mtao Y‑Ahasia êbat tui êlan jhat ƀai sang Y‑Ahap? Ya boh jhat jing? Ya mta klei hriăm êrâo bi mdih ih hlăm klei hdĭp?
Mtao Y‑Ahasia čar Yuđa đĭ jing mtao hlăk mâo dua pluh dua thŭn leh anăn kiă kriê čar knŏng sa thŭn. Ñu jing anak kluč mtao Y‑Jôram. Amĭ mtao jing H’Athali, anak mtao Y‑Ahap leh anăn H’Jêsêbel hing ang jhat ƀai snăk. Mtao Y‑Ahasia “msĕ mơh êbat tui êlan sang Y‑Ahap” msĕ si mtao ama ñu kyuadah “amĭ ñu jing pô kčĕ brei ngă klei ƀai” (êlan 3).
Kyuadah gưt hlue mnêč jhat ƀai amĭ ñu, kyuanăn mtao “ngă klei jhat ti anăp Yêhôwa, msĕ si sang Y‑Ahap ngă leh”. Kjham hĭn mơh, leh djiê ama ñu, phung sang Y‑Ahap jing phung kčĕ kơ mtao Y‑Ahasia, ngă kơ ñu truh kơ klei ram rai. Kyuadah gưt klei diñu kčĕ snăn mtao ngă klei bi mguôp hŏng amiêt ñu pô jing Y‑Jôram mtao Israel, ba kahan nao ti ti ƀuôn Ramôt – Galaat čiăng bi blah hŏng mtao Siri. Hlăm klei bi blah anăn, mtao Y‑Jôram mâo klei êka. Leh lŏ wĭt, Khua Yang cuăn leh mtao Y‑Ahasia nao čuă dlăng mtao Y‑Jôram dôk mdrao klei êka hlăm ƀuôn Jesrêel. Tinei, mtao Y‑Ahasia tuôm hŏng Y‑Jêhu mă bi mdjiê, êjai ñu dôk bi truh klei phat kđi kơ sang Y‑Ahap.
Mtao Y‑Ahasia mâo boh tuč ruê̆ msĕ snăn kyuadah tŭ klei bi hmăi mơ̆ng gŏ sang leh anăn phung riêng gah ñu, kyuanăn tŭ klei Khua Yang phat kđi. Mtao Y‑Jôsaphat, “sa čô tui duah Yêhôwa hŏng jih ai tiê”, jing aê mtao Y‑Ahasia, ngă leh sa klei soh hlăk ñu bi mguôp hŏng sang Y‑Ahap, brei anak mniê mtao Y‑Ahap jing H’Athali mŭt hlăm gŏ sang ñu. Tŭ boh jhat jing anak êkei mtao Y‑Jôsaphat, jing mtao Y‑Jôram “êbat tui hlue êlan… msĕ si sang Y‑Ahap ngă leh” (II Klei Yăl Dliê 21:6), ngă klei ƀai leh anăn bi mdjiê jih phung adei ñu pô, kyuanăn Khua Yang phat kđi brei ñu djiê hŏng klei ruă knap II Klei Yăl Dliê 21:19). Čô mtao Y‑Jôsaphat jing mtao Y‑Ahasia ăt hmăi mơ̆ng klei jhat H’Athali mơh, ngă klei ƀai leh anăn arăng bi mdjiê tơl “sang Y‑Ahasia amâo mâo sa čô dưi kiă kriê ƀuôn ala mtao ôh” (êlan 9).
Klei Aê Diê Blŭ mtô: “Đăm brei arăng mplư diih ôh; arăng amâo dưi mưč kơ Aê Diê ôh. Kyuadah ya mjeh arăng rah, ñu srăng wiă boh anăn mơh.” (Galati 6:7). Sa mta klei soh čhuai ngă hruê anei, wăt tơdah điêt dưn mơh ăt srăng tla ênoh yuôm leh anăn sui dlông hlăm hruê êdei anăp. Sa klei hdĭp tŭ ư bi mguôp hŏng lăn ala leh anăn hŏng klei soh hruê anei năng ai srăng atăt truh kơ boh jhat kjham kjhuê̆ leh anăn boh jhat anăn sui dlông ktuê jih klei hdĭp drei tơl kơ ênuk lŏ čuê drei. Klei hriăm hruê anei êrâo bi mdih grăp čô drei, brei hŏng jih ai tiê tui hlue êlan Khua Yang, gưt hlue Klei Aê Diê Blŭ mtô, ngă klei jăk leh anăn tui msĕ rup bi hmô mơ̆ng phung huĭ mpŭ kơ Aê Diê, čiăng dưi wiă klei jăk jĭn sui dlông kơ drei pô, kơ gŏ sang drei leh anăn kơ ênuk lŏ čuê drei. Čiăng dưi msĕ snăn, brei drei dlăng leh anăn hriăm Klei Aê Diê Blŭ nanao, čiăng kơ Klei Aê Diê Blŭ atăt gai klei hdĭp drei grăp hruê.
Si ngă drei dôk tŭ klei bi hmăi tui si klei mĭn klei hdĭp lăn ala mơ̆?
Wah lač: Ơ Khua Yang, akâo Klei Ih Blŭ mtrang mngač leh anăn atăt gai kâo tui hlue êlan Ih. Akâo Khua Yang brei kâo gưt kơ Ih nanao čiăng kơ kâo dưi mă tŭ klei jăk jĭn Ih brei, amâo djŏ klei bi rai kơ kâo pô leh anăn kơ gŏ sang kâo ôh. Kâo wah lač hlăm anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 12:1-13:13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
