Klei Aê Diê Blŭ: Bruă Phung Khua Ƀĭng Kna 16:16-33
Êlan kliăng: “Ti krah mlam Y-Pôl leh anăn Y-Silas wah lač leh anăn mmuñ bi mni kơ Aê Diê, leh anăn phung mnă dôk hmư̆ digơ̆.” (Bruă Phung Khua Ƀĭng Kna 16:25)
Klei êmuh ksiêm mĭn: Ya ngă arăng mă krư̆ Y-Pôl leh anăn Y-Silas hlăm mnă? Ya klei diñu ngă leh êjai krah mlam leh anăn ya boh tŭ mâo? Klei yăl dliê anei brei ƀuh si klei Khua Yang kiă kriê hlăm jih jang klei truh?
Hlăm gưl hiu hưn Klei Mrâo Mrang Jăk tal dua, Yang Mngăt Jăk atăt leh êpul hiu hưn Khua ƀĭng kna Y-Pôl truh ti ƀuôn Philip čar Masêdôn, hruê anei jing čar Grek. Ti ƀuôn Philip, diñu tuôm hŏng sa čô mniê yang jhat ngă blŭ klei mdian, leh anăn hŏng klei mdian anăn yơh ñu bi mdrŏng kơ phung khua ñu. Mniê anăn tui hlue êpul hiu hưn klei mrâo mrang jăk leh anăn ur lač “Phung anei jing phung dĭng buăl kơ Aê Diê Pô Ti Dlông Hĭn. Diñu hưn kơ diih êlan klei bi mtlaih” (êlan 17). Mniê anăn ngă msĕ snăn êjai lu hruê, tơl Y-Pôl amâo dưi gĭr tŭ ôh, snăn hlăm Anăn Yêsu Krist ñu suôt yang jhat kbiă đuĕ mơ̆ng mniê anăn. Mmông anăn mtam mniê anăn dưi mâo klei bi mtlaih, ƀiădah phung khua mniê anăn ƀuh luč leh klei dưi ƀơ̆ng lu prăk, diñu mă čăp Y-Pôl leh anăn Y-Silas đoh ba digơ̆ ti anôk sang bruă knŭk kna, mčeh luar lač digơ̆ bi rŭng ƀuôn. Phung khua phat kđi ruăt mtă brei arăng čăm digơ̆ hŏng giê mtam, krư̆ hlăm war mmăt ti lam leh anăn bi hnuh jơ̆ng digơ̆ dua, amâo lŏ guôn phat kđi ôh. Yang jhat ăt yua êlan anei, hdră adih čiăng ngă jhat tơdah drei hiu hưn Anăn Khua Yang. Ƀiădah lĕ, Aê Diê jing Pô kiă kriê jih jang klei, Ñu yua klei truh jhat anăn pioh ba boh tŭ dưn kơ bruă Khua Yang, leh anăn bi mtlaih lu mnuih.
Hlăm brô krah mlam, klei ruă êka kma leh hlăm asei mlei, hrô kơ dlăng kơ klei truh leh anăn ur krao, Khua ƀĭng kna Y-Pôl leh anăn Y-Silas dlăng phă Aê Diê Pô Myang ti dlông hĭn, digơ̆ wah lač kraih leh anăn mmuñ bi mni kơ Aê Diê tơl jih jang phung mnă hmư̆ sơăi! Klei digơ̆ wah lač leh anăn mmuñ bi mni kơ Aê Diê msĕ si mnơ̆ng myơr ngă yang ƀâo mngưi tơl truh kơ jhưng mtao Aê Diê ti Ƀuôn Jăk. Bhiâo riâo rit mâo klei yơ̆ng lăn ala ktang snăk, tơl atur sang war mgei; mmông anăn jih jang ƀăng bhă pŏk sơăi, leh anăn yuôm bhăn êdi klei săng đai phung mnă tlaih jih! Khua mnă mĭndah phung mnă đuĕ jih leh snăn ñu suê̆ đao gưm čiăng bi mdjiê ñu pô, ƀiădah Khua ƀĭng kna Y-Pôl gang hĕ, hưn bi sĭt kơ Khua Yang, mblang klei sĭt nik klei bi mtlaih, klei đăo kơ Khua Yang Yêsu, kơ khua mnă leh anăn phung hlăm sang ñu, leh anăn atăt diñu wah lač jum Khua Yang leh anăn tŭ klei baptem. Êdei anăn khua mnă leh anăn phung hlăm sang ñu mdơ̆ng mnơ̆ng ƀơ̆ng huă kơ êpul hiu hưn klei mrâo mrang jăk hŏng klei hơ̆k mơak!
Bi mni kơ Khua Yang kyua tơdah Khua ƀĭng kna Y-Pôl leh anăn Y-Silas wir ai tiê ñu phă Aê Diê Pô mâo jih klei myang, wah lač leh anăn mmuñ bi mni kơ Khua Yang snăn diñu dua amâo lŏ ƀuh klei knap mñai ôh, kyuadah diñu đăo sĭt Khua Yang ăt dôk mbĭt hŏng diñu nanao hlăm klei arăng ngă jhat, snăn diñu dua knŏng hŏng jih ai tiê mmuñ bi mni kơ Aê Diê amâo mdei ôh. Khua mnă leh anăn phung hlăm sang ñu mâo klei bi mtlaih leh hŏng klei truh knap mñai kơ khua ƀĭng kna Y-Pôl leh anăn Y-Silas. Tơdah arăng amâo mă krư̆ digơ̆ hlăm war mnă, sĭt nik phung mnuih diñu hiu hưn klei mrâo mrang msĕ si khua mnă anei, jing dleh yơh dưi hmư̆ Klei Mrâo Mrang Jăk bi mtlaih. Bi mni kơ Aê Diê jing Pô kiă kriê hlăm jih jang klei truh.
Ya klei drei khăng ngă tơdah tuôm hŏng klei knap mñai êjai dôk mă bruă kơ Khua Yang?
Wah lač: Ơ Ama kâo khăp, akâo Ih đru kâo tui hlue rup bi hmô mơ̆ng Khua ƀĭng kna Y-Pôl leh anăn Y-Silas, hŏng jih ai tiê wah lač, mpŭ mni leh anăn bi mni kơ Khua Yang wăt tơdah tuôm hŏng klei lông dlăng, klei dleh dlan, kyuadah đăo sĭt klei ktang myang Khua Yang dôk kiă kriê hlăm jih jang klei truh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
