Tơdrong jang 16:16-33
Lăm Năr Gleh Anat Truh
“Dang mơjĭt-‘bar jơ tŏk-bŏk măng bre Pôl păng Silas oei krao khan păng hơri bơnê kơ ‘Bok Kei-Dei. Đĭ đăng tơduă lu sư bơngai phak mơ̆ng bre sư ngăl.” (Tơdrong jang 16:25)
Nơ̆r jet tơchĕng pơwao:
– Yua kơ kiơ ‘bar ‘nu bre ‘bok Pôl păng Silas oei tơ hnam phak?
– Bre sư đei pơm kiơ tŏk bŏk măng păng đei yua noh kiơ?
– Tơdrong hơ’mon âu wă tơ’bôh tơdrong kiơ gah tơdrong Kră Yang pơgơ̆r tơlăm dôm tơdrong gleh anat truh?
Kơplah yak rok trong năm chă bơtho ‘măng mă ‘bar, Yang Bơhngol ‘Lơ̆ng đei chông anhăk khul năm chă bơtho,lu đe ‘Bok Pôl truh tơ pơlei Philip lăm dêh Masêđôn, dang ei noh dêh char Grĕk. Tơ pơlei Philip, lu sư tơ’bơ̆p minh ‘nu adruh sư minh ‘nu yang mơ̆t pơm kơ sư wơnh, nyang kơnê̆ ăn kơ sư pơm pơjâu khan lê̆ adrol, sư chă pơma khan kơ đe , na đe ăn kơ bơngai adruh ei, na lu yŏng sư jing mơdrŏng. Adruh ei năm kiơ̆ khul đe ‘bok Pôl, sư pơma ‘bơ̆r re khan: “ Lu bơngai âu jang tơdrong ‘Bok Kei-Dei Kră Yang tih hloh, lu sư bơtho ăn kơ iĕm tơdrong ‘Bok Kei-Dei wă pơklaih iĕm đơ̆ng tơdrong yoch” (tr.17). Rim năr sư pơma thoi noh, na ‘Bok Pôl sư pă kĕ ĕnh bơih, na sư yua anăn Yêsu Krist puh tơlĕch yang kơnê̆ lĕch đơ̆ng adruh âu. Kơtă ei hloi yang kơnê̆ lĕch hloi, yŏng sư ưh pă’bôh yua kơ sư bơih, lu sư rôp hloi bre Pôl păng Silas ăn kơ lu bơngai pơgơ̆r, jâu bre sư pơm kơnê̆ kơ lăm pơlei pơla. Lu ‘bok sek tơlang hăt hot kơ athei đe tôn teh bre sư, chĭt lăm hnam phak măng mu păng chô̆ akŭm jơ̆ng bre sư mă ưh kơ kăl kơ sek tơlang. Yang kơnê̆ yua tơdrong âu, tơdrong to pơm kơnê̆ kơplah bơ̆n năm chă bơtho Tơdrong ‘Nao ‘Lơ̆ng. Mă khan thoi ei, Kră Yang ‘Bok Kei-Dei jơ̆ Tơ’ngla wei pơgơ̆r tôm tơdrong, Sư ăn tơdrong truh wă pơyua kơ tơdrong jang Sư, păng pơklaih lơ bơngai.
Kơplah tŏk bŏk măng, đei jĭ rơka, tơplih kơ lăng tơdrong truh trŏ kơnhơ̆m hmoi. ‘Bok Pôl păng Silas ngoi lăng tơ Kră Yang ‘Bok Kei-Dei tih hloh mơsêh mơyang, ôr krao khan păng hơri bơnê kơ Kră Yang truh mah đĭ-đăng lăm hnam phak mơ̆ng bre sư! Nơ̆r krao khan păng hơri bơnê thoi tơmam soi ‘bâu phu truh tơ Kră Yang tơ Plei ‘Lơ̆ng. ‘Bơ̆t ei teh pơpơ̆ hloi kơkiơ̆ng ‘măng mah tơpơih đĭ, glang mam tơyaih đĭ đơ̆ng lu bơngai phak lăm ei! Bơngai kai wei hnam phak ngêh kơ lu bơngai phak chă kơdâu ôn na toh đao wă ‘bet akâu kơdih, mă-lei ‘Bok Pôl khă sư, pơm kơdranh kơ sư tơdrong Kră Yang, tơblang tơdrong lui gơh klaih yua kơ đei đon lui kơ Kră Yang Yêsu Krist kơ ‘bok kai păng hnam dơnŏ păng bơtho tơ’bôh kơ lu sư krao khan lui sơng iŏk Kră Yang păng chu iŏk ‘batem. Đơ̆ng rŏng kơ noh ‘bok kai wei hnam phak păng hnam dơnŏ hiôk chơt na hơmet tơmam sa kơ đe ‘Bok Pôl!
Bơnê kơ Kră Yang yua kơ kơplah ‘Bok Pôl păng Silas jơhngơ̆m gơnang kơ Kră Yang mơsêh mơyang, krao khan păng hơri bơnê kơ Kră Yang na bre sư ưh pă lăng tơ tơdrong gleh truh bơih ôh, yua kơ luingeh kơ Kră Yang oei hơdai hăm lu sư lăm tơdrong gleh truh âu thoi noh na bre sư đĭ jơhngơ̆m hơri bơnê ư-ang kơ Kră Yang ưh kơ pơdơh. Kră wei lăng hnam phak păng hnam dơnŏ gơh klaih đơ̆ng bre sư oei lăm hnam phak. Tơdah bre sư ưh kơ oei lăm hnam phak lei tơdrong chă bơtho anat thoi kơ kră wei hnam phak âu anat kơ mơ̆ng Tơdrong ‘Nao ‘Lơ̆ng dŏng pơklaih. Bơnê kơ Kră Yang Tơ’ngla pơgơ̆r lăm dôm tơdrong anat truh.
Ơ Kră Yang mă ‘mêm kơeng, apinh tơgŭm inh rok kiơ̆ ,ơmĭl ‘Bok Pôl păng Silas ling-lang đĭ jơhngơ̆m krao khan kơkuh păng bơnê kơ Ih mă kha tơ’bơ̆p tơdrong anat anot pơlong lăng,pơmat, yua kơ lui gơnang kơ mơsêh mơyang Ih ling-lang wei pơgơ̆r lăm dôm tơdrong anat truh. Yua anăn Kră Yang Yêsu Krist, Amen.
Lu bơ̆n ling-lang pơm kiơ kơplah tơ’bơ̆p anat anot truh lăm năr bơ̆n bơ̆jang kơ Sư?
Đŏk Sơ̆p Hla ar ‘Bok Kei-Dei lăm pêng sơnăm: Jêrêmi 28
Kênh Youtube BHKTHN:
