Tes Haujlwm 16:16-33
Nqe cim:
“Thaum kwvlam ib tag hmo, Paulus thiab Xilas tabtom thov Vajtswv thiab hu nkauj qhuas Vajtswv. Cov neeg uas nrog nkawd nyob ua ke hauv tsev lojcuj, lawv sawvdaws mloog nkawd thov Vajtswv thiab hu nkauj” (Tes Haujlwm 16:25)
Lus nug rau sawvdaws xav:
– Vim licas Paulus thiab Xilas raug kaw hauv tsev lojcuj?
– Nkawd ua dabtsi thaum ib tag hmo thiab qhov nkawd tau txais yog dabtsi?
– Zaj xwm no qhia peb pom dabtsi hauv Vajtswv kev tswj kav txhua lub tsamthawj?
Hauv kev tshaj tawm Txojmoo Zoo zaum ob, Vaj Ntsujplig coj timthawj Paulus pab tub xa Moo Zoo kev mus txog hauv lub nroog Filipis uas yog xeev Makedaunias, nim no yog tebchaws Kilis. Nyob hauv Filipis, lawv ntsib ib tus ntxhais raug dab, muaj peevxwm paub txhua yam, nws yog ib qhov kev nrhiav nyiaj zoo heev rau tus tswv uas yuav nws. Nws caum Paulus pab neeg xa Moo Zoo thiab qw nrov nrov tias “Cov txivneej no yog Vajtswv tus uas muaj hwjchim Loj kawg nkaus cov tub txib! Lawv tuaj qhia txoj kev dimtxim rau nej” (nqe 17). Ntau hnub li ntawd ua rau tab kaum Paulus lawv heev, Paulus thiaj tuav Tswv Yexus lub npe ntiab tus dab ntawd tawm hauv tus ntxhais no mus. Tamsim ntawd tus ntxhais no tau dim, tiamsis ua rau tus ntxhais no cov tswv nrhiav tsis tau nyiaj lawm, lawv thiaj ntes Paulus thiab Xilias cob rau cov nomtswv, liam hais tias lawv tsim kev kub ntxov rau hauv lub nroog no. Cov nomtswm maj nroos muab lawv ntaus, muab kaw hauv tsev lojcuj thiab xauv kotaw tsis taug lawv zaj li. Dab Ntxwgnyoog ibtxwm siv lub tswvyim no, thiab lwm lub tswvyim tsimtxom thaum peb qhia txog Yexus lub npe. Tiamsis Vajtswv yog tus tswj rawv ib puas tsav yam, Nws siv tej lub tsamthawj txomnyem los ua kom Nws tes haujlwm loj hlob, thiab pab cawm ntau leej.
Thaum kwvlam li ib tag hmo, txawm tej qhov txhab mob heev los nkawd tsis muab qhov ntawd quaj qw, tiamsis Timthawj Paulus thiab Xilas saib Vajtswv tus muaj hwjchim loj, nkawd thov Vajtswv nrov nrov thiab hu nkauj ua rau txhua tus neeg raug txim hnov tag nrho! nkawd cov lus thov thiab lub suab hu nkauj zoo li cov pa tshuaj tsw qab mus txog ntawm Vajtswv lub Zwmtxwv saum Ceebtsheej. Ib ntsaig muag xwb muaj av qeeg ua zog koog ua rau tej qhov rooj tsev lojcuj qhib tagnrho, yam uas txawv tshaj yog tej saw hlau khi tej neeg raug txim cia li plam tag huvsi! Tus saib lub tsev lojcuj xav tias cov neeg raug txim puavleej khiav tas lawd nws thiaj rho ntaj yuav muab nws tua pov tseg, tiamsis Timthawj Paulus cheem nws, ua timkhawv txog tus Tswv rau nws, txhais lub ntsiab kev cawmdim dhau los ntawm kev ntseeg Tswv Yexus rau nws thiab nws tsevneeg, coj lawv thov Vajtswv txais yuav Tswv Yexus thiab ua kevcai raus dej. Tom qab ntawd, tus saib tsev lojcuj ua ib pluag mov los tiam Paulus thiab nws pab tub xa Moo Zoo ua kev zoo siab!
Ua Vajtswv tsaug vim Timthawj Paulus thiab Xilas tig mus rau ntawm Vajtswv tus muaj hwjchim, thov Vajtswv thiab hu nkauj qhuas Vajtswv ua rau nkawd tsis pom tej kev txomnyem lawm, vim ntseeg hais tias Vajtswv yeej nyob nrog nraim nkawd hauv kev tsimtxom no nkawd thiaj tas siab hu nkauj txhawb nqa Vajtswv tsis tu. Tus saib tsev lojcuj thiab nws tsevneeg tau txais kev cawmdim dhau los ntawm nkawd txoj kev txomnyem. Yog nkawd tsis raug kaw, tus saib tsev lojcuj yeej tsis muaj hnub yuav hnov tau Txojmoo Zoo uas yog kev cawmdim li. Ua Vajtswv tsaug vim Nws yog tus tswj rawv txhua lub tsamthawj.
Thov Vajtswv,
Vaj Leej Txiv tus muaj kev hlub, thov pab nyuam yaus ua raws Paulus thiab Xilas tus qauv txawj thov Koj pab, hu nkauj txhawb nqa thiab ua Koj tsaug hauv kev txomnyem vim Koj yog tus tswj rawv txhua lub tsam thawj. Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua,
Peb pheej ua li cas thaum ntsib kev txomnyem hauv kev ua Vajtswv haujlwm?
Nyeem Vajluskub hauv peb lub xyoo: Yelemis 28
Kênh Youtube BHKTHN:
